ވިހަ ބަނގުރަލެއް ބޮއެގެން އައްސާމުގައި 50އަށް ވުރެ ގިނަ މީހުން މަރުވެއްޖެ
މީގެ ދެ ހަފުތާ ކުރިން އިންޑިއާގެ އެހެން ހިސާބެއްގައި ވެސް 100 މީހަކު ވިހަ ބަނގުރަލެއް ބޮއެގެން ވަނީ މަރުވެފައި
މަރުވީ މީހުންގެ ޖަނާޒާގެ ތެރެއިން | ރޮއިޓަރސް
އިރުއުތުރު އިންޑިއާގެ އައްސާމް ސްޓޭޓްގައި ވިހަ ބަނގުރަލެއް ބޮއެގެން، 50އަށް ވުރެ ގިނަ މީހުން މަރުވެއްޖެއެވެ. ރާ ބޮއެގެން މަރުވިި މީހުންގެ ތެރޭގައި ގިނައީ އެ ސަރަހައްދުގެ ސައިފަތް ދަނޑުތަކުގައި މަސައްކަތް ކުރާ ފަގީރު ދަނޑުވެރިންނެެވެ.
އައްސާމްގެ ގޯލާގަޓްއާއި ޖޯރްހަޓް ޑިސްޓްރިކްޓްގައި ހިނގި މި ހާދިސާތަކުގައި މަރުވީ މީހުންގެ ތެރޭގައި ގިނައީ އެ ސަރަހައްދުތަކުގެ ސައިފަތް ދަނޑުތަކުގައި މަސައްކަތް ކުރާ ފަގީރު ދަނޑުވެރިންނެވެ. މި ހާދިސާ ހިނގާފައި ވަނީ މީގެ ދެ ހަފުތާ ކުރިން އުއްތަރް ޕަރްދޭޝްގައާއި އުއްތަރްކަންދް ސްޓޭޓްގައި ވިހަ ރަލެއް ބޮއެގެން 100އަށް ވުރެ ގިނަ މީހުން މަރުވެފައި ވަނިކޮށެވެ.
މަރުވީ މީހުންގެ އިތުރުން، އިތުރު 50 މީހަކު ވަނީ ހޮސްޕިޓަލުގައި އެޑްމިޓް ކޮށްގެން ފަރުވާ ދޭން ފަށާފައެވެ. މިހެން ދިމާވާން މެދުވެރިވީ އެ ބަނގުރަލުގައި ނުރައްކާތެރި ކެމިކަލެއް ކަމުގައިވާ މެތިލް އަލްކަހޯލް ހުރުމުން ކަމަށް އެ ސަރަހައްދުގެ ފުލުސް އޮފިސަރެއް ކަމުގައިވާ ޖޫލީ ސޮނޮވާލް ވަނީ ބުނެފައެވެ. އަދި މި މައްސަލައާއި ގުޅިގެން ބަނގުރާ އުފައްދާ ތަނެއްގެ ވެރިޔާއާއި އިތުރު ހަތަރު މީހަކު ފުލުހުންގެ ބެލުމުގެ ދަށަށް ގެނެވިފައިވާ ކަމަށް ވެސް އޭނާ ވަނީ ބުނެފައެވެ.
ގަވައިދާ ޙިލާފަށް ކައްކާ ވިހަ ބަނގުރަލުގެ ސަބަބުން އަހަރެއްގެ މައްޗަށް އިންޑިޔާގައި 1000އަށް ވުރެ ގިނަ މީހުން މަރުވާކަމަށް އެ ގައުމުގެ ނެޝަނަލް ކްރައިމް ރެކޯޑްސް ބިއުރޯއިން ވަނީ ހާމަކޮށްފައެވެ. އަދި އިންޑިޔާގައި ހިނގި މިކަހަލަ އެއްމެ ނުރައްކާތެރި ހާދިސާގައި 1992 ވަނަ އަހަރު ވަނީ އޮޑިޝާގައި 200 މީހުން ވަނީ މަރުވެފައެވެ.
