އަލްޖީރިއާގެ ރައީސް އަބްދުލްއަޒީޒް ބޫތެފްލިކާ ގެންދަވަނީ ނޭވާލާ ނިޒާމާއި ނާރުތަކުގެ އާލާސްކަންފުޅެއް ތަހައްމަލް ކުރައްވަމުންކަމަށް ސްވިޒަލޭންޑްގައި ފަރަންސޭސި ބަހުން ނެރޭ ދުވަހު ނޫހެއްކަމަށްވާ ޓްރިބިއުން ޑި ޖެނީވްގައި ބުދަ ދުވަހު ބުނެފިއެވެ.
މި ރިޕޯޓްގައި ބުނެފައިވާ ގޮތުގައި އަލްޖީރިއާގެ ރައީސްއަށް އިންޓެންސިވް މެޑިކަލް ކެއަރ ބޭނުންވާއިރު އެ މަނިކުފާނަށްވަނީ ނާރުތަކުގެ ބާރު ދަށްވުމުގެ ހާލަތަކާ ކުރިމަތިވެވަޑައިގެންފައެވެ. މިހާރުވެސް ޖެނީވާ ޔުނިވާސިޓީ ހޮސްޕިޓަލުގެ އަށް ވަނަ ބުރީގައި ގެންދަނީ ފަރުވާ ދެމުންނެވެ.
"އަލްޖީރިއާގެ ރައީސްގެ ނޭވާލާ ނިޒާމްގެ މައްސަލަ ދިމާވީއްސުރެ އެ މަނިކުފާނުގެ ސިއްހީ ހާލުކޮޅުވަނީ "ނުރައްކަލުގައި'" އަދި ހުއްޓުމެއް ނެތި ފަރުވާ ބޭނުންވޭ" ނޫހުގައި ރިޕޯޓްކޮށްފައިވެއެވެ.
މިހާލަތުގައިވެސް ވެރިކަމުގެ އިތުރު ދައުރަކަށް ކުރިމަތި ލައްވާނެކަން އިއުލާނުކުރައްވައި، އެކަމާ ރައްޔިތުން ނުރުހުމުން އިންތިޚާބު ވެވަޑައިގެންފިނަމަ އެއް އަހަރު ދުވަހު ވެރިކަން ކުރެއްވުމަށް ފަހު އިސްތިއުފާ ދެއްވާނެ ކަމަށްވަނީ އިއުލާނުކުރައްވާފައެވެ.
ރައީސް އަބްދުލްއަޒީޒު ބޫތެފްލިކާ ރައްޔިތުންނަށް ދެއްވި އެ 'ޑީލަށް'ވެސް ނޫނެކޭ ބުނެ، އެ ޤައުމުގެ ގިނަ އަދަދެއްގެ ދަރިވަރުންވަނީ އިހުތިޖާޖު ފަށާފައެވެ.
ވޭތުވެދިޔަ 20 އަހަރު އަލްޖީރިއާގައި ވެރިކަން ކުރައްވާފައިވާ، އުމުރުން 82 އަހަރުގެ ބޫތެފްލިކާ، ވެރިކަމުގެ ފަސްވަނަ ދައުރަކަށް ކުރިމަތިލެއްވުމަށް ނިންމެވުމާއި ގުޅިގެން އަލްޖީރިއާގައި ފެށި މުޒާހަރާތައް އަދިވެސް ކުރިއަށްގެންދެއެވެ.
