އެމްބީއޭ ޗެމްޕިއަންޝިޕް: ފިރިހެން ޑިވިޝަންގެ ޗެމްޕިއަންކަން ކިންގްސް ބީސީ ހޯދައިފި

ރެޕްޓާރސް ބީސީ ބަލިކޮށް އެމްބީއޭ ޗެމްޕިއަންޝިޕް ކިންގްސް ބީސީން ކާމިޔާބުކޮށްފިއެވެ.

ކިންގްސް ބީސީން މެޗު ކާމިޔާބުކުރީ 100 ޕޮއިންޓް، 58 ޕޮއިންޓުންނެވެ.

މުބާރާތުގައި ކުޅުނު އެއްވެސް މެޗަކުން ބަލިނުވެ، މުބާރާތް ކާމިޔާބުކުރި ކިންގްސް ބީސީ ފައިނަލް މެޗުގެ ފުރަތަމަ ކުއާޓާ ކާމިޔާބުކުރީ، 26 ޕޮއިންޓް ކާމިޔާބުކޮށްގެންނެވެ. މި ކުއާޓާގައި ރެޕްޓާރސް ބީސީއަށް ކާމިޔާބުކުރެވުނީ 10 ޕޮއިންޓެވެ.

މެޗު ފެށިގެން ބޯޅަ ކޮންޓްރޯލް ކޮށްގެން ރަނގަޅަށް ކުޅެމުންއައީ ކިންގްސް ބީސީންނެވެ. ރަނގަޅަށް ޑިފެންސް ކުރުމާއިއެކު ފުލުފުލުގައި ސްކޯކޮށް ކިންގްސް ބީސީ ބޮޑު ލީޑެއް ނެގިއެވެ.

ދެވަނަ ކުއާޓާގައި ކިންގްސް ބީސީން 24 ޕޮއިންޓް ކާމިޔާބުކުރިއިރު، ރެޕްޓާރސްއަށް ކާމިޔާބު ކުރެވުނީ 11 ޕޮއިންޓެވެ.

ރެޕްޓާރސްގެ ކުޅުން ރަނގަޅުކޮށް ތިންވަނަ ކުއާޓާގައި ލީޑް ކުޑަކުރުމަށް މަސައްކަތް ކުރިއެވެ. މި ކުއާޓާގައި ކިންގްސް ބީސީ 23 ޕޮއިންޓް ކާމިޔާބުކުރިއިރު، ރެޕްޓާރސް ވަނީ 16 ޕޮއިންޓް ކާމިޔާބުކޮށްފައެވެ.

މެޗުގެ ފަހު ކުއާޓާގައި ދެ ޓީމުގެ ފަރާތުންވެސް ވަރުގަދަ ކުޅުމެއް ފެނިގެން ދިޔައެވެ. މި ކުއާޓާގައި 27 ޕޮއިންޓް ހޯދާ 100 ޕޮއިންޓާއި އެއްކޮށް ކިންގްސް މެޗު ކާމިޔާބުކުރިއިރު، މެޗުގެ ފުރިހަމަ ވަގުތު ހަމަވިއިރު ރެޕްޓާރސްއަށް ކާމިޔާބު ކުރެވުނީ 58 ޕޮއިންޓެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ ކިންގްސް ބީސީއަށް 21 ޕޮއިންޓް ހޯދައިދިން އަބްދުއްﷲ އަމްޒަރު މުހައްމަދެވެ.

މުބާރާތުގެ އެންމެ މޮޅި ކުޅުންތެރިޔާގެ މަގާމު ވެސް ހޯދީ އަބްދުއްﷲ އަމްޒަރު މުހައްމަދެވެ.

މުބާރާތުގެ ފިރިހެން ޑިވިޝަންގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ ޓީރެކްސް ބާސްކެޓްބޯޅަ ކްލަބުގެ އިބްރާހިމް ނަސީމް، އަހުމަދު ހުޝާމް އަދި ހުސައިން ޙަލީމްގެ އިތުރުން ކިންގްސް ބާސްކެޓްބޯޅަ ކްލަބުގެ އަހުމަދު ފިރާޝް އާއި ރެޕްޓާސް ބާސްކެޓްބޯޅަ ކްލަބުގެ މަފާޒު މުހައްމަދެވެ.