ބޭރުގެ ސަފީރުންގެ ގޮތުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ކަނޑައެޅުއްވި ތިން ބޭފުޅަކަށް މަޖިލީހުން ރުހުން ދީފިއެވެ.

މަޖިލީހުން ރުހުން ދީފައި ވަނީ ތައިލެންޑްގެ ސަފީރުކަމަށް މުހައްމަދު ޖިނާހު އާއި ސައުދީ އަރަބިއްޔާގެ ސަފީރުކަމަށް މުހައްމަދު ޚަލީލް އަދި ޗައިނާގެ ސަފީރުކަމަށް އައިޝަތު އަޒީމާއެވެ. 

މީގެ ތެރެއިން ޖިނާހް އާއި ޚަލީލް އަށް ރުހުން ދޭން ނުފެންނަ ކަމަށް މިދިޔަ އަހަރުގެ ޑިސެމްބަރުމަހު 13 ވަނަ ދުވަހު ބޭއްވި ގައުމީ ސަލާމަތާ ބެހޭ ކޮމިޓީގެ ބައްދަލުވުމުގައި ނިންމާފައި ވެއެވެ. ޖިނާހް އާއި ހަލީލްއަށް ރުހުން ދޭން ފެންނަ ކަމަށް ކޮމިޓީން ނިންމާފައި ވަނީ ކުރިން އެ ދެ ބޭފުޅުންނާއި ގުޅޭ ގޮތުން، ކޮމިޓީއަށް ފާހަގަކުރެވުނު ދަރަނީގެ މައްސަލައެއް ނިންމާފައިވާކަން މަޖިލީހުގެ ރައީސް ގާސިމް އިބްރާހިމް ކޮމިޓީއަށް އެންގެވުމާ ގުޅިގެންނެވެ. އެ ދެ ބޭފުޅުންގެ މައްސަލަ އަލުން މުރާޖައާކޮށް ރުހުން ދޭން ފެންނަ ކަމަށް އެ ކޮމިޓީން ނިންމާފައި ވަނީ އާދީއްތަ ދުވަހުއެވެ.

ސަފީރުކަމަށް އައްޔަނުކުރުމަށް ސަރުކާރުން ހުށަހަޅާފައިވާ އަށް ބޭފުޅަކަށް މަޖިލީހުން ކުރިން ވަނީ ރުހުން ދީފައެވެ. އެއީ ރާއްޖޭގެ ފަރާތުން އދ. ގައި ހުންނަވާ ދާއިމީ މަންދޫބަކަށް، އަދި އެމެރިކާގައި ހުންނަވާ ދިވެހި ސަފީރަކަށް ތިލްމީޒާ ހުސައިން، ބްރަސަލްސްގައި ހުންނަވާ ދިވެހި ސަފީރަކަށް ހަސަން ސޯބިރު، އިންޑިއާގައި ހުންނަވާ ދިވެހި ސަފީރަކަށް އާއިޝަތު މުހައްމަދު ދީދީ، ސްރީލަންކާގައި ހުންނަވާ ދިވެހި ސަފީރަކަށް އުމަރު އަބްދުއްރައްޒާގް، ސިންގަޕޫރުގައި ހުންނަވާ ދިވެހި ސަފީރަކަށް ޑރ. އަބްދުﷲ މައުސޫމް، ޖަރުމަނުގައި ހުންނަވާ ދިވެހި ސަފީރަކަށް އަހުމަދު ލަތީފް، އިނގިރޭސިވިލާތުގައި ހުންނަވާ ދިވެހި ސަފީރަކަށް ޑރ. ފަރަހަނާޒް ފައިސަލް އަދި މެލޭޝިއާގައި ހުންނަވާ ދިވެހި ސަފީރަކަށް ވިސާމް އަލީއެވެ.