މަގުމަތީގެ ރައްކަތެރިކަމަށް ހޭލުންތެރި ކުރުމަށް ސިއްހީ މަސައްކަތްތެރިން ނުކުމެއްޖެ
22 ފެބުރުއަރީ 2019 | ހުކުރު 17:43މި އަހަރުގެ މިހާތަނަށް 345 އެކްސިޑެންޓް ހިނގާފައިވޭ
ހުކުރު ދުވަހު ކުރިއަށްގެންދިޔަ ހޭލުންތެރި ކުރުމުގެ ހަރަކާތުގެ ތެރެއިން
މަގުމަތީގެ ރައްކާތެރިކަމާއި މެދު ރައްޔިތުން ހޭލުންތެރި ކުރުމަށް ސިއްހީ ދާއިރާގައި މަސައްކަތް ކުރާ ފަރާތްތަކުން އިސްނަގައިގެން ހަރަކާތެއް ހިންގައިފިއެވެ.
މޯލްޑިވްސް މެޑިކަލް އެސޯސިއޭޝަން (އެމްއެމްއޭ) އާއި މޯލްޑިވްސް ނަރސަސް އެސޯސިއޭޝަން (އެމްއެންއޭ) އަދި ޕްރޮފެޝަނަލް އެސޯސިއޭޝަން އޮފް ލެބޯރެޓޮރީ ސައިންސަސް މޯލްޑިވްސް (ޕަލްސް) ގުޅިގެން ހިންގި މި ހަރަކާތް ކުރިއަށްގެންގޮސްފައިވަނީ މާލެ އާއި ހުޅުމާލޭގެ އެކި ސަރަޙައްދުތަކުގައެވެ.
މި ހަރަކާތް ރޭވުމުގައި ހަރަކާތްތެރިވި އޮފިޝަލަކު ވިދާޅުވީ، މަގުމަތީގައި ހިނގާ އެކްސިޑެންޓްތަކުގައި އަނިޔާ ލިބޭ ފަރާތްތަކާއި އެންމެ ގާތުން މަސައްކަތްކުރާ، އަދި އެފަރާތްތަކުގެ އާއިލާތަކުން ތަހައްމަލްކުރާ ވޭން އެންމެ ގާތުން ފެންނަ އެއް ބަޔަކީ ސިއްހީ ދާއިރާގައި މަސައްކަތްކުރާ ފަރާތްތައް ކަމުން، މަގުމަތީގެ ރައްކާތެރިކަމާއި ގުޅޭގޮތުން ރައްޔިތުން ހޭލުންތެރި ކުރުމަށް އެ ދާިރާ އިސްނެގުމަކީ މުހިއްމު ކަމެއް ކަމަށެވެ. އަދި މި ހަރަކާތް ކުރިއަށްގެންދިޔައީ އެ ސަބަބަށްޓަކާ ކަމަށް އޭނާ ވިދާޅުވިއެވެ.
މި ހަރަކާތުގެ ތެރެއިން، ސިއްހީ ދާއިރާގައި މަސައްކަތްކުރާ އެކި ފަރާތްތަކުން ހުކުރުދުވަހު ވަނީ މަގުމަތީގެ ރައްކާތެރިކަމާއި ގުޅޭ އެކި މެސެޖްތައް ލިޔެފައިވާ ޓީޝަރޓް ލައިގެން، އެފަދަ މެސެޖު ހިމެނޭ ބޯޑުތައް ހިފައިގެން މާލެ އާއި ހުޅުމާލޭގައި ހަރަކާތްތެރި ވެފައެވެ. އަދި ހަމަ މިއާއިއެކު މަގުމަތީގައި ހިނގާ އެކިއެކި ނުރައްކާތެރި ހާދިސާތައް ދައްކައިދޭ މަންޒަރު އެ ފަރާތްތަކުން ވަނީ މަގުމަތީގައި ތަމްޞީލު ކޮށްފައެވެ.
ހުކުރު ދުވަހު ކުރިއަށްގެންދިޔަ ހޭލުންތެރި ކުރުމުގެ ހަރަކާތުގެ ތެރެއިން
ސިއްހީ ދާއިރާގައި މަސައްކަތްކުރާ ފަރާތްތަކުގެ މި ހަރަކާތުގައި، ކަފިހި ހުރަހަކީ ރައްކާތެރި ތަނަކަށް ހެދުމުގެ މުހިއްމު ކަމަށް ޚާއްސަ ކަމެއް ދީ، އެކަމާއި ގުޅޭ ގިނަ ޝިއާރުތަކެއް ބޭނުންކޮށްފައިވެއެވެ. ރާއްޖެއެމްވީއަށް މައުލޫމާތު ދެއްވި އޮފިޝަލް ވިދާޅުވީ، ކަފިހިހުރަސް ރައްކާތެރި ތަނަކަށް ހެދުމުމުގެ މުހިއްމު ކަމަށް މި ހަރަކާތުގައި އަލިއަލުވާލިއިރު އެ ކަމަކީ ސިއްހީ ދާއިރާގައި މަސައްކަތް ކުރާ ފަރާތްތަކާއި ގާތް ގުޅުމެއް އޮތް ކަމެއް ކަމަށެވެ. އެގޮތުން ދާދި ފަހުން މާލޭގައި ކަފިހި ހުރަހެއް މަތިން އެކްސިޑެންޓްވެ، ސީރިއަސް ހާލަތެއްގައި އޮތް އަންހެން މީހާއަކީ އައިޖީއެމް ހޮސްޕިޓަލްގައި މަސައްކަތްކުރާ ޑޮކްޓަރެއްގެ އަނބިކަނބަލުންކަން އޮފިޝަލް ފާހަގަކުރެއްވިއެވެ.
ފަހަކަށް އައިސް، ޚާއްސަކޮށް ސިނަމާލެ ބްރިޖާއި، ހުޅުލެ-ހުޅުމާލެ ހައިވޭގައި ގިން އެކްސިޑެންޓްތަކެއް ހިނގާފައިވާއިރު މީގެ ތެރެއިން އެކްސިޑެންޓެއްގައި މީހަކު ނިޔާވެ، ބައެއް އެކްސިޑެންޓްތަކުގައި އެކި މީހުންނަށް ވަނީ ބޮޑެތި އަނިޔާތައް ވެފައެވެ. ފުލުހުންގެ ތަފާސް ހިސާބުތަކަށް ބަލާއިރު މި ފެބްރުއަރީ މަހުގެ މިހާތަނަށް 165 އެކްސިޑެންޓް ހިނގާފައިވާއިރު، ނިމިގެން ދިޔަ ޖަނަވަރީ މަހުވެސް 180 އެކްސިޑެންޓް ވަނީ ހިނގާފައެވެ.
ހުކުރު ދުވަހު ކުރިއަށްގެންދިޔަ ހޭލުންތެރި ކުރުމުގެ ހަރަކާތުގެ ތެރެއިން
މަގުމަތީގެ ރައްކާތެރިކަމަށް ހެލުންތެރި ކުރުމުގެ ގޮތުން ސަރުކާރާއި، ކަމާއި ބެހޭ ފަރާތްތަކުން ގިނަ މަސައްކަތްތަކެއް ކުރަމުންދާއިރު އަންނަ މާރިޗު މަހުގެ 10 ވަނަ ދުވަހުން ފެށިގެން ބްރިޖާއި ހައިވޭގައި ހެލްމެޓު ނާޅައި ސައިކަލު ދުއްވުން ސަރުކާރުން ވަނީ މަނާކޮށްފައެވެ. މީގެ އިތުރުން މަގުތަކަކީ ރައްކާތެރި ތަނަކަށް ހެދުމަށް ފުލުހުންވެސް ވަނީ ޚާއްސަ މަސައްކަތްތަކެއް ފަށާފައެވެ.
