އަބަދުވެސް ފެންނަނީ ސުޕްރީމް ކޯޓުން އިންތިހާބުތަކަށް ނުފޫޒު ފޯރުވާތަން: އެމްޑީޕީ

ސުޕްރީމް ކޯޓާ ދޭތެރޭގައި ރައްޔިތުންގެ އިތުބާރު އުފެއްދުމުގެ މުހިއްމުކަމާމެދު ވާހަކަ ދައްކާއިރު އަބަދު ވެސް ފެންނަނީ ސުޕްރީމް ކޯޓުން އިންތިހާބުތަކަށް ނުފޫޒު ފޯރުވާތަން ކަމަށް އެމްޑީޕީން ބުނެފިއެވެ.

އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް ވިދާޅުވީ، އިންތިހާބުގައި އެކި ދާއިރާތަކުން ވާދަކުރާ ކެނޑިޑޭޓުންގެ މެދުގައި ޕްރައިމަރީއެއް ބޭއްވި ހަމައެކަނި ޕާޓީއަކީ އެމްޑީޕީ ކަމަށާއި، ސުޕްރީމް ކޯޓުގެ ނިންމެވުން ސީދާ އަމާޒުވަނީ އެމްޑީޕީއަށް ކަމަށެވެ.

" ޕްރައިމަރީއެއް މިހާ ހިސާބަށް ބާއްވާފައި އޮތީ އެމްޑީޕީން. އެހެން ކަމުން ޕްރައިމަރީއަށް ކުރިމަތިލާ އަދި ބަލިވި ކެނޑިޑޭޓުންނަށް އެކަނި ކެނޑިޑެސީ ފޯމް ހުށައެޅުން މިއޮތީ 4 މާރޗްއާ ހަމައަށް ހުޅުވާލެފިވަ. މީ ސީދާ އެމްޑީޕީއަށް އަމާޒުކުރެވި ކޮށްފައިވާ ކަމެއްކަން ، ނިންމާފައިވާ ނިންމުމެއްކަން އަޅުގަނޑުމެން އަނެއްކާވެސް ފާހަގަކޮށްލަން. އަދި އިއްޔެ ރައީސް ނަޝީދުވެސް ފާހަގަކުރައްވާފައިވާ ފަދައިން ސުޕްރީމް ކޯޓާ ދޭތެރޭގައި ރައްޔިތުންގެ އިތުބާރު އުފެއްދުމަށް، އުފެއްދުމުގެ މުހިއްމުކަމާމެދު އަޅުގަނޑުމެން ވާހަކަދައްކާއިރު ކޮންމެ ފަހަރަކު ވެސް އަޅުގަނޑުމެންނަށް މި ފެންނަނީ މިކަހަލަ އިންތިހާބާ ގުޅޭ ކަންކަމަށް އެބޭފުޅުން ނުފޫޒު ފޯރުވާ، އިންތިހާބުގެ ތާރީޚުތަކަށް ވެސް ބަދަލު އަންނަ ގޮތަށް ނިންމެވުންތައް ނިންމެވުމަކީ ރައްޔިތުންނަށް ވަރަށް ބޮޑު ކަންބޮޑުވުންތަކެއް ކުރިމަތިވާ ކަމެއް " އަފްޝަން ވިދާޅުވިއެވެ.

އަފްޝަން ވިދާޅުވީ، އެފަދަ ނިންމެވުންތަކުގެ ސަބަބުން ސުޕްރީމް ކޯޓާމެދު ރައްޔިތުންގެ އިތުބާރު ގެއްލުމަށް މަގުފަހިވާ ކަމަށާއި އެކަމާ އެމްޑީޕީން ހިތާމަކުރާ ކަމަށެވެ.

އެމްޑީޕީން މަޖިލިސް 19 އަށް ބޮޑެތި ތައްޔާރީތަކެއް ވަމުންދާއިރު، ބުރާސްފަތި ދުވަހުގެ ރޭ 09:00 ގައި އެމްޑީޕީން ޒުވާނުންނަށް ޚާއްސަކޮށްގެން ކުރިއަށްގެންދާ ޕެނަލް ޑިސްކަޝަންއެއް ސަލްޓަން ޕާކުގައި އޮންނާނެ ކަމަށް ވެސް އަފްޝަން ވިދާޅުވިއެވެ. އެ ޕެނަލްގައި މައުލޫމާތު ދެއްވާނީ އެމްޑީޕީގެ ޗެެއަރ ޕާރސަން ހަސަން ލަތީފާއި، ގަލޮޅު ދެކުނު ދާއިރާގެ މެމްބަރު އީވާ އަބްދުﷲ ގެ އިތުރުން ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ކަމަށާއި، ޕެނަލްގައި އަސާސީ މުސާރަ، އާމްދަނީ ޓެކްސް ނެގުން ތައާރަފް ކުރުމުގެ އިތުރުން ދަރިވަރުންގެ ދަރަނި ލުއި ކުރުމާ ގުޅޭ ގޮތުން އެމްޑީޕީން ހުށައަޅާ ސިޔާސަތުތަކަށް ހިޔާލު ބަދަލުކުރެވޭނެ ކަމަށް އަފްޝަން ވިދާޅުވިއެވެ.