ފަސް އަހަރުގެ ދިގު ބަންދަކަށް ފަހު މިސްރުގެ ނޫސްވެރިޔާ ޝޯކާން ދޫކޮށްލައިފި

މިސްރުގެ މަޝްހޫރު ފޮޓޯ ޖާނަލިސްޓް މަހްމޫދް އަބޫ ޒެއިދް، ޖަލުގައި ފަސް އަހަރަށް ވުރެ ގިނަ ދުވަސް ހޭދަކުރުމަށް ފަހު މިނިވަންކޮށްފިއެވެ.

ޝޯކާންގެ ނަމުން މަޝްހޫރު ފޮޓޯގްރާފަރު ހައްޔަރު ކޮށްފައިވަނީ، އަސްކަރިއްޔާ އާއި ދެކޮޅަށް ބޭއްވި މުޒާހަރާއެއް ކަވަރު ކުރަން އުޅެނިކޮށެވެ. މިނިވަންވުމަށް ފަހު ޝޯކާން ކުރި ޓްވީޓެއްގައި އޭނާ ޖަހާފައިވަނީ "ހެލޯ އަސްފަލްޓް" މިހެންނެވެ. މި ބަސްކޮޅަކީ މިސްރުގެ ސިޔާސީ ހައްޔަރީން މިނިވަންވުމަށް ފަހު އާއްމުކޮށް ބޭނުންކުރާ ބަސްކޮޅެކެވެ.

މިސްރުގެ އަސްކަރިއްޔާއާއި މުހައްމަދު މުރްސީގެ ސަޕޯޓަރުންނާއި ދެމެދު 2013 ވަނަ އަހަރު ހިނގި ވަރުގަދަ ކުރިމަތިލުންތަކުގެ ތެރެއިން ޝޯކާން ހައްޔަރު ކުރުމަށް ފަހު ޝަރީއަތް ކޮށްފައިވަނީ އިތުރު 739 މީހުންނާއި އެކުގައެވެ. ނަމަވެސް އޭނާއަށް ހުކުމް އިއްވީ މިދިޔަ އަހަރުގެ ސެޕްޓެމްބަރު މަހުގެ ތެރޭގާއެވެ. ޝޯކާންއަށް އިއްވި ފަސް އަހަރުގެ ހުކުމް އޭނާ ޖަލުގައި ފަސް އަހަރު ހޭދަކޮށްފައި ވުމުން ވަނީ ތަންފީޒުކޮށް ނިމިފައިވާ ކަމަށް ކަނޑައަޅާފައެވެ.

ޝޯކާންއަށް މީހަކު ގަސްދުގައި މަރާލުމުގައި ބައިވެރިވި ކަމުގެ ތުހުމަތު ކުރުމުގެ އިތުރުން، ޓެރަރިސްޓް ޖަމާއަތެއްގައި ބައިވެރިވުމުގެ ތުހުމަތު ވެސް ކޮށްފައިވެއެވެ. ޝޯކާންއާ އެކު ހައްޔަރު ކުރި މީހުންގެ ތެރެއިން އިތުރު 214 މީހަކު ވެސް އޭނާއާ އެކު ދޫކޮށްލާފައިވެއެވެ.

މިސްރުގެ ވެރިކަމުގައި މިހާރު ހުންނެވި އަބްދުލް ފައްތާހް އަލް ސީސީގެ ރައީސްކަމުގައި އެ ގައުމުގެ ގިނަ އަދަދެއްގެ ނޫސްވެރިން ހައްޔަރުކޮށްފައިވާ ކަމަށް އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ވަނީ ބުނެފައެވެ. ސީސީ މިސްތުގެ ވެރިކަމާއި ހަވާލުވީ މުސްލިމް ބްރަދަރހުޑްގެ ވެރިކަން ނިމުމަކަށް ގެނައިތާ އަހަރެއް ފަހުންނެވެ. ސީސީއަކީ އަސްކަރިއްޔާއިން ބަގާވާތް ކުރި އިރު ސިފައިންގެ ވެރިޔާއެވެ.