ކުރިއަށް އޮތް މަޖިލިސް އިންތިހާބަށް ވޯޓުލާ މީހުން ރީ ރެޖިސްޓަރކުރުމުގެ މަސައްކަތްތައް އެމްޑީޕީ ހަރުގޭގައި ކުރިއަށްދާ ކަމަށް އެ ޕާޓީން ބުނެފިއެވެ. 

ބުދަ ދުވަހު ނޫސްވެރިންނާ ބައްދަލުކުރައްވައި އެ ޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވީ ރީ ރެޖިސްޓްރޭޝަން ސެންޓަރެއް އެމްޑީޕީ ހަރުގޭގައި ޤާއިމުކޮށްފައިވާ ކަމަށާއި، ރީ ރަޖިސްޓަރ ކުރުމުގައި ދިމާވާ ކަންކަމުގައި އެ ސެންޓަރުގެ ޓީމުން އެހީތެރިކަން ފޯރުކޮށްދެއްވަމުން ދާނެ ކަމަށެވެ. 

"މީ އަޅުގަނޑުު ފާހަގަކޮށްލަން ބޭނުންވޭ އެމްޑީޕީ މެމްބަރުންނަށް ހަމައެކަނި އަޅުގަނޑުމެން ކޮށްދޭ ކަމެއް ނޫން. ހަމަ ކޮންމެ ބޭފުޅެއްވެސް ރިޔާސީ އިންތިހާބުގައި ވޯޓުލެއްވި ތަން ނޫން ތަނަކަށް މި ފަހަރު ވޯޓު ލައްވާނަމަ އަދި ރީ ރެޖިސްޓަރ ކުރައްވަން ޖެހިލައްވާނަމަ އެމްޑީޕީ ހަރުގެއަށް ވަޑައިގަތީމަ އެކަންތައްތައް ކޮށްދޭނެ." އަފްޝަން ވިދާޅުވިއެވެ. 

އަފްޝަން ވިދާޅުވީ، 1 މާރޗުގެ ނިޔަލަށް ރީ ރެޖިސްޓަރ ކުރެވޭނެ ކަމަށާއި، އޭގެ ކުރިން ވޯޓަރސް ލިސްޓް ޗެކްކުރައްވައި ރެޖިސްޓްރޭޝަންގެ މަސައްކަތްތައް ކުރިއަށް ގެންދިއުމަށް އެދިލައްވާ ކަމަށެވެ. 

އޭގެ އިތުރުން، އެމްޑީޕީން ސިލްސިލާކޮށް ކުރިއަށްގެންދާ މަޖިލިސް 19 ގެ ޕެނަލް ޑިސްކަޝަން ބުރާސްފަތި ދުވަހުގެ ރޭގައި އޮންނާނެ ކަމަށާއި، އެ ޕެނަލްގައި މައުލޫމާތު ދެއްވާނީ އެމްޑީޕީގެ ޗެެއަރ ޕާރސަން ހަސަން ލަތީފާއި، ގަލޮޅު ދެކުނު ދާއިރާގެ މެމްބަރު އީވާ އަބްދުﷲ ގެ އިތުރުން ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ކަމަށެވެ. 

ޕެނަލްގައި އަސާސީ މުސާރަ، އާމްދަނީ ޓެކްސް ނެގުން ތައާރަފް ކުރުމުގެ އިތުރުން ދަރިވަރުންގެ ދަރަނި ލުއި ކުރުމާ ގުޅޭ ގޮތުން އެމްޑީޕީން ހުށައަޅާ ސިޔާސަތުތަކަށް ހިޔާލު ބަދަލުކުރެވޭނެ ކަމަށާއި، ޕެނަލް ބާއްވާ ތަނެއް އިއުލާނު ކުރައްވާނެ ކަމަށް އަފްޝަން ވިދާޅުވިއެވެ. 

އަފްޝަން އިތުރަށް ވިދާޅުވީ، އެޖެންޑާ 19 ގެ ސިޔާސަތު ތަކަކީ ރައްޔިތުންނަށް ދިމާވެފައިވާ އެކި ކަން ކަމަށް ހައްލު ހޯދުމަށް ކަނޑައަޅާފއިވާ ސިޔާސަތުތަކެއް ކަމަށެވެ. އެގޮތުން އަސާސީ މުސާރައިގެ ސަބަބުން އެންމެ ކުޑަ އުޖޫރައެއް ކަނޑައެޅިގެންދާނެ ކަމަށާއި، އާމްދަނީން ޓެކްސް ނެގުމުގެ ސަބަބުން ފަޤީރުންނާއި މުއްސަނދިންގެ މެދުގައި އޮންނަ ފަރަޤް ކުޑަ ކުރެވިގެންދިއުން ފަދަ ފައިދާތައް ލިބޭނެ ކަމަށް އަފްޝަން ވިދާޅުވިއެވެ.  

ކުރިއަށް އޮތް 19 ވަނަ ރައްޔިތުންގެ މަޖިލީހަށް އެމްޑީޕީން ބޮޑެތި ތައްޔާރީތަކެއް ވަމުންދާއިރު، އެމްޑީޕީން މަޖިލީހުގެ 86 ދާއިރާއަކަށް ވާދަކުރަން ނިންމައި އިލެކްޝަންސް ކޮމިޝަނަށް ވަނީ ފޯމު ހުށައަޅާފައެވެ.