ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ދެ ބިލެއްގެ މަސައްކަތް މާދަމާގެ ޖަލްސާއަށް އެޖެންޑާކޮށްފި އެވެ. 

ރައްޔިތުންގެ މަޖިލީހުގެ މާދަމާގެ ޖަލްސާގެ އެޖެންޑާ އާންމު ކޮށްފައިވާއިރު، މަޖިލީހަށް އަލަށް ތަޢާރަފްކުރާ ދެ ބިލެއްގެ މަސައްކަތް ކުރިއަށްގެންދިއުމަށް އެޖެންޑާ ކޮށްފައިވެއެވެ. އެގޮތުން ސަރުކާރުގެ ފަރާތުން، ކެޔޮދޫ ދާއިރާގެ މެންބަރު މޫސާ ނިޒާރު އިބްރާހީމް ހުށަހެޅި ޖަމިއްޔާތަކުގެ ބިލްގެ މަސައްކަތް މާދަމާގެ ޖަލްސާއަށް އެޖެންޑާ ކޮށްފައިވެއެވެ. 

އޭގެއިތުރުން ސަރުކާރުގެ ފަރާތުން، ކެޔޮދޫ ދާއިރާގެ މެންބަރު މޫސާ ނިޒާރު އިބްރާހީމް ހުށަހަޅުއްވާފައިވާ ކުޑަކުދިންގެ އަދުލުގެ ބިލްގެ މަސައްކަތް ވެސް ކުރިއަށް ގެންދިއުމަށް ވަނީ އެޖެންޑާކޮށްފަ އެވެ. 

ކުޑަކުދިންގެ އަދުލުގެ ބިލާއި، ޖަމިއްޔާތަކުގެ ބިލްގެ މަސައްކަތް ފަށާއިރު، މި ދެބިލަކީވެސް ސަރުކާރުގެ ވައުދުތަކުގެ ތެރޭގައި ހިމެނޭ ދެ ބިލް އެވެ. އެގޮތުން ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި، އިޖްތިމާއީ ރައްކާތެރިކަމުގެ ދަށުން ކުޑަކުދިންގެ ހައްޤުތައް ރައްކާތެރި ކުރުމަށް ރައީސް އިބްރާހިމް މުހައްމަދު ސޯލިހް ވައުދުވެވަޑައިގެންފައިވެއެވެ. އެއީ ސަރުކާރުގެ ފުރަތަމަ 30 ދުވަހުގެ ތެރޭގައި ފުއްދުމަށް ކަނޑައަޅާފައިވާ ވައުދެކެވެ. 

އޭގެއިތުރުން އިޖްތިމާއީ މަސައްކަތްތަކުގެ ތެރެއިން ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ޖަމިއްޔާތަކުގެ ޤާނޫނެއް މަޖިލީހަށް ހުށަހެޅުން ހިމަނާފައިވާއިރު، އެ ވައުދު ފުއްދުމަށް ކަނޑައަޅާފައިވަނީ ފުރަތަމަ 60 ދުވަހުގެ ތެރޭގައެވެ. 

މި ދެބިލްގެ މަސައްކަތުގެ އިތުރުން އިބްތިދާއީ ބަހުސް މަރުހަލާގައި ޤާނޫނުލް އުޤޫބާތަށް އިސްލާހު ގެނައުމުގެ މަސައްކަތް އެޖެންޑާ ކޮށްފައިވާއިރު، އިންތިހާބުތަކާއިބެހޭ އާންމު ޤާނޫނަށް ހުށަހަޅާފައިވާ އިސްލާހުގެ ބަހުސްވެސް ވަނީ އެޖެންޑާކޮށްފަ އެވެ.