ކޮޕް26 ސަމިޓަށް ބައިޑެން ކުރައްވާ ދަތުރުފުޅުން 2.2 މިލިއަން ޕައުންޑުގެ ވިހަ ގޭސް ޖައްވަށް ބޭރުވާނެ

ކްލައިމެޓް ޗޭންޖް ސަމިޓުގައި ބައިވެރިވެވަޑައިގެންނެވުމަށް އެމެރިކާގެ ރައީސް ޖޯ ބައިޑެން ސްކޮޓްލެންޑަށް ކުރައްވާ ދަތުރުފުޅުން 2.2 މިލިއަން ޕައުންޑުގެ ކާބަން ޖައްވަށް ބޭރުވާނެ ކަމަށް ލަފާކޮށްފިއެވެ.

ބޭރުގެ މީޑިއާތަކުން ރިޕޯޓުކޮށްފައިވާގޮތުގައި 2.2 މިލިއަން ޕައުންޑުގެ ވިހަގޭސް އެންމެ ބޮޑަށް އުފައްދަނީ އެމނިކުފާނު ދަތުރުކުރައްވާ ހަތަރު މަތިންދާބޯޓުންނެވެ. މަތިންދާބޯޓުތަކުން 2.16 މިލިއަން ޕައުންޑުގެ ވިހަގޭސް ޖައްވަށް ބޭރުވާނެ ކަމަށް ވަނީ ލަފާކޮށްފައެވެ. ކޮޕް 26 ގައި ތަގުރީރުކުރެއްވުމަށް ބައިޑެން ސްކޮޓްލެންޑަށް ވަޑައިގަންނަވާ މި ދަތުރުފުޅުގައި އެމަނިކުފާނުގެ އަރިހުގައި ބައިވެރިވެވަޑައިގަންނަވާ ބޭބޭފުޅުން އިޓަލީއަށްވެސް ވަޑައިގަންނަވަން ވަނީ ހަމަޖެހިފައެވެ. ވައިގެ މަގުން ކުރައްވާ ދަތުރުފުޅަށް 2.16 މިލިއަން ޕައުންޑުގެ ވިހަގޭސް ބޭރުވާނެެކަމަށް ލަފާކޮށްފައިވާއިރު، ބާކީ ގޭސްތައް އުފެދޭނީ އެމަނިކުފާނު ކާރުކޮޅުގައި ކުރައްވާ ދަތުރުފުޅުތަކަށް ކަމަށް ވަނީ ލަފާކޮށްފައެވެ.

ބައިޑެން ދަތުރުކުރައްވާ އެއަރކްރާފްޓަކީ ބޮއިންގ 747 މަރުކާގެ މަތިންދާބޯޓެކެވެ. އެމަނިކުފާނު ދަތުރުކުރައްވާ މަތިންދާބޯޓާއެކު އިތުރު ތިން ބޯޓެއް ދަތުރުކުރެއެވެ. މީގެ ތެރެއިން ބޮޑު ދެ ބޯޓެއް ޚާއްސަކޮށްފައިވަނީ އެމަނިކުފާނުގެ ކާރުކޮޅުތަކާއި، ހެލިކޮޕްޓަރުތައް އުފުލުމަށެވެ. މީގެތެރެއިން ކޮންމެ ބޯޓަކުން 54 ޕައުންޑުގެ ކާބަން ޖައްވަށް ބޭރުކުރާނެ ކަމަށް ލަފާކޮށްފައިވެއެވެ.

ބައިޑެންގެ ކާރުކޮޅާއި، ކާރުކޮޅުގެ ވަށައިގެން މަޑު ދުވެއްޔެއްގައި ދުއްވާ ކާރުކޮޅުތަކުން ކޮންމެ މޭލަކަށް 8.75 ޕައުންޑުގެ ވިހަގޭސް ޖައްވަށް ބޭރުކުރާނެ ކަމަށް ވަނީ ލަފާކޮށްފައެވެ. މިއީ އާދައިގެ ކާރަކުން ޖައްވަށް ބޭރުކުރާ ވިހަގޭހަށްވުރެ 10 ގުނަ އިތުރު އަދަދެކެވެ. މި މޮޓޮރކޭޑުގައި 85 ކާރު ހިމެނެއެވެ. މި ކާރުކޮޅުތަކުގެ އިތުރުން އިޓަލީގެ ފުލުހުން ދުއްވާ އަލްފާ ރޯމިއޯ ކާރުތަކުންވެސް ކޮންމެ މޭލަކަށް 73.5 ޕައުންޑުގެ ވިހަގޭސް އުފައްދާކަމަށް ވަނީ ރިޕޯޓުކޮށްފައެވެ.

މީގެ އިތުރުން ކްރިސްޓިއަން ފައްޅީގެ ލީޑަރު ޕޯޕް ފްރޭންސިސްއާ ބައްދަލުކުރައްވައި މޫސުމީ ބަދަލުތަކާ ގުޅޭގޮތުން މަޝްވަރާކުރެއްވުމަށް ވެޓިކަން ސިޓީއަށް ކުރެއްވި ދަތުރުފުޅުގައި، 4.34 މޭލަށް ދުއްވާފައިވެއެވެ. މި ދަތުރުފުޅުގައި ބައިޑެންގެ ކާރުކޮޅުންނާއި، އެމަނިކުފާނުގެ އަރިހުގައި ދަތުރުކުރާ ކާރުތަކުން 373 ޕައުންޑުގެ ކާބަން ޖައްވަށް ބޭރުވެފައިވާނެކަމަށް ވަނީ ލަފާކޮށްފައެވެ.

މިކަމާއި ގުޅިގެން ބައިޑެންއަށް ގިނަ ބައެއްގެ ފާޑުކިޔުންތައް އަމާޒުވެފައިވީނަމަވެސް، އެމަނިކުފާނުގެ ސަލާމަތާއި ރައްކާތެރިކަން ކަށަވަރުކުރުމަށް މިނޫން ގޮތަކަށް އަމަުކުރެވެން ނެތްކަމަށް ވައިޓް ހައުސްއިން ގެންދަނީ ބުނަމުންނެވެ.