އެމްޑީޕީގެ ކެންޑިޑޭޓުން ތައާރަފްކުރުމަށް ބިލްބޯޑާއި ޕޯސްޓަރު ހަރުކުރަން ފަށައިފި
2 މާރިޗު 2019 | ހޮނިހިރު 09:40މާލޭގެ 16 ދާއިރާގައި އެ މަސައްކަތް ކުރިއަށްދާނެ
ރައީސް ނަޝީދު ބިލްބޯޑު ހަރުކުރައްވަނީ
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ކެންޑިޑޭޓުން ތައާރަފްކުރުމާއި އެޖެންޑާ 19އިގެ ބިލްތައް ތައާރަފްކުރުމަށް ބިލްބޯޑާއި ޕޯސްޓަރ ހަރުކުރަން ފަށައިފިއެވެ.
ހޮނިހިރު ދުވަހުގެ ހެނދުނު 8:30 ގައި ފެށި މި ހަރަކާތުގައި މާލޭގެ 16 ދާއިރާގައި އެ މަސައްކަތް ކުރިއަށްދާނެ ކަމަށް އެ ޕާޓީން ބުނެއެވެ.
ބިލްބޯޑާއި ޕޯސްޓަރ ހަރުކުރުމުގެ އެންމެ އިސްކޮށް އުޅުއްވަނީ ކުރީގެ ރައީސް އަދި މައްޗަންގޮޅި މެދު ދާއިރާގެ ކެންޑިޑޭޓް މުހައްމަދު ނަޝީދެވެ.
ރާއްޖެއެމްވީއަށް ރައީސް ނަޝީދު ވިދާޅުވީ އެ ޕާޓީގެ އެޖެންޑާ 19 ގައި ހިމެނެނީ 19 ގާނޫނީ އޮނިގަނޑު ކަމަށާއި ކޮންމެ އޮނިގަނޑެއްގެ ތެރޭގައި އިތުރު ބިލްތައް ހިމެނޭ ކަމަށެވެ. އެ ބިލްތަކުގެ ތެރެއިން އެންމެ މުހިއްމީ ރާއްޖޭގެ ރައްޔިތުންގެ ބޯހިޔާވަހިކަމުގެ ވާހަކަ ކަމަށް ވިދާޅުވިއެވެ.
"މިވަގުތު ރާއްޖޭގައި ހުރީ 45،000 ގެ. އެގެއަކީ ރާއްޖޭގެ ރައްޔިތުންނަށް ދިރިއުޅެވޭނެ ގެތަކެއް ނޫން. ގެއެއްގެ މައްޗަށް 10-12 މީހުން އެބަޖެހޭ. ވަރަށް ބޮޑު އަމާޒެއް އެއީ ބޯހިޔާވަހިކަން ރާއްޖޭގެ ރައްޔިތުންނަށް ހޯދުން. އެކަމުގައި އަޅުގަނޑުމެންކުރަންޖެހުނު ހުރިހާ ކަމެއް ކުރާނަން،" ނަޝީދު ވިދާޅުވިއެވެ.
ނަޝީދު ވިދާޅުވީ ހޮނިހިރު ދުވަހު މާލޭގައި އެމަސައްކަތް ފެށިކަމުގައި ވިއަސް ހުރިހާ ރަށެއްގައި ވެސް ބިލްބޯޑު ހަރުކުރުމުގެ މަސައްކަތް ކުރައްވާނެ ކަމަށެވެ. އަދި އެމަނިކުފާނު އެދެނީ އެޕާޓީ އަށް އަޣުލަބިއްޔަތު ލިބުން ކަމަށް ވިދާޅުވިއެވެ.
