ޗައިނާގެ ކުރީގެ އިސް ޖެނެރަލަކު އުމުރަށް ޖަލަށް
21 ފެބުރުއަރީ 2019 | ބުރާސްފަތި 02:28ފަންގ ފެންގުއީގެ މައްޗަށް ސާބިތުވެފައި ވަނީ ރިޝްވަތު ދިނުމާއި ނުހައްގު މުއްސަނދިކަން ހޯދުން
އުމުރުން 67 އަހަރުގެ ފަންގ ފެންގުއި ވަނީ 2017 ވަނަ އަހަރު ވެސް ރައީސް ޝީގެ އަރިސް ބޭފުޅެއްގެ ގޮތުގައި ފެނިފައި
ކޮރަޕްޝަނުގެ މައްސަލައެއްގައި ޗައިނާގެ އަސްކަރިއްޔާގެ ކރުރީގެ އިސް ޖެނެރަލަކު އުމުރަށް ޖަލަށް ލުމަށް ކޯޓުން ހުކުމްކޮށްފި ކަމަށް އެގަމުގެ ދައުލަތުގެ މީޑި އާއިިން ރިޕޯޓްކޮށްފިއެވެ.
ކުރީގެ ޗީފް އޮފް ޖޮއިންޓް ސްޓާފް އޮފް ޕީޕަލްސް ލިބަރޭޝަން އާމީ ފަންގ ފެންގުއީގެ މައްޗަށް ސާބިތުވެފައި ވަނީ ރިޝްވަތު ދިނުމާއި ހޯދި ގޮތެއް ބުނެނުދެވުނު ނުހައްގު މުއްސަނދިކަން ކަމަށް ޒިންހުއާއިން ބުނެއެވެ.
އުމުރުން 67 އަހަރުގެ ފަންގ ފެންގުއި ވަނީ 2017 ވަނަ އަހަރު ރައީސް ޝީ ޖިންޕިންގ އެމެރިކާގެ ރައީސް ޑޮނަލްޑް ޓްރަމްޕްއާ އެކު ބައްދަލުކުރެއްވި އިރު އަރިހުގައި ބައިިވެރިވެ ވަޑައިގެންނެވިއެވެ.
ކޮރަޕްޝަނާ ދެކޮޅަށް ޝީ ފައްޓަވާފައިވާ މަސައްކަތުންގެ ދަށުން ކަމަށް ބުނެ ޗައިނާގެ އެތައް އޮފިޝަލުންނެއް ވަނީ ޖަލަށްލާފައެވެ.
މި މަސައްކަތުގައި އަސްކަރިއްޔާއަށް ޚާއްސަ ސަމާލުކަމެއް ދީފައި ވެއެވެ. މިއީ މިހާރު ޒަމާނީ ކުރަމުންދާ އަދި ދުނިޔޭގެ އެންމެ ބޮޑު އަސްކަރިއްޔާއެވެ.
ފަންގ ފެންގުއީގެ މަގާމު ގެއްލިފައި ވަނީ 2017 ވަނަ އަހަރުއެވެ. އޭގެ ފަހުން އާއްމުންނަށް އޭނާ ގެއްލިފައިވާއިރު މަގާމުން ވަކިކުރި ސަބަބެއް ފުރަތަމަ ބުނެފައެއް ނުވެއެވެ.
އޭގެ ފަހުން ސަރުކާރުން ވަނީ އޭނާގެ މައްޗަށް ކުރެވޭ ކޮރަޕްޝަނުގެ ތުހުމަތުތަކެއް ތަހުގީގުކުރަމުންދާ ކަމަށް ބުނެފައެވެ.
ފަންގ ފެންގުއީގެ މައްޗަށް އަސްކަރީ ކޯޓުގައި ޝަރީއަށް ފެށުމުގެ ކުރިން މިދިޔަ އަހަރު އޭނާ ވަނީ ކޮމިއުނިސްޓް ޕާޓީން ވަކިކޮށްފައެވެ.
އޭނާގެ ކޮރަޕަޝަނުގެ މައްސަލައިގައި ހިމެނެނީ ކިހާ އަދަދެއްގެ ފައިސާއެއް ކަމެއް ބުނެފައިނުވާއިރު އޭނާގެ ހުރިހާ މުދަލެއް ހިފަހައްޓާފައިވާ ކަމަށް ޒިންހުޢާ އިން ބުނެއެވެ.
