ވިކްޓްރީ ސްޕޯޓްސް ކްލަބަށް ކުޅެމުން އައި ހުސެއިން ނިހާން (ނިހާޓް) މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކޮށްފިއެވެ.
ތިން އަހަރުގެ އެއްބަސްވުމެއްގެ ދަށުން ނިހާޓް މާޒިޔާއަށް ސޮއިކޮށްފައި ވާއިރު، އޭނާއާއެކު މާޒިޔާގެ މިޑްފިލްޑް ލައިން އިތުރަށް ވަރުގަދަވެގެންދާނެއެވެ.
ނިހާޓް އޭނާގެ ކެރިޔަރު އީގަލްސްއިން 2012 ވަނަ އަހަރު ފެށިއިރު، އޭނާ ވަނީ ކްލަބް ވެލެންސިއާއަށްވެސް ކުޅެފައެވެ. އޭނާ އެންމެ ފަހުން ކުޅެފައިވަނީ ވިކްޓްރީއަށެވެ.
ވިކްޓްރީގައި މިދިޔަ ސީޒަނުގައި ދެއްކި މޮޅު ކުޅުމާއެކު ނިހާޓް ގައުމީ ސްކޮޑަށްވެސް ވަނީ ނަގާފައެވެ. އެގޮތުން އޭނާ ވަނީ ސާފް ސުޒުކީ ކަޕަށް ރާއްޖެއިން ނެގި ސްކޮޑުގައި ހިމެނި މުޅި މުބާރާތުގައިވެސް މޮޅު ކުޅުމެއް ދައްކާފައެވެ.
އަންނަ ޖޫން މަހު ފަށާ ދިވެހި ފުޓުބޯޅަ ސީޒަނަށް ތައްޔާރުވުމުގެ ގޮތުން މާޒިޔާއިން ވަނީ ނިހާޓްގެ އިތުރުން ނިއުރޭޑިއަންޓް ސްޕޯޓްސް ކްލަބަށް ކުޅެމުން އައި ހަމްޒާ މުހައްމަދު (ހަމްޕު) އާއި ޓީސީ ސްޕޯޓްސް ކްލަބަށް ކުޅެމުން އައި އިބްރާހިމް ވަހީދު ހަސަން (އިއްބެ) ގެ ސޮއިވެސް ހޯދާފައެވެ.
ނިހާޓް އާއި ހަމްޕު އާއި އިއްބެގެ އިތުރުން ދެން އެންމެ އަވަހަށް މާޒިޔާއަށް ސޮއިކުރާނެ ކަމަށް ބެލެވެނީ ޓީސީ ސްޕޯޓްސް ކްލަބަށް ކުޅެމުން އައި އިބްރާހިމް މަހުދީ (ފޭދޫ އިއްބެ) އެވެ.
