ކަނޑައެޅިފައިވާ ދުވަހަށް އިންތިޚާބު އޮންނާނެ: އީސީ

ޕްރައިމަރީއިން ބަލިވިޔަސް އިންތިޚާބުގައި ވާދަކުރެވޭނެ ކަމަށް ސުޕްރީމް ކޯޓުން ކަނޑައެޅި ނަމަވެސް އެޕްރީލް މަހުގެ 6 ވަނަ ދުވަހު ރައްޔިތުންގެ މަޖިލީހުގެ އިންތިޚާބު ކަނޑައެޅިފައިވާ ދުވަހު އޮންނާނެ ކަމަށް އިލެކްޝަންސް ކަމިޝަނުން ބުނެފިއެވެ.

އިލެކްޝަންސް ކަމިޝަންގެ މެމްބަރު އަހުމަދު އަކްރަމް ވިދާޅުވީ ކަނޑައެޅިފައިވާ ދުވަހަށް އިންތިޚާބު އޮންނާނެ ކަމަށާއި އެކަމިޝަނުން ސުޕްރީމް ކޯޓުގެ އަމުރާއި އެއްގޮތަށް އަމަލު ކުރާނެ ކަމަށެވެ. އަދި އެހުކުމާއި އެއްގޮތަށް މެމްބަރު ކަމަށް ކުރިމަތިލުމަށް އެކަމިޝަނުން ވަރަށް އަވަހަށް ހުޅުވާލާނެ ކަމަށް ވިދާޅުވިއެވެ.

Advertisement

" ކަނޑައެޅިފައިވާ ދުވަހަށް އިންތިޚާބު އޮންނާނެ، އަދި ސުޕްރީމް ކޯޓުގެ އަމުރާއި އެއްގޮތަށް އަމަލު ކުރާނެ." އަކްރަމް ވިދާޅުވިއެވެ.

ޕްރައިމަރީގައި ބަލިވާ ފަރާތްތަކަށް ވާދަކުރުން މަނާކުރުން ގާނޫނު އަސާސީއާ ހިލާފު ކަމަށާއި އެކަން ބަދަލު ކުރުމަށް ސުޕްރީމް ކޯޓަށް އެމްޑީޕީ ޕްރައިމަރީގައި ކާށިދޫ ދާއިރާ އަށް ވާދަކުރައްވައި ނާކާމިޔާބީއާ ކުރިމަތިއްލައްވަން ޖެހިވަޑައިގަތް އަބްދުﷲ ޖާބިރު ހުށައެޅުއްވި މައްސަލަ އޭނާއާއި އެއްކޮޅަށް ސުޕްރީމް ކޯޓުން ވަނީ ކަނޑައަޅާފައެވެ. ޕްރައިމަރީއިން ބަލިވިޔަސް އިންތިޚާބުގައި ވާދަކުރެވޭނެ ކަމަށް ސުޕްރީމް ކޯޓުން ކަނޑައަޅާފައިވަނީ ހޯމަ ދުވަހުއެވެ.

ސުޕްރީމް ކޯޓުން ވަނީ ޕްރައިމަރީން ބަލިވި ފަރާތްތަކަށް އިންތިހާބުގައި ވާދަކުރުމުގެ ފުރުސަތު އަންނަ މަހުގެ 4 ވަނަ ދުވަހުގެ ހަވީރު 4 ޖެހުމާއި ހަމައަށް ދިނުމަށް އިލެކްޝަންގެ މައްޗަށް އަމުރުކޮށްފައެވެ.

ރައްޔިތުންގެ މަޖިލީހުގެ އިންތިޚާބުގެ ގާނޫނުގައި ބުނެފައިވާ ގޮތުން އިންތިޚާބަށް ކުރިމަތިލުމަށް އެދޭމީހާ އެކަން ބަޔާންކޮށް ހުށަހަޅާ ލިޔުން އިލެކްޝަންސް ކަމިޝަނަށް ލިބޭތާ ގިނަވެގެން 48 ގަޑިއިރުގެ ތެރޭގައި، އެމީހެއްގެ ހުށަހެޅުން ޤަބޫލުކުރިކަން ނުވަތަ ޤަބޫލުނުކުރާކަން، އިލެކްޝަންސް ކޮމިޝަނުން އެމީހަކަށް ލިޔުމުން އަންގަން ޖެހެއެވެ. އަދި އެގާނޫނުގައި އިންތިޚާބުގެ ވޯޓު ނެގޭނީ ރައްޔިތުންގެ މަޖިލީހުގެ އިންތިޚާބު ބޭއްވުމަށް ކަނޑައަޅާ ތާރީޚަކީ، އިލެކްޝަންސް ކޮމިޝަނުން ޢާންމުކޮށް އަންގައި އިޢުލާންކުރާ ދުވަހުން ފެށިގެން މަދުވެގެން 30 ތިރީސް ދުވަހުގެ މުއްދަތު އޮންނަގޮތަށް ކަނޑައެޅޭ ތާރީޚަކަށް ވާންޖެހޭނެ ކަމަށް ވަނީ ބުނެފައެވެ. އެހެންކަމުން މިހާރު އިންތިޚާބު ބާއްވަން ކަނޑައެޅިފައިވާ އެޕްރީލް 6 ވަނަ ދުވަހަށް އިންތިޚާބު ބޭއްވިދާނެކަމާއި މެދު ސުވާލު އުފެދެއެވެ.

މީގެ އިތުރުން ސިޔާސީ ޕާޓީތަކުގެ ގާނޫނުގެ ނުވަ ވަނަ މާއްދާ އަށް 2013 ވަނަ އަހަރު ގެނައި އިސްލާހެއްގައި، އިތުރުކުރި މާއްދާގައި ބުނެފައި އޮންނަނީ އެހެން ގާނޫނެއްގައި އެހެން ގޮތަކަށް އޮތް ކަމުގައި ވިޔަސް ސިޔާސީ ޕާޓީއެއްގައި ރަޖިސްޓްރީކޮށްފައިވާ މެންބަރަކު، ގާނޫނުއަސާސީން ނުވަތަ ގާނޫނަކުން ބާރު ލިބިގެން ބާއްވާ އެއްވެސް އިންތިހާބެއްގައި ސިޔާސީ ޕާޓީގެ ޓިކެޓް ހޯދުމަށް އެ ޕާޓީގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބެއްގައި އެހެން އެއްވެސް ހައިސިއްޔަތަކުން ވާދަކޮށްގެން ނުވާނެ ކަމަށެވެ. އަދި މިފަދަ މީހަކު އިިންތިހާބެއްގައި ވާދަކުރަން އިލެކްޝަންސް ކޮމިޝަނަށް ހުށަހެޅި ނަމަވެސް ކެންޑިޑެސީ ބާތިލްކުރަން ޖެހޭނެ ކަމަށް ވެސް އެ މާއްދާގައި ބުނެފައިވެ އެވެ.

ރައްޔިތުންގެ މަޖިލިސް އިންތިހާބު ބޭއްވޭނެ މާހައުލެއް ނެތް ކަމަށް ބުނެ އިންތިހާބު ފަސްކޮށްދޭން ޕްރޮގްރެސިވް ކޯލިޝަނުން އިލެކްޝަންސް ކޮމިޝަނުގައި ވަނީ އެދިފައެވެ. ޕީޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ އިންތިހާބު ބޭއްވޭ މާހައުލެއް ނެތް ކަމަށް ބުނެ އިލެކްޝަނަށް ހުށައެޅި ސިޓީގައި ފާހަގަކޮށްފައިވާނެ އެއް ސަބަބަކީ ކުރީގެ ރައީސް އަބްދުﷲ ޔާމިން ހައްޔަރު ކޮށްފައި ހުރުން ކަމަށެވެ. އެހެން ނަމަވެސް އީސީއިން ވަނީ އިންތިޚާބު ފަސްކުރަންޖެހޭނެ އެއްވެސް ސަބަބެއް ނެތް ކަމަށް ބުނެފައެވެ.