ތިން ޤާޒީއަކު މަސައްކަތް ކުރާ ކޯޓު ބަދަލުކުރަން ނިންމައިފި
5 މާރިޗު 2019 | އަންގާރަ 14:48ޤާޟީ ބަދަލުކުރަން ނިންމީ އެބޭފުޅުންގެ ރުހުމާއެކު
ޖުޑީޝަލް ސަރވިސް ކޮމިޝަން
ސުޕީރިއަރ ކޯޓުތަކުގެ ފަނޑިޔާރުން ތެރެއިން ތިން ފަޑިޔާރަކު މަސައްކަތް ކުރައްވަމުން ދިޔަ ކޯޓު ނޫން އެހެން ކޯޓަކަށް ޖުޑިޝަލް ސަރވިސް ކޮމިޝަނުން ބަދަލު ކޮށްފިއެވެ.
ޖޭއެސްސީ އަންގާރަ ދުވަހު ކުރި އިއުލާނެއްގައި ބުނީ ތިން ފަޑިޔާރަކު ބަދަލުކުރުމަށް ނިންމީ 04 މާރޗް ވީ ހޯމަ ދުވަހު ބޭއްވި ބޭއްވި ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ކަމަށެވެ.
މިގޮތަށް ނިންމީ ދިވެހިރާއްޖޭގެ ފަޑިޔާރުންގެ ގާނޫނުގެ 48 ވަނަ މާއްދާގެ ދަށުން އެއް ކޯޓުން އަނެއް ކޯޓަށް ފަޑިޔާރުން ބަދަލުކުރުމަށް ޖުޑީޝަލް ސަރވިސް ކޮމިޝަނަށް ހުށަހެޅުމަކީ ދިވެހިރާއްޖޭގެ ސުޕްރީމްކޯޓުގެ ފަޑިޔާރުންގެ މަސްއޫލިއްޔަތުތަކަށް ވާތީ ދިވެހިރާއްޖޭގެ ސުޕްރީމްކޯޓުގެ ''ދަށު ކޯޓުތަކުގެ ފަޑިޔާރުން އެއްކޯޓުން އަނެއްކޯޓަށް ބަދަލުކުރުމާ ބެހޭ އުސޫލު''ގެ 04 ވަނަ މާއްދާގެ (ށ) އަދި (ބ) އަށް ރިޔާއަތްކޮށް ދިވެހިރާއްޖޭގެ ސްޕްރީމްކޯޓުގެ ފަޑިޔާރުންގެ މަޖިލީހުގެ އިއްތިފާގުން ނިންމާ އަދި މިގޮތަށް ބަދަލުކުރުމާ މެދު އެބޭފުޅުންގެ ރުހުން އޮތް ކަމަށް އަންގާފައިވުމާ ގުޅިގެން ކަމަށް ބަޔާނުގައި ވަނީ ބުނެފައެވެ.
އެގޮތުން ބަދަލުކުރުމަށް ކޮމިޝަނުން ނިންމާފައިވަނީ މިހާރު ފެމިލީ ކޯޓުގެ ޤާޒީކަމުގެ މަގާމުގައި ހުންނެވި މުހައްމަދު ސަމީރު ކްރިމިނަލް ކޯޓުގެ ޤާޒީ ކަމަށާއި، މިހާރު ފެމިލީ ކޯޓުގެ ޤާޒީކަމުގެ މަގާމުގައި ހުންނެވި އަހުމަދު ޝަކީލް ކްރިމިނަލް ކޯޓުގެ ޤާޒީ ކަމަށް އަދި މިހާރު ފެމިލީ ކޯޓުގެ ޤާޒީކަމުގެ މަގާމުގައި ހުންނެވި ހަސަން ޝަފީއު ސިވިލް ކޯޓުގެ ޤާޒީ ކަމަށެވެ.
