ރައީސުލްޖުމްހޫރިއްޔާގެ ނައިބުކަން ކޮށްފައިވާ މީހަކަށް ދޭންޖެހޭ ރައްކާތެރިކަމުގެ ބިލު ހުޅަހަޅައިފިއެވެ.
މިބިލް ހުށަހެޅުއްވީ 2019 ވަނަ އަހަރުގެ ފުރަތަމަ ދައުރުގެ 2 ވަނަ ޖަލްސާގައި އޭދަފުށި ދާއިރާގެ މެންބަރު އަޙްމަދު ސަލީމެވެ.
މި ބިލާ ގުޅޭގޮތުން ވާހަކަދައްކަވަމުން ސަލީމު ވިދާޅުވީ މިބިލު ހުށަހެޅީ ރައީސުލްޖުމްހޫރިއްޔާ ނައިބުކަން ކޮށްފައިވާ ބޭފުޅުންނަކީ އަބަދުމެ ގައުމާއި، ރައްޔިތުންގެ ލާބައާއި، މަންފާއަށްޓަކައި މަސައްކަތްކުރާ ބަޔަކަށްވެފައި، އެފަރާތްތަކަކީ އިއްޒަތާއި ގަދަރާއި އަދި ސަމާލާމަތާއި ރައްކާތެރިކަން ކަށަވަރުވެގެންދާ ބަޔަކަށްވާންޖެހޭނެކަމަށް ގަބޫލުކުރައްވާތީކަމަށެވެ.
ބިލުގެ ބަހުސް މަރުހަލާގައި ވާހަކަދައްކަވަމުން ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ނައިބް ރައީސުންނަކީ އެބޭފުޅުން ގައުމަށް އެތައް ޚިދުމަތްތައް ކޮށްދެއްވާފައި ބޭފުޅުން ކަމަށެވެ. އަދި ވަގުތީ ކޮމެޓީއަކަށް ފޮނުވައިގެން އަވަހަށް ގާނޫނަކަށް ބަދަލުވެގެން ދިއުމަކީ މުހިންމު ކަމެއްކަމަށް ވިދާޅުވިއެވެ.
މިބިލަކީ ރައީސުލްޖުމްހޫރިއްޔާ ނައިބުގެ މަގާމުގައި ހުރި މީހަކު، ކުށްވެރިނުވެ އެމަގާމުން ވަކިވެއްޖެނަމަ، ދައުލަތުގެ އެންމެމަތީ ވެރިޔާގެ ނައިބަށް ދޭންޖެހޭ އިއްޒަތާއި ގަދަރާއި އެކަށީގެންވާ ފަދަ ރައްކާތެރިކަމާއި، އިނާޔަތްތައް ބަޔާންކުރާ ގާނޫނެވެ.
މި ބިލްގެ 1 ވަނަ މާއްދާގައި ބުނެފައިވާގޮތުން ޤާނޫނުގެ ދަށުން ރައީސުލްޖުމްހޫރިއްޔާގެ ނައިބުކަން ކޮށްފައިވާ މީހަކީ ދައުލަތުގެ އިއްޒަތްތެރިންގެ ތެރޭގައި ހިމެނޭ މީހެއް ކަމަށެވެ. އަދި ރައީސުލްޖުމްހޫރިއްޔާގެ ނައިބުކަން ކޮށްފައިވާ މީހަކަށް ރަސްމީގޮތުން މުޚާތަބުކުރުމުގައި އެމީހެއްގެ ނަމުގައި ކުރިއަށް ''ނައިބު ރައީސް'' މިލަޤަބު ބޭނުން ކުރެވިދާނެކަމަށް ބިލްގައި ބުނެފައިވެއެވެ.
ބިލްގައި ބުނެފައިވާގޮތުން ރައީސުލްޖުމްހޫރިއްޔާގެ ނައިބުކަން ކޮށްފައިވާ މީހަކަށް ދައުލަތުގެ ސަލާމާތާއި ބާރުތައް މެދުވެރިކޮށް، ހިމާޔަތާއި ރައްކާތެރިކަން ދައުލަތުން ފޯރުކޮށްދެވޭނެއެވެ.
ބިލްގައި ނައިބް ރައީސްކަން ކޮށްފައިވާ މީހަކަށް އިނާޔަތެއް ދިނުމަށް ހިމަނާފައެއް ނުވެ އެވެ. އަދި އިޔާނަތެއްދޭނަމަ، އެކަން ކުރާނެގޮތަކާއި، އެ އިނާޔަތެއް ކަނޑައަޅާނެ އިދާރާއެއްވެސް ބިލްގައި ހިމަނާފައެއް ނުވެ އެވެ. ނަމަވެސް ބަހުސް މަރުހަލާގައި ވާހަކަދެއްކެވި ބައެއް މެމްބަރުން ވިދާޅުވީ ރައީސުލްޖުމްހޫރިއްޔާގެ ނައިބްކަން ކުރައްވާފައިވާ ބޭފުޅުންނަށް އިނާޔަތެއްވެސް ދައުލަތުގެ ބަޖެޓުން ހަމަޖައްސައިދޭންޖެހޭނެ ކަމަށެވެ. އަދި އެ ބޭފުޅުންނަކީ "މަގުމަތީގައިި ސަލާންޖަހަން" އުޅޭ ބަޔަކަށްވެގެން ނުވާނެކަމަށް އެ މެމްބަރުން ވިދާޅުވި އެވެ.
ނައިބު ރައީސުންނަށް އިނާޔަތް ދިނުމުގެ ބިލެއް ރައްޔިތުންގެ މަޖިލީހަށް ހުށަހެޅުއްވިއިރު، ކުރީގެ ނައިބް ރައީސް އަބްދުﷲ ޖިހާދު، ދައުލަތުގެ އިމާރާތެއްގައި ދިރިއުޅޭ މައްސަލައެއް ވަނީ ފެންމަތިވެފަ އެވެ. ޖިހާދު ދިރިއުޅުއްވަމުން ގެންދަވަނީ ރެެހެންދި ފްލެޓުގައި ހުރި ދައުލަތުގެ ދެ އެޕާޓްމެންޓެއްގަ އެވެ.
ކުރީގެ ނައިބް ރައީސުންގެ ގޮތުގައި މިވަގުތު ޖުމްލަ 6 ބޭފުޅަކު އެބަތިއްބެވި އެވެ. އެއީ ކުރީގެ ނައިބް ރައީސް އަދި ރައީސް ވަހީދާއި، ކުރީގެ ނައިބް ރައީސް ވަހީދުއްދީންނާއި، ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދާއި، ކުރީގެ ނައިބް ރައީސް އަހުމަދު އަދީބްގެ އިތުރުން، ކުރީގެ ނައިްބ ރައީސް އަބްދުﷲ ޖިހާދެވެ. އޭގެތެރެއިން އަދީބަކީ ޖަލު ހުކުމެއް ތަންފީޒް ކުރައްވާ ބޭފުޅެއްކަމުން، އެމަނިކުފާނަށް މި ބިލްގެ ތެރެއިން އިނާޔަތެއް ލިބިވަޑައެއްނުގަންނަވާނެ އެވެ.
