ރާއްޖޭން ބޭރުގައި ހުންނަ ރާއްޖޭގެ އެމްބަސީތަކުގެ ސަފީރުންގެ މަހާސިއްތާ ފަށައިފި އެވެ.

މިރަސްމިއްޔާތު ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ އަބްދުﷲ ޔާމީން އެވެ.

މަހާސިންތާ ހުޅުވުމުގެ ރަސްމިއްޔާތުގައި ރައީސް ޔާމީން ދެއްކެވި ވާހަކަފުޅުގައި މައިގަނޑުގޮތެއްގައި ފާހަގަ ކުރައްވާފައި ވަނީ ރާއްޖޭގެ ފަތުރުވެރިކަން ޕްރޮމޯޓް ކުރުމާ ގުޅޭ ގޮތުންނާއި ފޮރިން އިންވެސްޓްމަންޓްތައް ޝައުގުވެރި ކުރުވުމުގެ މައްޗަށާއި ރާއްޖޭގައި ތަރައްގީގެ މަޝްރޫއުތައް ހިންގުމާއި ގުޅޭ ގޮތުގެ މައްޗަށެވެ. އަދި ރާއްޖޭގެ ހަމަޖެހުމާއި މިނިވަންކަން ދެމެހެއްޓުމުގެ މައްޗަށް ވެސް އެމަނިކުފާނުގެ ވާހަކަފުޅުގައި އަލިއަޅުވާލައްވާފައި ވެއެވެ.

ރައީސް ޔާމީން ވިދާޅުވީ ޑިމޮކްރެސީގެ އެންމެ މުހިއްމު ކަމަކީ ފަރުދުންގެ ހައްގުތައް ހިމާޔަތް ކުރުން ކަމަށެވެ. އަދި މިސަރުކާރަކީ ގާނޫނުތަކަށް ތަބާވާ ސަރުކާރެއް ކަމަށެވެ.

މި ރަސްމިއްޔާތުގައި ވާހަކަ ދައްކަވަމުން ފޮރިން މިނިސްޓަރ ޑރ. މުހައްމަދު އާސިމް ވިދާޅުވީ ދިވެހިން ދެކޭ ހުވަފެން ހަގީގަތަކަށް ހެދުމަށް ބޭރުގެ ގައުމުތަކާއެކު އެންމެން އެކުގައި މަސައްކަތް ކުރަންޖެހޭ ކަމަށެވެ.

މިރަސްމިއްޔާތުގައި ވާހަކަ ދައްކަވަމުން ޓޫރިޒަމް މިނިސްޓަރު މޫސާ ޒަމީރު ވިދާޅުވީ ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިސްތިހާރު ކުރުމަށް އެންމެ ބޮޑު ދައުރެއް އަދާކުރެވޭނެ ބަޔަކީ ބޭރުގައުމުތަކަށް ރާއްޖެއިން ކަނޑައަޅުއްވާފައިވާ ދިވެހި ސަފީރުން ކަމަށެވެ.

ފޮރިން މިނިސްޓްރީން މައުލޫމާތު ދިން ގޮތުގައި މަހާސިންތާ ކުރިއަށް ގެންދާނީ ބުދަ ދުވަހާއި ބުރާސްފަތި ދުވަހުގެ ނިޔަލަށެވެ.

ދިވެހި ސަފީރުގެ މަހާސިންތާއެއް އެންމެފަހުން ބާއްވާފައިވަނީ މީގެ 10 އަހަރު ކުރިންނެވެ. އެއީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި 2007 ވަނަ އަހަރު އެވެ.

ދިވެހި ސަފީރުންގެ މިއަހަރުގެ ޝިއާރަކީ "ޕްރޮމޯޓިންގ ޑެސްޓިނޭޝަން މޯލްޑިވްސް" އެވެ.

ފޮރިން މިނިސްޓްރީ ބުނީ މި މަހާސިއްތާގައި މައިގަނޑުގޮތެއްގައި ކުރިއަށްދާނީ ރާއްޖޭއަށް ދިމާވާ ގޮންޖެހުންތަކާއި، ދިމާވާ ކަންކަން ހައްލު ކުރުމުގައި އަމަލު ކުރާނެ ގޮތާއި ރާއްޖޭއާއި ބޭރުގެ ގައުމުތަކުގެ ގުޅުން ވަރުގަދަކޮށް، ފޮރިން އިންވެސްޓްމަންތަކާއި ޓޫރިސްޓުން ރާއްޖެއަށް އިތުރަށް ޝައުގު ކުރެވޭނެ ގޮތްތަކާއި ގުޅޭ މަޝްވަރާތައް ކަމަށެވެ.