ސޮސިއެޑާޑުގެ ޑިފެންޑަރު ލޮރެންޓޭ ލީޑްސްއަށް

ރެއާލް ސޮސިއެޑާޑަށް ކުޅެމުން އައި ސްޕެއިންގެ ޑިފެންޑަރު ޑިއޭގޯ ލޮރެންޓޭ ލީޑްސް ޔުނައިޓެޑަށް ބަދަލުވެއްޖެއެވެ.

އުމުރުން 27 އަހަރުގެ ޑިފެންޑަރު ލީޑްސްއާ ގުޅުނީ ހަތަރު އަހަރުގެ އެއްބަސްވުމެއްގެ ދަށުންނެވެ. ލީޑްސްއިން ލޮރެންޓޭގެ ސޮއި ހޯދުމަށް ކުރި ޚަރަދުގެ ތަފުސީލު ހާމަކޮށްފައި ނުވި ނަމަވެސް، ރިޕޯޓުތައް ބުނާ ގޮތުން ލީޑްސްއިން ވަނީ ލޮރެންޓޯ ހޯދުމަށް 20 މިލިޔަން ޔޫރޯގެ ފީއެއް ދައްކާފައެވެ.

މީގެ ކުރިން ރެއާލް މެޑްރިޑަށްވެސް ކުޅުނު ލޮރެންޓޭ ވަނީ ސޮސިއެޑާޑުގައި ތިން އަހަރު ހޭދަކޮށްފައެވެ. އަދި އޭނާ ވަނީ ސޮސިއެޑާޑަށް 77 މެޗު ކުޅެދީފައެވެ.

ސްޕެއިންގެ ގައުމީ ފުޓްބޯޅަ ޓީމުންވެސް ޖާގަ ހޯދާފައިވާ ލޮރެންޓޭ އަކީ މި ޓްރާންސްފާ ބާޒާރުގައި ލީޑްސްއިން ގެނަ ހަތްވަނަ ކުޅުންތެރިޔާއެވެ. މީގެ ކުރިން ލީޑްސްއިން ވަނީ ވެލެންސިއާއަށް ކުޅެމުން އައި ސްޕެއިނުގެ ފޯވާޑް ރޮޑްރިގޯ މޮރޭނޯވެސް އެޓީމަށް ގެނެސްފައެވެ.

މިދިޔަ ސީޒަނުގެ އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ކާމިޔާބުކޮށް، 16 އަހަރަށް ފަހު އަލުން އިނގިރޭސި ޕްރިމިއާ ލީގުން ޖާގަ ހޯދިއިރު، އެ ޓީމުގެ އާޖެންޓީނާގެ ކޯޗު މާސެލޯ ބިއެލްސާގެ އެއްބަސްވުން ދާދި ފަހުން ވަނީ އާކޮށްފައެވެ. ބިއެލްސާގެ އިރުޝާދުގެ ދަށުން ޕްރިމިއާ ލީގުގައި ލީޑްސްއިން އަންނަނީ ރަނގަޅު ކުޅުމެއް ދައްކަމުންނެވެ.

މީގެ ކުރިން އިނގިރޭސި ފުޓްބޯޅައިގެ ވަރުގަދަ ބާރެއްގެ ގޮތުގައި އޮތް ލީޑްސް ދެވަނަ ޑިވިޝަނަށް ރެލިގޭޓްވީ 2004 ވަނަ އަހަރުއެވެ. މީގެ ކުރިން ލީޑްސްއިން ވަނީ ތިން ފަހަރެއްގެ މަތިން ފުރަތަމަ ޑިވިޝަނުގެ ޗެމްޕިއަންކަން ހޯދާފައެވެ. އަދި ވަނީ 2001 ވަނަ އަހަރުގެ ޔުއެފާ ޗެމްޕިއަންސް ލީގުގެ ސެމީ ފައިނަލުގައިވެސް ކުޅެފައެވެ.