އެމްޑީޕީގެ މަސްލަހަތަކީ ރައްޔިތުންގެ ހައްގުތައް ހޯދައިދިނުން : ރައީސް ނަޝީދު
އެމްޑީޕީ މެމްބަރުން އިންތިހާބުކޮށްގެން ނޫނީ ރައްޔިތުން އެދޭ ކަންތައްތައް ހާސިލް ނުވާނެކަން ރައްޔިތުންނަށް ސާފުވެއްޖެ
ފެހެންދޫގައި ޖަގަހަ ހުޅުއްވައިދެއްވަނީ
އެމްޑީޕީގެ މަސްލަހަތަކީ ރައްޔިތުންގެ ހައްގުތައް ހޯދައިދިނުން ކަމަށާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުތަކަކީ ރައްޔިތުންގެ ކައިރީގައި ބޭނުންވާ ކަންތައްތައް އެއްސެވުމަށް ފަހު އެނގިތިބެ ވެފައިވާ ވައުދުތައް ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޓިކެޓްގައި 19 ވަނަ ރައްޔިތުންގެ މަޖިލީހަށް ތުޅާދޫ ދާއިރާއިން ވާދަކުރައްވާ ހިސާން ހުސެއިންގެ ކެމްޕެއިންގައި ބައިވެރިވެވަޑައިގެންނެވުމަށް ބ. އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅުގެ ފެހެންދޫގެ ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް ނަޝީދު ވިދާޅުވީ ރާއްޖޭގެ ރައްޔިތުން ވެރިކަން ބަދަލުކުރީ ވައްކަން ހުއްޓުވުމަށާއި ރާއްޖޭގެ ކުރީގެ ރައީސް ހިމެނިވަޑައިގެން ހިންގެވި ހުރިހާ ވައްކަމެއް ތަހުގީގު ކުރުމުގެ އިތުރުން ގޮތް ނޭނގި މީހުން މަރުވަމުން ދާއިރު އެ މަރުތަކުގެ ހަގީގަތް ރައްޔިތުން އެނގެން ބޭނުން ވާތީ ކަމަށެވެ.
" ރާއްޖޭގެ ރައްޔިތުން ވެރިކަން ބަދަލު ކުރި އެންމެ މުހިއްމު އެއްސަބަބަކީ ވައްކަން ހުއްޓުވަން ރާއްޖޭގެ ރައްޔިތުން ވެރިކަން ބަދަލުކުރީ ރާއްޖޭގެ ވެރިކަމުގެ ފަރާތުން ރައީސުލް ޖުމްހޫރިއްޔާ ހާއްސަކޮށް ހިމެނި ވަޑައިގަންނަވައިގެން ހިންގަމުން އެގެންދެވިހާ ވައްކަން ތަހުގީގު ކުރުމަށް ، ރާއްޖޭގެ ރައްޔިތުން ވެރިކަން ބަދަލުކުރީ މީހުން މަރުވަމުންދާއިރުގައި އެ މަރުތަކަށް ވާގޮތް ރައްޔިތުން އެނގެން ބޭނުންވާތީ، ރާއްޖޭގެ ރައްޔިތުން ވެރިކަން ބަދަލުކުރީ ތަނަވަސް ދިރިއުޅުމެއް ހޯދުމަށް " ރައީސް ނަޝީދު ވިދާޅުވިއެވެ.
އެގޮތުން އެ ތަހުގީގުތައް ހިންގުމަށް އެހީތެރިވެދިނުމަކީ ރައްޔިތުންގެ މަޖިލީހުގެ މެމްބަރުންގެ މަސްއޫލިއްޔަތެއް ކަމަށާއި މިހާރު ހިނގަމުންދާ ކަންތައްތަކުން ވެސް އެމްޑީޕީ މެމްބަރުން އިންތިހާބުކޮށްގެން ނޫނީ އެކަން ނުވާނެކަން ރައްޔިތުންނަށް ސާފުވެފައިވާ ކަމަށް ރައީސް ނަޝީދު ވަނީ ވިދާޅުވެފައެވެ. އަދި އެމްޑީޕީ އިއްތިހާދުވީ ރައްޔިތުން އެދޭ ކަންތައްތައް ފުއްދުމަށްޓަކައި ކަމަށާއި މިއަދު އެ އިއްތިހާދަކުން ރައްޔިތުން އެދޭ ކަންތައްތަކަށް މަޖިލީހުގައި ވޯޓް ލަމުންދާތަން ނުފެންނަ ކަމަށް ވެސް ރައީސް ނަޝީދު ވިދާޅުވިއެވެ.
" އައްޑޫއިން ކެލައަށް ހަރު އަޑުން ބުނަމުން ދާ އަޑު އަޅުގަނޑުމެންނަށް އެބަ އިވޭ ، ރަންރީނދޫ ކުލައިން މަޖިލީހުގެ ގޮނޑިތައް ފަވާލެވުނީމައި ނޫނިއްޔާ ރައްޔިތުންގެ ތި އުންމީދުތައް ހަގީގަތަކަށް ވެގެން ނުދާނެ " ރައީސް ނަޝީދު ވިދާޅުވިއެވެ.
މީގެއިތުރުން ރައީސް ނަޝީދު ވިދާޅުވީ އެމްޑީޕީގެ މަސްލަހަތަކީ ރައްޔިތުންގެ ހައްގުތައް ހޯދައިދިނުން ކަމަށާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުތަކަކީ ރައްޔިތުންގެ ކައިރީގައި ބޭނުންވާ ކަންތައްތައް އެއްސެވުމަށް ފަހު އެނގިތިބެ ވެފައިވާ ވައުދުތައް ކަމަށެވެ. އަދި އެ ވައުދުތަކަކީ ރަނުން ރަނަށް ފުއްދައިދޭނެ ވައުދުތަކެއް ކަމަށް ވެސް ނަޝީދު ވިދާޅުވިއެވެ.
