ތިން ވަނަ ފަހަރަށް އެޖެންޑާ ކުރުމުން ވެސް ރިޔާސީ ކޮމިޝަންތަކުގެ ބިލް ފާހެއް ނުކުރެވުނު

ހިޔަނާތާއި ފަސާދައިގެ މައްސަލަތައް ތަހުގީގު ކުރުމަށް އުފައްދާފައިވާ ރިޔާސީ ކޮމިޝަނާއި މަރުތައް ބެލުމަށް އުފައްދާފައިވާ ކޮމިޝަނަށް ބާރު ދިނުމުގެ ބިލު ފާސްކުރަން ތިން ވަނަ ފަހަރަށް އެޖެންޑާކުރުމުން ވެސް މަޖިލީހުން ފާހެއް ނުކުރެވުނެވެ.

އަންގާރަދުވަހުގެ މަޖިލިސް ޖަލްސާގައި ކޮމިޝަންތަކުގެ ބިލް ފާސްނުކޮށް މަޖިލިސް ނިންމާލާފައި ވަނީ، ފާސްކުރަން ބޭނުންވާ މިންވަރަށް ކޯރަމް ނެތުމާއި ގުޅިގެންނެވެ. މަޖިލީހުގެ ޖަލްސާއަށް ހާޒިރުވެ، އަންގާރަ ދުވަހުގެ ޖަލްސާގައި ވޯޓުގައި ބައިވެރިވެވަޑައިގެންނެވީ 36 މެމްބަރުންނެވެ.

ރިޔާސީ ކޮމިޝަންތަކަށް ބާރު ދިނުމުގެ ބިލު މަޖިލީހުން ފާސްކުރެވޭނީ މަޖިލީހުގެ 85 މެމްބަރުންގެ ތެރެއިން 43 މެމްބަރުން ވޯޓުގައި ބައިވެރިވެވަޑައިގެންނެވެ. ނަމަވެސް އެ ބިލު ފާސްކުރަން މިހާތަނަށް ވޯޓަށް އެހި ކޮންމެ ފަހަރަކު އެ އަދަދަށް މެމްބަރުން ތަޅުމަށް ހާޒިރުވެ، ވޯޓުގައި ބައިވެރިވެފައެއް ނުވެއެވެ.

އެގޮތުން އެ ބިލު ފާސްކުރަން އެންމެ ފުރަތަމަ އެޖެންޑާ ކުރީ މިދިޔަ އަހަރުގެ ޑިސެމްބަރު މަހުގެ 15 ވަނަ ދުވަހުއެވެ. އަދި ހޯމަ ދުވަހުގެ ޖަލްސާއަށް އެޖެންޑާކުރުމުން ވެސް އެ އަދަދަށް މެމްބަރުން ތަޅުމަށް ހާޒިރުވެފައެއް ނުވެއެވެ.

ސާޅީސްތިން މެމްބަރުން ވޯޓުގައި ބައިވެރިނުވެގެން ރިޔާސީ ކޮމިޝަންތަކުގެ ބިލު މަޖިލީހުން ފާސްނުކުރެވިވާއިރު، ގުޅިފައިވާ ޕާޓީތަކުގެ ޕާލަމެންޓްރީ ގްރޫޕުގެ މެމްބަރުންގެ އަދަދު 47 އަށް އަރައެވެ.

ސަރުކާރަށް ތާއިދު ކުރާ މެމްބަރުން ވޯޓުގައި ބައިވެރިވެވަޑައިނުގަންނަވާ މައްސަލާގައި ޖޮއިންޓް ޕާލަމެންޓްރީ ގްރޫޕުގެ ލީޑަރު އަބްދުﷲ ރިޔާޒު ވިދާޅުވީ އެ ބޭފުޅުން އެ ބިލު ފާސްކުރާ ވޯޓުގައި ބައިވެރިވުމަށް ދެކޮޅު ހައްދަވަނީ ކޮރަޕްޝަނާއި ފަސާދައިގައި ބައެއް މެމްބަރުން ޖެހިވަޑައިގެންފައި ވާތީ ކަމަށް ގަބޫލުކުރައްވާ ކަމަށެވެ.

ރިޔާޒު އެގޮތަށް ވިދާޅުވެފައިވާއިރު، ރައީސް ސޯލިހު ރައީސުލްޖުމްހޫރިއްޔާކަމުގެ ހުވާ ކުރެއްވުމާ އެކު ޕީޕީއެމްގެ ބައެއް މެމްބަރުން ވަނީ އެ ޕާޓީ ދޫކުރައްވައި، ޖޭޕީއާ ގުޅިވަޑައިގެންފައެވެ. ޕީޕީއެމްގެ ގިނަ މަޖިލިސް މެމްބަރުންތަކެއް ޖޭޕީއާ ގުޅިވަޑައިގެންނެވުމުން އެ ޕާޓީގެ މެމްބަރުންގެ އަދަދު ވަނީ 22 އަރާފައެވެ. ޖޭޕީއަކީ މިހާރު މަޖިލީހުގެ މައިނޯރިޓީ ޕާޓީއެވެ.

ރިޔާސީ ކޮމިޝަނަށް ބާރު ދިނުމުގެ ބިލު މަޖިލީހުން ފާސްނުކުރެވިވާއިރު، ޕެންޝަން ފައިސާއިން ހައްޖަށް ދެވޭ ގޮތަށް ގާނޫނަށް ހުށަހެޅި އިސްލާހު ވެސް ފާސްނުކުރެވި ލަސްވެގެން ދަނީ 43 މެމްބަރުން ބޯޓުގައި ބައިވެރިވެވަޑައިނުގަންނަވާތީއެވެ.

ގާނޫނުއަސާސީގެ 87 ވަނަ މާއްދާގައި ބުނެފައި ވަނީ ރައްޔިތުން އެ މައްޗަށް އަމަލު ކުރުން ލާޒިމް ކުރާ އެއްވެސް ކަމެއް ރައްޔިތުންގެ މަޖިލީހުން ފާސްރުމަށްޓަކާ ވޯޓަށް އަހާންވާނީ އެ މަޖިލީހުގެ ޖުމްލަ މެމްބަރުންގެ ދެބައިކުޅައެއްބަޔަށް ވުރެ ގިނަ މެމްބަރުން އެ ވޯޓެއް ނަގާ ޖަލްސާގައި ހާޒިރުވެ ތިބޭ ވަގުތެއްގައެވެ.