އެމްޕީއެލުން ނަގާ ފީތަކުގެ ލިސްޓްު އާންމު ކޮށްފި

ތަފާތު އެކި ނަންނަމުގައި އިތުރު ފީތަކެއް ނަގަމުން ދާތީ، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނަގާނެ ފީތައް އާންމުކޮށްފި އެވެ.

ވިޔަފާރިވެރިންގެ ބަނދަރުން ނަގާނެ ފީތައް އާންމުކޮށް، އެމްޕީއެލުން ނެރުނު އިއުލާނެއްގައި ބުނީ، ރާއްޖެއަށް ކަނޑު މަގުން މުދާ އިމްޕޯޓް ކުރާ ފަރާތްތަކުގެ އަތުން އެޖެންޓުންނާއި ފްރައިޓް ފޯވަޑާސް އަދި ބްރޯކަރުން އެމްޕީއެލްއަށް ދައްކަން ޖެހޭ ފީތަކެއްގެ ގޮތުގައި ދޭހަވާ ގޮތަށް ތަފާތު ނަންނަމުގައި ފީތައް ނަގަމުންދާކަން މިހާރު ފާހަގަ ކުރެވިފައިވާ ކަމަށެވެ. އެގޮތުން އޭ.ޕީ.ސީ.އާރ، ޕޯޓް ކޮންޖެސްޝަން ޗާޖް، ޑީ.ސީ.އެޗް.ޓީ އަދި އިކްއިޕްމަންޓް އިމްބެެލެންސް ޗާޖް ފަދަ ނަންނަމުގައި ފީތައް ނަގަމުންދާ ކަމަށް އެމްޕީއެލުން ބުނެ އެވެ. އަދި އެކަމުގައި މުދާ އިމްޕޯޓް ކުރާ ފަރާތްތަކުގެ ބޮޑު ޝަކުވާއެއް ލިބެމުންދާ ކަމަށް އެ ކުންފުނިން ބުނި އެވެ.

އެމްޕީއެލުން ބުނީ ކުންފުނިން ނެގުމަށް ހަމަޖެހިފައިވާ ފީތަކާއި، އެހެނިހެން ހިދުމަތްތަކަށް ނެގުމަށް ކަނޑައެޅިފައިވާ ފީތައް ކުންފުނީގެ ޓެރިފްގައި ބަޔާން ކޮށްފައިވާނެ ކަމަށެވެ. އަދި ޓްރިފްގައި ބަޔާން ކޮށްފައިވާ އަގުތަކުގެ އިތުރުން އެއްވެސް އަގެއް ނަގަމުން ނުގެންދާނެ ކަމަށް އެމްޕީއެލުން ބުންޏެވެ.

ވިޔަފާރިވެރިންގެ އަތުން އިތުރު ފީ ނެގުމުގެ މައްސަލަތައް ފެންމަތިވީ، މާލެ ވިޔަފާރި ބަނދަރުގެ މަސައްކަތް ސްލޯވެ، ބޯޓު ކްލިއަ ކުރުން ލަސްވަމުންދާތީ މުދާ އެތެރެކުރާ ބަޔެއް ކުންފުނިތަކުން އިތުރު ފީތަކެއް ނަގަމުންގެންދާތީވެ އެވެ.