ފުރަތަމަ ޑިގްރީއަށް ހިލޭ ކިޔަވައިދިނުމުގެ ޕްރޮގްރާމްގައި ކްލިކް ކޮލެޖުން ބައިވެރިވެއްޖެ
25 ފެބުރުއަރީ 2019 | ހޯމަ 15:55މި ޕްރޮގްރާމުގައި ބައިވެރިވުމަށް ފޯމް މިހާރު ހުށައެޅޭނެ
ކްލިކް ކޮލެޖުގެ ދަރިވަރުންތަކެއް
ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހުގެ ވެރިކަމުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނޭ، ފުރަތަމަ ޑިގްރީއާ ހަމައަށް ހިލޭ ކިޔަވައިދިނުމުގެ ޕްރޮގްރާމްގައި ކްލިކް ކޮލެޖް އިން ބައިވެރިވެއްޖެއެވެ.
އަމިއްލަ ކޮލެޖުތަކުގައި ފުރަތަމަ ޑިގްރީ ހާސިލުކުރާ ދަރިވަރުންގެ ކޯސް ފީގެ ބޮޑު ބައި ސަރުކާރުން ދައްކައިދޭއިރު ކްލިކް ކޮލެޖްގެ ގިނަ ކޯސްތަކެއް ސަރުކާރުގެ ހިލޭ އެހީއަށް ކިޔަވާ ޕްރޮގްރާމްގެ ތެރޭގައި ހިމެނިފައިވާ ކަމަށް އެކޮލެޖުން ވަނީ ބުނެފައެވެ. އެގޮތުން އެކައުންޓިން، ބިޒްނަސް މެނޭޖްމެންޓު، މާރކެޓިންގ، ހިއުމަން ރިސޯސް މެނޭޖްމަންޓް، ޓްރެވަލް އެންޑް ޓުއަރިޒަމް، އިންފޮރމޭޝަން ޓެކްނޮލޮޖީ އާރލީ ޗައިލްޑް ހޫޑް އަދި މީގެ އިތުރުން ޓިޗީންގު ދާއިރާގެ ކޯސްތަށް ހިމެނޭއެވެ.
މީގެ އިތުރުން ކްލިކް ކޮލެޖްގައި ހިންގާ އިނގިރޭސި ވިލާތުގެ ހެރިއެޓްވާރޓް ޔުނިވާރސިޓީގެ ކޯސްތައް ވެސް ސަރުކާރުގެ ހިލޭ އެހީއަށް ކިޔަވައިދިނުމުގެ ޕޮރޮގްރާމްގެ ދަށުން ކިޔޭވޭނެ ކަމަށް ކްލިކުން ވަނީ ބުނެފައެވެ.
ހޯމަ ދުވަހު މިނިސްޓްރީ އޮފް ހަޔަރ އެޑިއުކޭޝަންގައި އޮތް ރަސްމިއްޔާތެއްގައި ހަޔަރ އެޑިއުކޭޝަން މިނިސްޓްރީ އާއި ކްލިކް ކޮލެޖާ ދެމެދު ވަނީ އެއްބަސްވުމެއްގައި ސޮއިކޮށްފައެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޑރ. އަބްދުއްރަހީމް ހަސަންއެވެ. އަދި ކޮލެޖުގެ ފަރާތުން ސޮއިކުރެއްވީ އެ ކޮލެޖުގެ ވައިސް ޕްރެސިޓެންޓް ހަސަން އަބްދު الله ސައީދެވެ. މި އެއްބަސްވުމުގައި ސޮއިކުރުމާ އެކު މިހާރުން ފެށިގެން އެ ޕްރޮގްރާމްގެ ދަށުން ކިޔެވުމަށް ހުޅުވާލާފައިވާ ކަމަށް ކްލިކް ކޮލެޖުން ވަނީ ބުނެފައެވެ. އަދިފެށިގެން ހިލޭ އެހީއަށް ކިޔަވައިދިނުމުގެ ޕްރޮގްރާމުގައި ހޯމަ ދުވަހުން ބައިވެރިވުމަށް ފޯމް ހުށައެޅޭނެ ކަމަށް ވެސް އެކޮލެޖުން ބުންޏެވެ.
