މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެންޑިޑޭޓުންގެ ނަންތައް ތަރުތީބު ކުރުމަށް ގުރުއަތުލުން ބާއްވާ ގަޑިތައް އިލެކްޝަންސް ކޮމިޝަނުން އާންމުކޮށްފިއެވެ.

އިލެކްޝަންސް ކޮމިޝަނުންގެ އިއުލާނެއްގައި ބުނެފައިވަނީ އަންނަ އޭޕްރީލް މަހުގެ ހަވަނަ ދުވަހު ބާއްވާ މަޖިލިސް އިންތިޚާބުގައި ވާދަކުރާ ކެންޑިޑޭޓުންގެ ނަންތައް ތަރުތީބު ކުރުން މާޗު މަހުގެ ހަތަރެއްވާ ހޯމަ ދުވަހުން ފަސް ވަނަ ދުވަހުގެ ނިޔަލަށް ކުރިއަށްދާނެ ކަމަށެވެ.

އެގޮތުން ހއ.އަތޮޅާއި، ހދ.އަތޮޅާއި، ށ.އަތޮޅާއި، ނ.އަތޮޅުގެ ދާއިރާތަކުގެ ކެންޑިޑޭޓުންގެ ނަންތައް ތަރުތީބު ކުރުމަށް ބާއްވާ ގުރުއަތުނެގުން މާޗް ހަތަރުވަނަ ދުވަހުގެ ރޭ 20:30 އިން 21:30 އަށް އޮންނާނެ ކަމަށެވެ.

ރ.އަތޮޅާއި، ބ.އަތޮޅާއި، ޅ.އަތޮޅާއި، ކ.އަތޮޅާއި، އއ.އަތޮޅާއި، އދ.އަތޮޅުގެ ދާއިރާތަކުގެ ކެންޑިޑޭޓުންގެ ނަންތައް ތަރުތީބު ކުރުމަށް  ގުރުއަތުނެގުން އޮންނާނީ މާޗް ހަތަރުވަނަ ދުވަހުގެ ރޭ 21:45 އިން 22:45 އަށެވެ.

ވ.އަތޮޅާއި، މ.އަތޮޅާއި، ފ.އަތޮޅާއި، ދ.އަތޮޅާއި، ތ.އަތޮޅާއި ލ.އަތޮޅުގެ ދާއިރާތަކުގެ ކެންޑިޑޭޓުންގެ ނަންތައް ތަރުތީބު ކުރުމަށްޓަކައި ބާއްވާ ގުރުއަތުނެގުން އޮންނާނީ މާޗް ހަތަރުވަނަ ދުވަހުގެ ރޭ 23:30 އިން 00:30 އަށެވެ.

މީގެ އިތުރުން މާޗް 05 ވަނަ ދުވަހުގެ 13:00 އިން 14:00 އަށް ގއ.އަތޮޅާއި، ގދ.އަތޮޅާއި، ފުވައްމުލަކު ސިޓީ އާއި އައްޑޫ ސިޓީގެ ދާއިރާތަކުގެ ކެންޑިޑޭޓުންގެ ނަންތައް ތަރުތީބު ކުރުމަށް ގުރުއަތުނެގުން އޮންނާނެ ކަމަށެވެ.

އަދި މާލޭ ސިޓީގެ ދާއިރާތަކުގެ ކެންޑިޑޭޓުންގެ ނަންތައް ތަރުތީބު ކުރުމަށް މާޗް ފަސްވަނަ ދުވަހުގެ 14:30 އިން 15:30 އަށް ގުރުއަތު ނެގުން އޮންނާނެ ކަމަށް ވެސް އިލެކްޝަންގެ ބަޔާނުގައި ވަނީ ބުނެފައެވެ.

އިލެކްޝަން ކޮމިޝަނުން ބުނީ އިންތިޚާބުގައި ވާދަކުރާ ކެންޑިޑޭޓުން ކަނޑައެޅިފައިވާ ގަޑިއަށް އިންތިޚާބާ ބެހޭ މަރުކަޒަށް ވަޑައިގެންދެއްވުން އެދޭކަމަށެވެ. ކެންޑިޑޭޓަށް ހާޒިރުވެވެން ނެތްނަމަ، ކެންޑިޑޭޓުގެ ފަރާތުން ބަދަލުގައި ވަޑައިގަންނަވާ ބޭފުޅެއް ބަޔާންކޮށް، ކެންޑިޑޭޓުގެ ސިޓީއަކާއެކު ހުށަހެޅުމަށް އެދޭ ކަމަށް ކޮމިޝަނުން ބުންޏެވެ.