އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ މުޅި ދުނިޔޭގެ ހަމަޖެހުމަށް ގިނަ މަސައްކަތް ތަކެއް ކުރައްވަމުން ކަމަށް، ރަޝިޔާގެ ރައީސް ވްލަޑިމިއަރ ޕުޓިން ވިދާޅުވެއްޖެ އެވެ.

ޕުޓިން މިހެން ވިދާޅުވެފައި މި ވަނީ، މިއަހަރުގެ ނޮބެލް ސުލްޙައިގެ އިނާމު ޓްރަމްޕް އަށް ނުލިބުނު ދަނޑިވަޅުގަ އެވެ. ޓްރަމްޕް އަދި ބައެއް ޤައުމު ތަކުގެ ވެރިން ދިޔައީ މިއަހަރުގެ ނޮބެލް ސުލްޙައިގެ އިނާމު އޭނާ އަށް ލިބެން ޖެހޭނެ ކަމަށް ވިދާޅުވަމުންނެވެ.

ނަމަވެސް، ޓްރަމްޕް ފަހަތަށް ޖައްސާލުމަށް ފަހު މިއަހަރުގެ ނޮބެލް ސުލްޙައިގެ އިނާމު ޙާސިލު ކޮށްފައި ވަނީ ވެނެޒުއޭލާގެ އިދިކޮޅު ސިޔާސީ ލީޑަރު މަރީއާ ކޮރީނާ މަޗާޑޯ އެވެ. ހުކުރު ދުވަހު ނޯބެލް އިނާމު ކޮމެޓީ އިން ވަނީ އެކަން ރަސްމީކޮށް އިއުލާން ކޮށްފަ އެވެ.

ތަޖަކިސްތާންގައި ނޫސްވެރިންނާ ވާހަކަ ދައްކަވަމުން ޕުޓިން ވިދާޅުވެފައި ވަނީ، އެމެރިކާގެ ރައީސް ޓްރަމްޕް އަށް ނޯބެލް ސުލްޙައިގެ އިނާމު ލިބެންވާނެތޯ ނިންމާނީ އޭނާ ނޫން ކަމަށެވެ. އަދި އެ އިނާމު ލިބެން ޖެހޭނީ ކާކަށް ކަމެއް އޭނާ އަށް ނޭނގޭ ކަމަށް ޕުޓިން ވަނީ ވިދާޅުވެފަ އެވެ.

އެހެން ނަމަވެސް، ގިނަ އަހަރުތަކަކާއި، ދުވަސް ތަކަކަށް ދެމިގެން ދިޔަ އުނދަގޫ ހަމަ ނުޖެހުންތައް ޙައްލު ކުރުމަށް ޓްރަމްޕް ގިނަ މަސައްކަތް ތަކެއް ކުރެއްވި ކަމަށް ޕުޓިން ވަނީ ވިދާޅުވެފަ އެވެ. އަދި މިހާރު ވެސް ޓްރަމްޕް ގެންދަވަނީ ދުނިޔޭގެ ހަމަޖެހުމަށްޓަކައި ގިނަ މަސައްކަތް ތަކެއް ކުރައްވަމުން ކަމަށް ޕުޓިން ވިދާޅުވެފައިވެ އެވެ.

މީގެ އިތުރުން މެދު އިރުމަތީގެ ޙާލަތާ ގުޅޭ ގޮތުން ވާހަކަ ދައްކަވަމުން ޕުޓިން ވިދާޅުވެފައި ވަނީ ޓްރަމްޕް މަސައްކަތް ކުރައްވާ ކަންކަން ހާސިލު ކުރެވިއްޖެ ނަމަ، އެއީ ވަރަށް ބޮޑު ތާރީޚީ ކާމިޔާބެއް ކަމަށެވެ. ނަމަވެސް، ޕުޓިން ވަނީ ނޮބެލް އިނާމު ކޮމެޓީ އަށް ފާޑު ކިޔުން އަމާޒު ކުރައްވައިފަ އެވެ. އެގޮތުން ސުލްޙައަށް އެއްވެސް މަސައްކަތެއް ނުކުރާ މީހުންނަށް ވެސް މީގެ ކުރިން އިނާމު ދީފައިވާ ކަމަށް ޕުޓިން ވިދާޅުވެފައިވެ އެވެ.

ޓްރަމްޕް ވަނީ ޕުޓިންގެ އެ ވާހަކަތައް އޭނާގެ ޓުރުތު ސޯޝަލް މީޑިއާގައި ހިއްސާ ކުރައްވައިފަ އެވެ. އަދި ޓްރަމްޕްއާ މެދު ވިދާޅުވެފައިވާ ބަސްތަކަށް އޭނާ ވަނީ ޕުޓިން އަށް ޝުކުރު އަދާ ކުރައްވައިފަ އެވެ. ޕުޓިން އާއި ޓްރަމްޕް އަކީ ވަރަށް ގާތް ގުޅުމެއް އޮންނަ ދެ ބޭފުޅުންނެވެ.

ޓްރަމްޕް ގެންދަވަނީ ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމަ ނިމުމަކަށް ގެނައުމަށް ވެސް ގިނަ މަސައްކަތް ތަކެއް ކުރައްވަމުންނެވެ. އޭނާ ވަނީ އެކަމާ ގުޅޭ ގޮތުން ޕުޓިންއާ ވަކިން ބައްދަލު ވެސް ކުރައްވައިފަ އެވެ. ރަޝިޔާ-ޔުކްރެއިން ހަނގުރާމައިގެ މައްސަލައިގައި ދޭތެރެއިން ޓްރަމްޕްގެ ނުރުހުން ޕުޓިން އަށް އަމާޒުވާކަން ވެސް ފާހަގަ ކުރެވެއެވެ.