ރައީސް ޔާމީން އަނެއްކާ ވެސް އައިޖީއެމްއެޗަށް ގެނެސްފި
7 މާރިޗު 2019 | ބުރާސްފަތި 19:00ފަރުވާއަށްފަހު ޔާމީން ޖަލަށް ބަދަލު ކުރީ ވެސް ބުރާސްފަތި ދުވަހު
ރައީސް ޔާމީން ހައްޔަރުކޮށްގެން ގެންދަވަނީ | ޕީއެސްއެމް
މަނީ ލޯންޑަރިންގެ މައްސަލައިގައި ޝަރީއަތް ނިމެންދެން ޖަލު ބަންދެއްގައި ހުންނެވި ކުރީގެ ރައީސް އަބްދުﷲ ޔާމީން އަނެއްކާވެސް އައިޖީއެމްއެޗަށް ގެނެސްފިއެވެ.
ބުރާސްފަތި ދުވަހުގެރޭ ރައީސް ޔާމީން އައިޖީއެމްއެޗަށް ގެނެސްފައިވާއިރު، މިމަހުގެ 4 ވަނަ ދުވަހު ހިތުގެ ޑޮކްޓަރުގެ އިރުޝާދުގެ މަތިން އައިޖީއެމްއެޗްގައި އެޑްމިޓްކުރުމަށްފަހު އެމަނިކުފާނު ޖަލަށް އަނބުރާ ގެންދިޔައީ ބުރާސްފަތި ދުވަހުގެ ހެނދުނުގެ ވަގުތެއްގައެވެ.
ރައީސް ޔާމީން ޖަލުބަންދުގައި ހުންނަވާތާ މިހާރު ވަނީ ތިން ހަފްތާއެއްހާ ދުވަސް ވެފައެވެ.
ރައީސް ޔާމީން ހައްޔަރު ކުރީ އެމަނިކުފާނުގެ މައްޗަށް އުފުލާފައިވާ މަނީ ލޯންޑަރިންގެ ދައުވާގެ ޝަރީއަތް ނިމެންދެށެވެ. ކްރިމިނަލް ކޯޓަށް ޔާމީން ހާޒިރުކުރުމަށް ފަހު، ބަންދާ މެދު ގޮތެއް ނިންމުމަށް ބޭއްވި އަޑުއެހުމުގައި އެމަނިކުފާނު ވަނީ ބުރަކަށީގައި ރިއްސާ ކަމަށާއި ގަވައިދުން އެކަމަށް ފަރުވާ ކުރަމުންދާ ކަމަށް ވިދާޅުވެފައެވެ. ނަމަވެސް ކްރިމިނަލް ކޯޓުގެ އިސް ގާޒީ ހައިލަމް ވަނީ އެކަމަށް ރިޔާއަތް ކުރެއްވުމެއް ނެތި ޝަރީއަތް ނިމެންދެން ބަންދުގައި ބެހެއްޓުމަށް އަމުރު ކޮށްފައެވެ. އޭގެ ފަހުން މިދިޔަ ފެބްރުއަރީ މަހުގެ ތެރޭގައިވެސް ރައީސް ޔާމީން އެޑްމިޓް ކުރުމަށް ފަހު އައިޖީއެމްއެޗުން ވަނީ ފަރުވާ ދީފައެވެ.
ރައީސް ޔާމީންގެ މައްސަލައިގެ އަޑުއެހުން ބުރާސްފަތި ދުވަހު ކޯޓުގައި ތާވަލްކުރި ނަމަވެސް ފަހުން ވަނީ ކެންސަލްކޮށްފައެވެ.
