ކަނބަލުން މަހަށް ގޮސް ގިނަ އަދަދެއްގެ މަސް ބާނައިފި
9 މާރިޗު 2019 | ހޮނިހިރު 15:56މި ހަރަކާތުގައި ބައިވެރި ވެފައި ވަނީ ބީއެމްއެލްގެ މުވައްޒަފުންނާއި ގެމަނަފުށީގެ އަންހެނުން
ކަނބަލުންގެ ބޭނި މަސް
އަންހެނުންގެ ދުވަސް ފާހަގަކުރުމުގެ ގޮތުން ކަނބަލުން މަހަށް ގޮސް ދެ ގަޑިއިރުގެ ތަރޭގައި 300 ކިލޯގެ މަސް ބާނައިފިއެވެ.
ބޭންކް އޮފް މޯލްޑިވްސް އާއި ދިވެހި މަސްވެރިންގެ ޖަމިއްޔާ ގުޅިގެން ހިންގި މި ހަރަކާތުގައި ބައިވެރިވެފައި ވަނީ ބޭންކްގެ އަންހެން މުވައްޒަފުންނާއި ގެމަނަފުށީގެ އަންހެނުން ހިމެނޭ ގޮތަށް 30 ކަނބަލުންނެވެ. މި ހަރަކާތް ކުރިއަށް ގެންގޮސްފައި ވަނީ ހުކުރު ދުވަހުގެ ހަވީރުއެވެ.
ބީއެމްއެލްއިން ބުނީ އަންހެން ކަނބަލުން ފީނައި އެންދެމުމަށް ފަހު ކަނޑަށް ނިކުމެ މަސް ބާނާފައިވާ ކަމަށާއި ބޭނި މަހުން ރިހާކުރު ކެއްކުމަށް ހަމަޖެހިފައިވާ ކަމަށެވެ.
އިޖްތިމާޢީ އެކި ހަރަކާތްތަކުގައި އަންހެނުން ބާރުވެރި ކުރުވައި، މުޖުތަމައުގެ އެއްބައިވަންތަ ކަމާއި ހަމަހަމަ ކަން ގާއިމު ކުރުމަށް ބީއެމްއެލް އިން އަބަދު ވެސް އަހައްމިއްޔަތު ކަން ދޭނެ ކަމަށް އެ ބޭންކުން ބުނެއެވެ.
މި ހަރަކާތުގެ ސަބަބުން އަންހެނުންގެ މެދުގައި މަސްވެރިކަމުގެ ރޫޙު އާލާވެ، ދިވެހި އަންހެނުނަކީ ކޮންމެ ކަމަކަށް ވެސް ކެރިގެން ކުރިމަތިލާ ފިސާރި ކަނބަލުންތަކެއް ކަން ދައްކުވައި ދީ، ޒަމާނުއްސުރެ ދިވެހިންގެ ލޭނާރު ކަމަށްވާ މަސްވެރިކަމަށް ޝައުގުވެރިކަން އިތުރުވެގެންދާނެ ކަމަށް އެ ބޭންކުން ބުންޏެވެ.
އަންހެނުންގެ ދުވަސް ފާހަގަކުރުމުގެ ގޮތުން ކުރިއަށް ގެންދާ މަސްވެރިކަމުގެ ހާއްސަ ހަރަކާތާ ގުޅޭ ގޮތުން، އެ ބޭންކްގެ ޑެޕިއުޓީ ސީއީއޯ އައިޝަތު ނޫރައްދީން ބައެއް މީޑިއާތަކަށް ވިދާޅުވީ، އެ ހަރަކާތުގެ ސަބަބުން މަސްވެރިކަމަށް ދިވެހި އަންހެނުންގެ ހުރި ޝައުގެވެރިކަމާއި، އެފަދަ ކަންކަމަށް ލިބޭ ތަރުހީބު ފާހަގަ ކުރެވިގެން ގޮސްފައި ވާ ކަމަށެވެ.
