މަސްއޫދު އަޒްހަރު މަރުވި ކަމަށް ދެކޭވެ ވާހަކަތައް ޕާކިސްތާނުން ދޮގުކޮށްފި

ޕާކިސްތާނުގެ ޖައޭޝް-އީ މުހައްމަދު ޖަމާއަތުގެ ލީޑަރު މައުލާނާ މަސްއޫދު އަޒްހަރު މަރުވިކަމަށް ދެކެވޭ ވާހަކަތައް ޕާކިސްތާނުން ދޮގު ކޮށްފިއެވެ.

އިންޑިއާގެ ނޫސްތަކުން އާދިއްތަ ދުވަހު ރިޕޯޓް ކޮށްފައިވާ ގޮތުން އިންޑިއާއިން ޕާކިސްތާނުގެ ބަލަކޮޓް އަށް ދިން ހަމަލާގައި މަސްއޫދު ވަނީ މަރާލާފައެވެ.

އެވާހަކަތައް ދޮގުކުރަމުން ޕާކިސްތާނުގެ އިސް އޮފިޝަލަކު މީޑިއާ ތަކަށް ދިން އިންޓަވިއުއެއްގައި ބުނީ ، އަޒްހަރު މަރުވީ ކަމަށް އިންޑިއާއިން ފަތުރަމުންދާ ހަބަރު ތަކަކީ ދޮގު ހަބަރުތަކެއް ކަމަށެވެ.

ޕާކިސްތާނުގެ ފޮރިން މިނިސްޓަރު ޝާހް މުހައްމަދު މީޑިއާތަކަށް މައުލޫމާތު ދެއްވަމުން ވިދާޅުވީ، އޭނާއަށް ލިބިފައިވާ މައުލޫމާތު ލިބިފައިވާ ގޮތުން އަޒްހަރު ހުރީ ޕާކިސްތާނުގައި ކަމަށެވެ. އެހެން ނަމަވެސް އޭނާގެ ހާލު ދެރަކަމަށާއި، ގެއިން ބޭރަށް ނިކުމެ އުޅެވޭވަރަށް ވުރެ މަސްއޫދުގެ ސިއްހަތު ގޯސް ކަމަށެވެ.

އިންޑިއާއިން ޕާކިސްތާނުގެ ބަލަކޮޓް ދިން ހަމަލާގައި އަޒްހަރު ޒަހަމްވެފައިވާ ކަމަށް ރިޕޯޓްތައް ބުނާއިރު ޕާކިސްތާނުން ވަނީ އެވާހަކަތައް ވެސް ދޮގުކޮށްފައެވެ.

އަޒްހަރު ނިސްބަތްވާ ޖައޭޝް-އީ މުހައްމަދު ޖަމާއަތަކީ ޓެރަރިސްޓް ޖަމާއަތެއްގެ ގޮތުގައި ގިނަ ގައުމުތަކުން ލިސްޓް ކޮށްފައިވާއިރު ޕާކިސްތާނުން އަޒްހަރު ހައްޔަރު ނުކޮށްގެން އުޅެނީ ކީއްވެގެންތޯ ނޫސްވެރިޔަކު ސުވާލުކުރުމުން ފޮރިން މިނިސްޓަރު މުހައްމަދު ވިދާޅުވީ، އަޒްހަރް އަކީ ދެކޮޅަށް އެކަށީގެންވާ ހެކި އިންޑިއާއިން ފޯރުކޮށްދީ އެ ހެއްކަކީ ޕާކިސްތާނުގެ ކޯޓުން ބަލައިގަންނަ ހެއްކަކަށްވާނަމަ އޭނާޔާ ދެކޮޅަށް ޝަރިޔަތް ހިންގާނެ ކަމަށެވެ.

ޕާކިސްތާނުން އަޒްހަރު ފޮރުވައިގެން އޭނާއަށް ހިމާޔަތް ދެމުންދާ ކަމަށް އިންޑިއާއިން ދަނީ ތުހުމަތު ކުރަމުންނެވެ.

އިންޑިއާ އާއި ޕާކިސްތާނުގެ ގުޅުން ގޯސްވެގެން މިއުޅެނީ އިންޑިއާގެ ކަޝްމީރުގައި ހަރަކާތްތެރިވަމުން ދިޔަ ޕެރެމިލިޓަރީ ސިފައިންނަށް އަމާޒުކޮށް ފެބްރުއަރީ މަހުގެ 14 ވަނަ ދުވަހު ދިން ހަމަލާއަށް ފަހުއެވެ. އެ ހަމާލައަށް ފަހު އިންޑިއާ ޕާކިސްތާނާއި ދެމެދު ވައިގެ މަގުން ވަނީ ހަމަލާތަކެއް ބަދަލުކޮށްފައެވެ.