ޖަމާލުއްދީން ސްކޫލަކީ މަތީ ނަތީޖާ ހޯދުމުގެ ސަގާފަތް ދަމަހަށްޓާ ސްކޫލެއް ކަމަށް އެ ސްކޫލުގެ ޕްރިންސިޕަލް ހަސަން މުހައްމަދު ވިދާޅުވެއްޖެ އެވެ.
ޖަމާލުއްދީން ސްކޫލަށް 34 އަހަރު ފުރުން ފާހަގަ ކުރުމުގެ ގޮތުން އެ ސްކޫލުގައި ހޮނިހިރު ދުވަހު ބޭއްވި ޚާއްސަ އެސެމްބްލީގައި ވާހަކަ ދައްކަވަމުން ހަސަން ވިދާޅުވީ އެ ސްކޫލުން ހޯދާފައިވާ ކާމިޔާބީތަކުގެ ތެރޭގައި ނިމިގެން ދިޔަ އަހަރު އޯލެވެލް އިމްތިހާނުން އެ ސްކޫލު ހޯދާފައިވާ ނަތީޖާ އަކީ ފާހަގަ ކޮށްލެވޭ ފަދަ ނަތީޖާއެއް ކަމަށެވެ. އަދި ކިޔެވުމާއި އެއްވަރަށް އެހެނިހެން ހަރަކާތްތަކުން ކާމިޔާބު ހޯދުމަކީ ވެސް އެ ސްކޫލުގެ ސަގާފަތެއް ކަމަށް އޭނާ ވިދާޅުވިއެވެ.
އެގޮތުން މިއަހަރު ސްކޫލުތަކުގެ މެދުގައި އެންމެ ފުރަތަމަ ބޭއްވުނު މުބާރާތް ކަމަށްވާ "މައިލޯ ފުޓްބޯޅަ ފިއެސްޓާ 2019" މިދިޔަ ހޮނިހިރު ދުވަހު ނިމިގެން ގޮސްފައިވާއިރު މި މުބަރާތުން ވެސް އެ ސްކޫލުގެ ގްރޭޑް 2 ގެ ޓީމް ވަނީ ޗެމްޕިއަންކަން ހޯދާފައެވެ. އަދި މީ ރަނގަޅު ފެށުމެއްކަމަށް ވެސް ހަސަން ވިދާޅުވިއެވެ.
އަދި މިދިޔަ އަހަރު ޖަމާލުއްދީން ސްކޫލްގެ ކުދިން ކޮށްފައިވާ މަސައްކަތްތަކުން ދައްކުވައިދީފައި ވަނީ އެސްކޫލުގެ ދަރިވަރުންނަކީ ކާމިޔާބު ދަރިވަރުން ކަމަށާއި އަދި އެކާމިޔާބީތައް އެގޮތުގައި ދެމެހެއްޓުމަށް ޕްރިންސިޕަލް ހަސަން ވަނީ ދަރިވަރުންނަށް ގޮވާ ލައްވާފައެވެ.
މީގެ އިތުރުން ވެސް މިއަހަރު ސްކޫލު ޕޯސްޓްގެ އެކި އެކި މަގާމްތަކަށް ހޮވިފައިވާ ދަރިވަރުންނަކީ އަޚުލާގު ރަނގަޅު އަދި ސްކޫލްގެ އެހެން ދަރިވަރުންނަށް ނަމޫނާއަކަށް ވާންޖެހޭނެ ދަރިވަރުން ކަމަށް ހަސަން ވިދާޅުވިއެވެ.
