ކޮކާކޯލާ ކޮމްޕެނީން ޕްރިމިއާ ލީގް ޕާރޓްނާޝިޕާއި ގުޅުވައިގެން ކުރިއަށް ގެންދާ ޕްރޮމޯޝަނުގެ ނަސީބުވެރިންނަށް އިނާމް ހަވާލްކުރުމުގެ ރައްސްމިއްޔާތު ބާއްވައިފިއެވެ.

ފުޓްބޯޅައަށް ސަޕޯޓްކުރާ މީހުނަށް ހާއްސަ ކޮށްގެން ކޮކާކޯލާއިން ކުރިއަށް ގެންދާ މިހަރަކާތަކީ، އިންގްލިޝް ޕްރިމިއާ ލީގްގެ ސްޕޮންސާއަކަށް ކޮކާކޯލާ ކޮމްޕެނީ ވެފައި ވާތީ އެކަން ފާހަގަ ކުރުމުގެ ގޮތުން ކުރިއަށް ގެންދާ ޕޮރޮމޯޝަންއެކެވެ.

މި ޕްރޮމޯޝަންގެ ދަށުން ހަތް ފަރާތަކަށް ޕްރިމިއާ ލީގް މެޗެއް ބަލާލުމަށް އިނގިރޭސި ވިލާތަށް ދިއުމަށް ދެކޮޅު ޓިކެޓްގެ އިތުރުން 30 ފަރާތަކަށް ސަމްސަންގް އެލްއީޑީ ޓީވީ ދިނުމަށް ވަނީ ހަމަޖެހިފައެވެ.

މި ހަރަކާތާއި ބެހޭ ގޮތުން މައުލޫމާތު ދެއްވަމުން ކޮކާކޯލާގެ ސައުތް ވެސްޓް އޭޝިއާ ރީޖަންގެ މާކެޓިން މެނޭޖަރ އަމަރަންތާ ޑުއްޓާ ވިދާޅުވީ، ކޮކާކޯލާ ކޮމްޕެނީއަކީ ފުޓްބޯޅައިގެ ގާތް އެކުވެރިއެއް ކަމަށާއި، ކޮކާކޯލާގެ ކަސްޓަމަރުންގެ ފަރާތުން މި ޕޮރޮމޯޝަންއަށް ހީނުކުރާވަރުގެ ބޮޑު ތަރުހީބެއް ލިބެމުންދާކަމަށެވެ.

އެ ބޭފުޅާ އިތުރަށް ވިދާޅުވީ، މި ޕޮރޮމޯޝަންގެ މައިގަނޑު މަގްސަދަކީ ޕްރިމިއާ ލީގް ޕާރޓްނާޝިޕާއި އެއްކޮށް ވީހާ ވެސް ގިނަބަޔަކު ފުޓުބޯޅައަށް ހިތްޖެއްސުން ކަމަށެވެ.

ހޮނިހިރު ދުވަހު ސިޓްރޮންގައި ބޭއްވި ހަފްލާގައި މިހާތަނަށް ގުރުއަތުން ހޮވިފައިވާ ދެ ފަރާތަކަށް ޓިކެޓާއި، ނުވަ ފަރާތަކަށް ޓީވީ ވަނީ ހަވާލު ކޮށްފައެވެ.

ކޮކާކޯލާ ޕޮރިމިއާލީގް ޕްރޮމޯޝަން 15 މާރޗްގެ ނިޔަލަށް ކުރިއަށް ދާނެ ކަމަށް ކޮކާކޯލާ ކޮމްޕެނީން މައުލޫމާތުދެއެވެ.

ކޮކާކޯލާ ކޮމްޕެނީން މީގެ ކުރިން ވަނީ 2014 ވަނަ އަހަރުގެ ފީފާ ވޯލްޑްކަޕާއި، 2016 ވަނައަހަރުގެ ޔޫރޯއާއި، 2018 ވަނަ އަހަރުގެ ފީފާ ވޯލްޑް ކަޕާއި ގުޅުވައިގެން ވެސް މިފަދަ ޕްރޮމޯޝަންތަކެއް ކުރިއަށް ގެންގޮސްފައެވެ.