ޔާމީން އަނބުރާ ޖަލަށް
އައިޖީއެމްއެޗަށް ގެންދިޔައީ މިދިޔަ ހޯމަ ދުވަހު
ކުރީގެ ރައީސް އަބްދުﷲ ޔާމީން
މަނީ ލޯންޑަރިންގެ މައްސަލައިގައި ޝަރީއަތް ނިމެންދެން ޖަލު ބަންދެއްގައި ހުންނެވި ކުރީގެ ރައީސް އަބްދުﷲ ޔާމީން ހޮސްޕިޓަލުން އަނެއްކާ ވެސް ޖަލަށް ބަދަލުކޮށްފިއެވެ.
ޑޮކްޓަރަށް ދެއްކުމަށް ރައީސް ޔާމީން އައިޖީއެމްއެޗަށް ގެންދިޔައީ މިދިޔަ ހޯމަ ދުވަހުއެވެ. އަދި ހިތުގެ ޑޮކްޓަރުގެ އިރުޝާދުގެ މަތިން ރައީސް ޔާމީން އައިޖީއެމްއެޗްގައި އެޑްމިޓްކުރިއެވެ.
ރައީސް ޔާމީން ޖަލުބަންދުގައި ހުންނަވާތާ މިހާރު ވަނީ ތިން ހަފްތާއެއްހާ ދުވަސް ވެފައެވެ. މައުލޫމާތު ލިބިފައިވާ ގޮތުގައި އައިޖީއެމްއެޗުން ޔާމީން ދޫކޮށްލާފައި ވަނީ ބުރާސްފަތި ދުވަހުގެ 9:30 ހާއިރުއެވެ.
ރައީސް ޔާމީން ހައްޔަރު ކުރީ އެމަނިކުފާނުގެ މައްޗަށް އުފުލާފައިވާ މަނީ ލޯންޑަރިންގެ ދައުވާގެ ޝަރީއަތް ނިމެންދެށެވެ. ކްރިމިނަލް ކޯޓަށް ޔާމީން ހާޒިރުކުރުމަށް ފަހު، ބަންދާ މެދު ގޮތެއް ނިންމުމަށް ބޭއްވި އަޑުއެހުމުގައި އެމަނިކުފާނު ވަނީ ބުރަކަށީގައި ރިއްސާ ކަމަށާއި ގަވައިދުން އެކަމަށް ފަރުވާ ކުރަމުންދާ ކަމަށް ވިދާޅުވެފައެވެ. ނަމަވެސް ކްރިމިނަލް ކޯޓުގެ އިސް ގާޒީ ހައިލަމް ވަނީ އެކަމަށް ރިޔާއަތް ކުރެއްވުމެއް ނެތި ޝަރީއަތް ނިމެންދެން ބަންދުގައި ބެހެއްޓުމަށް އަމުރު ކޮށްފައެވެ. އޭގެ ފަހުން މިދިޔަ ފެބްރުއަރީ މަހުގެ ތެރޭގައި ވެސް ޔާމީން އެޑްމިޓް ކުރުމަށް ފަހު އައިޖީއެމްއެޗުން ވަނީ ފަރުވާ ދީފައެވެ.
ރައީސް ޔާމީންގެ މައްސަލައިގެ އަޑުއެހުން މިއަދު ކޯޓުގައި ތާވަލްކުރި ނަމަވެސް ފަހުން ވަނީ ކެންސަލްކޮށްފައެވެ.
