ހައްޖު ކޯޕަރޭޝަންގެ ޗެއާމަނަކަށް ވިލާކޮލެޖްގެ ޑައިރެކްޓަރު ޑރ. ކިނާނަތު
މަގާމަށް އައްޔަން ކޮށްފައިވަނީ ބުރާސްފަތި ދުވަހު
ޑރ. ކިނާނަތު
ހައްޖު ކޯޕަރޭޝަންގެ ޗެއާމަނަކަށް ޑރ. މުހައްމަދު ކިނާނަތު ހަމަޖައްސާފިއެވެ.
ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑުން ބުރާސްފަތި ދުވަހު ކުރި ޓްވީޓެއްގައި ބުނީ، ހައްޖު ކޯޕަރޭޝަންގެ ޗެއާމަނަށް އައްޔަންކޮށްފައި ވަނީ، މއ. ބޮޑުހުރާގެ، ޑރ. މުހައްމަދު ކިނާނަތު ކަމަށެވެ.
ނިއުޒިލޭންޑްގެ ވެލިންޓަން ޔުނިވާސިޓީން ޕީއެޗްޑީ ހައްދަވާފައިވާ ކިނާނަތަކީ ވިލާ ކޮލެޖުގެ ފެކަލްޓީ އޮފް އިންފޮމޭޝަން އެންޑް ކޮމިއުނިކޭޝަންގެ ޓެކްނޮލޮޖީގެ ޑީންގެ އިތުރުން ވިލާ ކޮލެޖުގެ ޑައިރެކްޓަރެކެވެ. އަދި ރައީސް އޮފީހުގެ އިތުުރުން ދިވެހިރާއްޖޭގެ ގައުމީ ޔުނިވާސިޓީގައި ވެސް ވަޒީފާ އަދާކުރައްވާފައެވެ.
2013 ވަނަ އަހަރު އުފައްދަވާފައިވާ ހައްޖު ކޯޕަރޭޝަން އަކީ ދިވެހި ސަރުކާރުގެ ސަތޭކަ ޕަސެންޓު ހިއްސާ އޮންނަ ދިވެހި ސަރުކާރުގެ ކުންފުންޏެކެވެ. އެ ކުންފުނީގެ ބޭނުމަކީ ޙައްޖަށް ދާން ބޭނުންވާ ދިވެހި ރައްޔިތުންނަށް ލުއި ފަސޭހަކަމާއި އެކު އަޅުކަން އަދާކުރެވޭނެ އިންތިޒާމު ހަމަޖައްސައި، ޙައްޖުގެ އަޅުކަން އަދާކުރުމަށް ގަސްދުކުރާ ދިވެހިންގެ ފައިސާ އަމާނާތްތެރިކަމާ އެކު ބަލަހައްޓާނެ ނިޒާމެއް ޤާއިމުކުރުމެވެ.
