މަޖިލިސް އިންތިޚާބަށް އޮފިޝަލުން ހޯދުމުގެ މުއްދަތު އިތުރުކޮށްފި
24 ފެބުރުއަރީ 2019 | އާދީއްތަ 13:43މިހާތަނަށް ލިބިފައިވަނީ 2400 އޮފިޝަލުން
އިލެކްޝަންސް ކޮމިޝަން
އަންނަ އެޕްރީލް މަހު ބާއްވާ ރައްޔިތުންގެ މަޖިލީހުގެ އިންތިޚާބުގައި އިލެކްޝަންސް ކޮމިޝަންގެ އޮފިޝަލުންނަށް ވުމުގެ ފުރުސަތު އިތުރު ކޮށްފިއެވެ.
ރާއްޖެއެމްވީއަށް މައުލޫމާތު ދެއްވަމުން އިލެކްޝަން ކޮމިޝަންގެ ތަރުޖަމާނު އަދި އެ ކޮމިޝަންގެ މެންބަރު އަހުމަދު އަކްރަމް ވިދާޅުވީ އޮފިޝަލުންނަށް ވުމުގެ ފުރުސަތު އާދިއްތަ ދުވަހުން ފެށިގެން ފަސްދުވަހަށް އިތުކޮށްފައިވާ ކަމަށެވެ.
އޮފިޝަލުން ހޯދުމަށް ކުރި އިއުލާނުގެ މުއްދަތު އާދިއްތަ ދުވަހަށް ހަމަވިއިރު ޖުމްލަ 2400 އޮފިޝަލުން މިހާތަނަށް ލިބިފައިވާ ކަމަށާއި އަދި އިތުރަށް 2000 އޮފިޝަލުން ބޭނުންވާ ކަމަށް އަކްރަމް ވިދާޅުވިއެވެ.
ރިޔާސީ އިންތިޚާބަށްފަހު އޮފިޝަލުންނަށް ދިމާވި ބިރުދެއްކުމުގެ ކަންތައްތަކާ ގުޅިގެން އޮފިޝަލުންނަށް ވާން މީހުން ޖެހިލުންވާކަމަށް އިލެކްޝަންސް ކަމިޝަނުން ކުރިން ވަނީ ބުނެފައެވެ.
އޮފިޝަލުން ހޯދުމަށް ސިޔާސީ ޕާޓީތަކާއި ސިވިލް ސާވިސް ކޮމިޝަނާއި އަދި ދައުލަތުގެ ކުންފުނިތަކުގެ އެހީތެރިކަމަށްވެސް އެދިފައިވާކަމަށް އަކްރަމް ވިދާޅުވިއެވެ. އަދި ހުރިހާ ފަރާތްތަކުންވެސް އެކަމަށް އެއްބާރުލުން ދޭނެކަމަށް ބުނެފައިވާ ކަމަށްވެސް އަކްރަމް ވިދާޅުވިއެވެ.
މީގެ އިތުރުން އަކުރަމް ވިދާޅުވީ ރައްޔިތުންގެ މަޖިލީހުގެ އިންތިހާބު އިލެކްޝަންސް ކޮމިޝަނުން ތާވަލް ކޮށްފައިވާ ދުވަސް ކަމުގައިވާ އެޕްރީލް މަހުގެ 6 ވަނަ ދުވަހު ބޭއްވޭނެ ކަމަށާއި އެތާރީޚަށް ބަދަލެއް ނާންނާނެ ކަމަށެވެ.
މަޖިލީހުގެ އިންތިޚާބު މޮނިޓަރ އަދި އޮބްޒާވް ކުރަން ބޭނުންވާ ފަރާތްތަކަށް އެކަމަށް ކުރިމަތިލުމުގެ ފުރުޞަތު މި މަހުގެ 28 އާ ހަމައަށް އީސީއިން ވަނީ އިތުރުކޮށްފައެވެ
