ޖަމާލުއްދީން ސްކޫލުގެ 34 ވަނަ އަހަރީ ދުވަހުގެ މުނާ ސަބަތުގައި ޚާއްސަ އެސެމްބްލީއެއް އެސްކޫލުގައި ބާއްވައިފިއެވެ.

ޖަމާލުއްދީން ސްކޫލުގެ އަހަރީ ދުވަހާއި ގުޅިގެން މިއަދު އެސްކޫލުގައި ބޭއްވި ޚާއްސަ އެސެމްބްލީ ޝަރަފްވެރި ކޮށްދެއްވާފައި ވަނީ އެޑިއުކޭޝަން މިނިސްޓަރ. ޑރ އައިޝަތު އަލީއެވެ. މިނިސްޓަރ އެސްކޫލަށް ވަޑައިގެންނެވުމާއި އެކު ސްކޫލުގެ ދަރިވަރުންނާއި ޓީޗަރުން ވަރަށް ހޫނު މަރުހަބާއެއް އެކަމަނާއަށް ދަންނަވާފައި ވާއިރު މަރުހަބާގެ ލަވައެއްވެސް އެސްކޫލުގެ ދަރިވަރުންކޮޅެއް ވަނީ ހުށައަޅާދީފައެވެ.

އެސެމްބްލީގައި ހިނގާދިޔަ އެންމެ ޚާއްސަ އެއްކަމަކީ މިއަހަރުގެ ސްކޫލު ޕޯސްޓް ހުވާ ކުރުމެވެ.

އެގޮތުން ސްކޫލު ޕޯސްޓްގެ އެކި މަގާމްތަކަށް ހޮވިފައިވާ ދަރިވަރުންނަށް މަގާމުގެ ބެޖް ހަވާލު ކޮށްދެއްވާފައި ވަނީ އެޑިއުކޭޝަން މިނިސްޓަރ. ޑރ އައިޝަތު އަލީ އާއި އެ މިނިސްޓްރީގެ ސްޓޭޓް މިނިސްޓަރ ފާތުމަތު ނަސީރު އެވެ.

ޖަމާލުއްދީން ސްކޫލުގައި 2180 ދަރިވަރުން ތައުލީމް ހާސިލް ކުރަމުން ދާއިރު 153 ޓީޗަރުން ކިޔަވައި ދިނުމުގައި  ހަރަކާތްތެރި ވެއެވެ.

ދެ ދަންފަޅިއަށް ކިޔަވައިދެމުން ދާ މި ސްކޫލުގައި ޚާއްސަ އެހީއަށް ބޭނުންވާ 19 ދަރިވަރަކު ކިޔަވަމުން ދާކަންވެސް ފާހަގަ ކޮށްލެވެއެވެ. 

ޖަމާލުއްދީން ސްކޫލުގެ އަހަރީ ދުވަހަކީ ކޮންމެ އަހަރެއްގެ ވެސް ފެބުރުއަރީ މަހުގެ 16ވަނަ ދުވަހެވެ.