ރައީސް ބޫތެފްލިކާގެ 'ޑީލް' ދަރިވަރުންނަށް ކަމަކު ނުދިޔަ – މުޒާހަރާތައް ކުރިއަށް

ވެރިކަމުގެ އިތުރު ދައުރަކަށް އިންތިޚާބު ވެވަޑައިގެންފިނަމަ އެއް އަހަރު ދުވަހު ވެރިކަން ކުރެއްވުމަށް ފަހު އިސްތިއުފާ ދެއްވާނެ ކަމަށް ވިދާޅުވެ، އަލްޖީރިއާގެ ރައީސް އަބްދުލްއަޒީޒު ބޫތެފްލިކާ އެ ޤައުމުގެ ރައްޔިތުންނަށް ދެއްވި 'ޑީލަށް' ނޫނެކޭ ބުނެ، އެ ޤައުމުގެ ގިނަ އަދަދެއްގެ ދަރިވަރުން އިހުތިޖާޖު ފަށައިފިއެވެ.

ވޭތުވެދިޔަ 20 އަހަރު އަލްޖީރިއާގައި ވެރިކަން ކުރައްވާފައިވާ، އުމުރުން 82 އަހަރުގެ ބޫތެފްލިކާ، ވެރިކަމުގެ ފަސްވަނަ ދައުރަކަށް ކުރިމަތިލެއްވުމަށް ނިންމެވުމާއި ގުޅިގެން އަލްޖީރިއާގައި ފެށި މުޒާހަރާތައް އަދިވެސް ކުރިއަށްދާއިރު، އެ ޤައުމުގެ ދަރިވަރުން ވަނީ އިހުތިޖާޖު ކުރުމުގެ ގޮތުން ކްލާސްތައް ބޮއިކޮޓްކޮށްފައެވެ.

ބޫތެފްލިކާގެ ދިގު ވެރިކަން ދަމަހައްޓާފައިވަނީ ފްރާންސާއި ދެކޮޅަށް 1954 ން 1962 ވަނަ އަހަރާއި ހަމައަށް އަލްޖީރިއާގެ މިނިވަންކަން ހޯދުމަށް ކުރި ހަނގުރާމައިގެ ބައިވެރިން ހިމަނައިގެން އުފެއްދި ސަރުކާރުތަކުގެ ބާރުގައެވެ. ނަމަވެސް އެ ޤައުމުގެ ޒުވާނުން މިހާރު އެދެމުން ދަނީ ރައީސް ބޫތެފްލިކާ ވެރިކަމާއި ދުރަށް ޖެހިވަޑައިގެން، އާ ޖީލަކަށް ވެރިކަން ކުރުމުގެ ފުރުޞަތު ދިނުމަށެވެ.

ދަރިވަރުންގެ އިހުތިޖާޖާއި ގުޅިގެން އަލްޖީރިއާގެ އެންމެ ބޮޑު ޔުނިވަރސިޓީ ކަމުގައިވާ ބާބް އެޒޫއަރް ޔުނިވަރސިޓީގެ އެއްވެސް ދަރިވަރަކު ކިޔެވުމަށް ހާޒިރުވެފައި ނުވާއިރު، އަލްޖީރިއާގެ އެކި ހިސާބުތަކުގައިވާ އެހެން ޔުނިވަރސިޓީތަކުގެ ދަރިވަރުންވެސް ދަނީ ކިޔެވުން ބޮއިކޮޓް ކުރަމުންނެވެ.

2013 ވަނަ އަހަރު ސްޓްރޯކެއް ޖެހުމާއި ގުޅިގެން ހަށިގަނޑުން ވަރު ނެތި، ފުރޮޅުލީ ގޮނޑިއެއްގައި ދުވަސްތައް ހޭދަކުރައްވަން ޖެހިވަޑައިގެންފައިވާ ރައީސް ބޫތެފްލިކާ ވޭތުވެދިޔަ 5 އަހަރެއްހާ ދުވަހު ރައްޔިތުންނަށް ފެނިފައިވަނީ މަދު މުނާސަބަތުތަކެއްގައެވެ.