ދިވެހިރާއްޖެއިން ސިންގަޕޫރަށް އަލަށް ކަނޑައަޅުއްވި ސަފީރު ޑރ. ޢަބްދުﷲ މައުސޫމް، އެމަނިކުފާނުގެ ސަފީރުކަމުގެ ފަތްކޮޅު ސިންގަޕޫރުގެ ރައީސާ މެޑަމް ހަލީމާ ޔައުގޫބް އަށް އަރުވައިފިއެވެ.

އެމަނިކުފާނުގެ މަގާމުގެ ފަތްކޮޅު ސިންގަޕޫރުގެ ރައީސާ އަށް އަރުވާފައި ވަނީ އެކަމަށް ޚާއްސަކޮށް، އަންގާރަ ދުވަހުގެ ހެނދުނު ސިންގަޕޫރުގެ ރައީސާގެ ރަސްމީ ގެކޮޅު "އިސްތާނާ" ގައި ބޭއްވެވި ރަސްމިއްޔާތުގައެވެ. މި ރަސްމިއްޔާތަށް ފަހު ސަފީރުކަމުގެ ފަތްކޮޅު އެރުއްވުމުގެ މުނާސަބަތުގައި ސިންގަޕޫރުގެ ރައީސާ، ސަފީރަށް ތަހުނިޔާ ދަންނަވައި ދެ ޤައުމުގެ ދެމެދުގައި އުފެދިފައިވާ ޒަމާންވީ ރަޙްމަތްތެރިކަމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެ ކަމަށް އުއްމީދު ކުރައްވާ ކަމުގައި ވިދާޅުވިއެވެ. އަދި ޑރ. ޢަބްދުﷲ މައުސޫމް ރައީސް ސޯލިހުގެ ފަރާތްޕުޅުން ހެޔޮއެދުމާއި ތަޙުނިޔާ އަރިސްކުރައްވައި، ދެޤައުމުގެ ދެމެދުގައި އުފެދިފައިވާ ޒަމާންވީ ރަޙްމަތްތެރި ގުޅުން އިތުރަށް ބަދަހިކުރުމަށް އެމަނިކުފާނު މަސައްކަތްކުރައްވާނެކަމުގެ ޔަގީންކަން ވަނީ ދެއްވާފައެވެ.

މި ރަސްމިއްޔާތުގައި ސަފީރު ޑރ. ޢަބްދުﷲ މައުސޫމްގެ އަރިހުގައި ބައިވެރިވެވަޑައިގަތީ އެމަނިކުފާނުގެ އަނބިކަނބަލުން އަލްފާޟިލާ ޒީނާޒް ފަހުމީ، ސިންގަޕޫރުގައި ހުންނަ ދިވެހިރާއްޖޭގެ އެމްބަސީގެ ޑެޕިޔުޓީ އެމްބެސެޑަރ އީމާން ޙުސައިން އަދި ސެކަންޑް ސެކްރެޓަރީ އާމިނަތު ގުރައިޝާއެވެ.

ސިންގަޕޫރުގައި ހުންނަ ދިވެހިރާއްޖޭގެ ސަފީރުކަމަށް ޑރ.  މައުސޫމް އައްްޔަނުކުރައްވާފައި ވަނީ 18 ފެބްރުއަރީ 2019 އެވެ.