ރަޝިއާގެ ޖާސޫސަކަށް ވިހަ ދިން މައްސަލަ: އެމެރިކާއާއި ޔޫރަޕުން ރަޝިއާގެ ޑިޕްލޮމޭޓުން ބޭރުކުރަންފަށައިފި

ރަޝިއާގެ ކުރީގެ ޖާސޫސަކަށް އެމެރިކާގައި ވިހަދިން މައްސަލައިގައި އުފެދުނު ނުތަނަވަސްކަމުގައި އިނގިރޭސިވިލާތާއި އެކުގައި ތިބިކަން ހާމަކުުރުމަށް އެމެރިކާއާއި ވިލާތުގެ ގިނަ ގައުމުތަކަކުން އެ ގައުމުތަކުގައިތިބި ރަޝިއާގެ ޑިޕްލޮމޭޓުން ފޮނުވާލަން ފަށައިފިއެވެ.

އިނގިރޭސިވިލާތާއި އެއްބައިވުމުގެ ގޮތުން 20 އަށް ވުރެ ގިނަ ގައުމުން 100 ޑިޕްލޮމޭޓުން ފޮނުވާލައެވެ.

ރަޝިއާއިން ވަނީ މި ކަމުގެ ބަދަލު ހިފާނެ ކަަމަށް ވައުދުވެފައެވެ.

އިނގިރޭސިވިލާތާއި ރަޝިއާގެ ގުޅުންގޯސްވީ ޖާސޫސުކޮށްދިން ކަމަށް ބުނާ ރަޝިޔާގެ ރައްޔިތަކާއި އޭނާގެ އަންހެން ދަރިފުޅު އިނގިރޭސިވިލާތުގެ ލަންޑަންގެ ސެލިސްބަރީގައި މާޗް މަހުގެ ކުރީކޮޅު މަރާލުމަށް ކުރެވުނު މަސައްކަތާ ގުޅިގެންނެވެ. އިނގިރޭސި ފުލުހުން ބުނާ ގޮތުގައި އެދެބަފައިންނަށް ހަމަލާދީފައި ވަނީ ރަޝިޔާގައި އުފައްދާ ނަރވް އެޖެންޓް ބޭނުންކޮށްގެންނެވެ. އަދި އޭގެ ހަފްތާއެއް ފަހުން ލަންޑަންގައި ހުރި ރަޝިޔާގެ އެހެން ވިޔަފާރިވެރިއަކަށް ހަމަލާދީ ވަނީ މަރާލާފައިވެއެވެ.

ނަރވް އެޖެންޓް ބޭނުންކޮށްގެން ހަމަލާދީފައި ވަނީ 66 އަހަރު ސަރްގޭ ސްކްރިޕާލް އާއި އޭނާގެ ދަރިފުޅު، 33 އަހަރުގެ ޔޫލިއާއަށެވެ. ސްކްރިޕާލް 2006 ވަނަ އަހަރު އިނގިރޭސިވިލާތުގެ ޖާސޫސީ އިދާރާ އެމް.އައި.ސިކްސް އަށް ޖާސޫސުކޮށްދިން ކަމަށް ބުނެ ޖަލަށް ލެވުނެވެ. އަދި 2010 ވަނަ އަހަރު މިނިވަންވުމަށް ފަހު އޭނާ ދިރިއުޅުން ބަދަލުކުރީ އިނގިރޭސިވިލާތަށެވެ. ސްކްރިޕާލްއަކީ ރަޝިޔާގެ އަސްކަރީ ޖާސޫސީ އިދާރާގައި ކާނަލެއްގެ ރޭންކްގައި ހުރެ ރިޓަޔަރ ކުރި އޮފިސަރެކެވެ. އޭނާގެ ދަރިފުޅު ޔޫލިއާ އިނގިރޭސިވިލާތަށް ދިޔައީ އެދެބަފައިންނަށް ހަމަލާދިނުމުގެ އެއް ދުވަސްކުރިން، މާޗް މަހުގެ 3 ވަނަ ދުވަހުއެވެ.

މި ހަމަލާތަކުގެ ފަހަތުގައި ރަޝިޔާގެ ސަރުކާރު އޮތް ކަމަށް އިނގިރޭސި ސަރުކާރުން ބުނި ނަމަވެސް، ރަޝިޔާ އިން އެކަން ދޮގުކުރެއެވެ.

ވިލާތުގެ އިއްތިހާދުގެ ލީޑަރުން މިދިޔަ ހަފްތާގައިވަނީ ނަރވް އޭޖެންޓް ބޭނުންކޮށްގެން ދިން ހަމަލާގެ ފަަހަތުގައިވަނީ ރަޝިއާކަމަަށް އެއްބަސްވެފައެވެ.

އިނގިރޭސިވިލާތުގެ ފޮރިން ސެކްރެޓަރީ ބޮރިސް ޖޯންސަން ވަނީ އެ ގައުމަށް ތާއީދުކޮށް ވިލާތުގެ ގައުމުތަކުން ރަޝިއާއަށް ދިން ރައްދަށް ތާއީދު ކުރަމުންނެވެ.

އިނިގރޭސި ވިލާތުންވަނީ އެ ގައުމުގައި ތިބި ރަޝިއާގެ 23 ޑިޕްލޮމޭޓަކު މި މަހުގެކުރީކޮޅު އަނބުރާ ފޮނުވާލާފައެވެ.

އިނގިރޭސި ވިލާތާއި އެއްބައިވަންތަކަން ހާމަކޮށް ހޯމަ ދުވަހު އެމެރިކާއިން ވަނީ އެ ގައުމުގައި ތިބި ރަޝިއާގެ ޑިޕްލޮމޭޓުންގެ ތެރެއިން 60 މީހުން ފޮނުވާލާފައެވެ. ވިިލާތުގެ ގައުމުތަކަށް ބަލާއިރު:

ފްރާންސް 4

ޖަރުމަނު ވިލާތް 4

ޕޮލެންޑް 4

ޗެކް ރިޕަބްލިކް 3

ލިތުއޭނިއާ3

ޑެންމާކު 2

ނެދަލޭންޑްސް 2

އިޓަލީ 2

ސްޕެއިން 2

އެސްޓޯނިއާ 1

ކްރޮއޭޝިއާ 1

ފިންލޭންޑް 1

ހަންގޭރީ 1

ލެޓްވިއާ 1

ރޫމޭނިއާ 1

އަދި ސްވިޑެންއިން 1 ޑިޕްލޮމޭޓަކުވަނީ ފޮނުވާލާފައެވެ.

މީގެ އިތުރުން ޔޫކްރެއިނުން 13 ޑިޕްލޮމޭޓަކު އަދި ކެނެޑާއިން 4 ޑިޕްލޮމޭޓަކު ފޮނުވާލައި ރަޝިއާއިން ހުށަހެޅި ތިން ފޯމެއް ވަނީ ބަލައިނުގެންފައެވެ.

އަލްބޭނިއާއިން 2 ޑިޕްލޮމޭޓުން، ނޯވޭއިން 1 ޑިޕްލޮމޭޓަކު އަދި މެސެޑޯނިއާއިންވެސްވަނީ ރަޝިއާގެ 1 ޑިޕްލޮމޭޓަކު އަނބުރާ ގައުމަށް ފޮނުވާލާފައެވެ.