އެމެރިކާ އިން ދިވެހިރާއްޖެއަށް މިހާރު ދޭ އެހީ އަށް ނުވަ މިލިއަން ޑޮލަރު އިތުރުކުރުމަށް ކޮންގްރެސްއަށް ހުށަހަޅުއްވަން ނިންމަވާފައިވާ ކަމަށް އެގައުމުގެ ސެކްރެޓަރީ އޮފް ސްޓޭޓް މައިކަލް ޕޮމްޕެއޯ ވިދާޅުވެއްޖެއެވެ.

މި އެހީ އިއުލާނުކުރައްވާފައި މިވަނީ ވޭތުވެ ދިޔަ ހަތް އަހަރުގެ ތެރޭގައި އެމެރިކާގެ ޚާރިޖީ ވަޒީރަކާއި ރާއްޖޭގެ ޚާރިޖީ ވަޒީރަކު ބޭއްވެވި ފުރަތަމަ ބައްދަލުވުމުގައި ބުދަ ދުވަހު ރާއްޖޭގެ ޚާރިޖީ ވަޒީރު އަބްދުﷲ ޝާހިދާއި ޕޮމްޕެއޯ ބޭއްވެވި ބައްދަލުވުމަށް ފަހު ސްޓޭޓް ޑިޕާޓްމަންޓުން އާއްމުކޮށްފައިވާ ބަޔާނެއްގައެވެ. އެ ބަޔާނުގައި ބުނެފައި ވަނީ އެ އެހީ އަށް 9.75 މިލިއަން ޑޮލަރު (150,735,000ރ.) އިތުރުކުރުމަށް ހުށަހަޅާނެ ކަމަށެވެ. 

އިންޑޯ ޕެސިފިކް ސަރަހައްދަކީ މިނިވަން، ހުޅުވާލެވިފައިވާ ސަރަހައްްދަކަށް ހެދުމާއި އެމެރިކާ އާއި ރާއްޖެއާ ދެމެދު އޮންނަ ގުޅުން ވަރުގަދަކުރުމަށް ދެ ބޭފުޅުންގެ ބައްދަލުވުމުގައި މަޝްވަރާ ކުރައްވާފައި ވެއެވެ.

ސެކްރެޓަރީ އޮފް ސްޓޭޓް ވަނީ ދެ ގައުމުގެ ގުޅުން ބަދަހިކުރުމަށް އެ މަނިކުފާނުގެ އެއްބާރުލެއްވުން ދެއްވާނެކަން ހާމަކުރައްވާފައެވެ.

މިނިސްޓަރ ޝާހިދުގެ މި ދަތުރުފުޅުގައި ދެ ގައުމުން ވަނީ ވައިގެ ދަތުރުފަތުރުގެ ސަލާމަތާ ބެހޭ ކަންކަން ވަރުގަދަކުރުމުގެ އެއްްބަސްވުމެއްގެ އިތުރުން އެމެރިކާ އިން ދޭ އެހީތެރިކަން ކުރިޔަށް ގެންދިއުމުގެ އެއްބަސްވުމެއްގައި ވެސް ސޮއިކުރައްވާފައެވެ.

ޕަބްލިކް ފައިނޭންސް މެނޭޖްކުރުމާއި، ދަރަނީގެ ސްްޓެރެޓެޖީގެ އިތުރުން ފައިނޭންޝަލް ކްރައިމް ހުއްޓުވުމަށް ދެގައުމުން އެކުގައި މަސައްކަތްކުރާނެ ކަމަށް ސެކްރެޓަރީ އޮފް ސްޓޭޓުން ވަނީ ހާމަކޮށްފައެވެ.

ޝަރުއީ ދާއިރާ އިސްލަހު ކުރުމާއި، ދެ ފުށް ފެންނަ ސިޔާސަތާއި އަދި ޤާނޫނު ނެގެހެއްޓުމަށް ސަރުކާރުން ކުރާ މަސައްކަަތަށް ޕޮމްޕެއޯ ވަނީ މަރުހަބާ ވިދާޅުވެފައެވެ.

ޚާރިޖީ ވަޒީރު އަބްދުﷲ ޝާހިދުގެ މި ދަތުރުފުޅަކީ ސެކްރެޓަރީ އޮފް ސްޓޭޓްގެ ދައުވަތަކަށް ކުރައްވާފައިވާ ދަތުރުފުޅަކަށްވާއިރު ވޭތުވެ ދިޔަ ހަތް އަހަރުގެ ތެރޭގައި ރާޖޭގެ ޚާރިޖީވަޒީރަކަށް ދައުވަތު ނުދެއްވުމުގެ އިތުރުން ބައްދަލު ކުރައްވާފައި ވެސް ނުވެއެވެ.

އެމެރިކާ އިން ގައުމުތަކަށް ދޭ އެހީ ކުޑަކުރަން ނިންމާފައިވާ ދަނޑިވަޅެއްގައި ރާއްޖެއަށް އެހީ އިތުރުކުރަން މަސައްކަތް ކުރުމަކީ ރާއްޖެއާ އޮތް ގާތްކަން ދައްކުވައިދޭ ކަމެއް ކަމަށް ޚާރިޖީ ދާއިރާގެ ތަޖްރިބާ ކާރުން ވިދާޅުވެއެވެ.