ސްރީލަންކާގެ ޖަފްނާ ޑިސްޓްރިކްޓްގައި ހުންނަ ފަލާލީ އެއަރޕޯޓް އިންޓަރނޭޝަލް އެއަރޕޯޓެއްގެ ގޮތުގައި ތަރައްޤީ ކުރަން އެ ޤައުމުގެ ސަރުކާރުން ނިންމައިފިއެވެ.

ސްރީލަންކާގެ ބޮޑު ވަޒީރު ރަނިލް ވިކްރަމަސިންހަ މިކަން ހާމަކުރައްވާފައިވަނީ އެއަރޕޯޓް ތަރައްޤީ ކުރުމަށްޓަކައި ޖަފްނާ ސިޓީގައި އޮތް ބައްދަލުވުމެއްގައެވެ. އެ ޤައުމުގެ ސަރުކާރުން ބުނީ އެއަރޕޯޓް ތަރައްޤީ ކުރުމުގެ މަސައްކަތް މިއަހަރުގެ ފަހުކޮޅުގައި ފެށޭނެ ކަމަށާއި އެ ޕްރޮޖެކްޓަށް 20 ބިލިއަން ރުޕީސް ހޭދަވާނެ ކަމަށް ބެލެވޭ ކަމަށެވެ.

މި ބައްދަލުވުމުގައި ލަންކާގެ ބޮޑު ވަޒީރު ވިދާޅުވީ ލަންކާގެ އުތުރު ސަރަހައްދު ތަރައްޤީ ކުރުމަކީ ސަރުކާރުން ވަރަށް އިސްކަމެއްދޭ ކަމެއް ކަމަށާއި މި އެއަރޕޯޓް ތަރައްޤީކޮށް ނިމުމުން އެ ޤައުމުގެ އިޤްތިސާދު ވަރަށް ބޮޑަށް ކުރިއަރައިގެންދާނެ ކަމަށެވެ.

އެއަރޕޯޓް ތަރައްޤީކޮށް ނިމޭއިރު އެއަރޕޯޓުގެ ރަންވޭ 3500 މީޓަރަށް ބޮޑުކުރެވި، A320 އެއަރ ބަސް ޖެއްސޭނެއެވެ.

މި އެއަރޕޯޓް ތަރައްޤީކޮށް ނިމުމުން އިންޑިއާ، އޮސްޓްރޭލިއާ، ޖަޕާންގެ އިތުރުން ޔޫރަޕް އަދި މެދުއިރުމަތީގެ ޤައުމުތަކަށް ސީދާ ދަތުރުކުރަމުންދާނެ ކަމަށް ލަންކާ ޑެއިލީ ނޫހުގައި ރިޕޯޓްކޮށްފައިވެއެވެ.

މި އެއަރޕޯޓް ތަރައްޤީ ކުރަނީ އެއަރޕޯޓްސް އޮތޯރިޓީ އޮފް އިންޑިއާގެ ފަރާތުންނެވެ. މި އެއަރޕޯޓް އިންޓަރނޭޝަނަލް އެއަރޕޯޓެއްގެ ގޮތުގައި ތަރައްޤީ ކުރުމަށް އެކި ފަހަރުމަތިން ވަނީ ވާހަކަތައް ދެކެވިފައެވެ. އެގޮތުން 2013 ވަނަ އަހަރު އެއަރޕޯޓް ތަރައްޤީ ކުރުމުގެ ވާހަކަތައް ދެކެވިފައިވީ ނަމަވެސް މިއަދާ ހަމައަށް އައިރު އެއަރޕޯޓް ތަރައްޤީ ކުރުމުގެ އަމަލީ މަސައްކަތް ވަނީ ނުފެށިއެވެ.

އެއަރޕޯޓް ތަރައްޤީ ކުރުމުގެ މަސައްކަތް މިއަހަރުގެ ފަހު ކޮޅު ފެށޭނެކަމަށް އިންޑިއާގެ ބޮޑުވަޒީރު ވިދާޅުވި ނަމަވެސް އެ މަސައްކަތް ނިންމާނެކަމަށް ލަފާ ކުރެވޭ ތާރީހެއް ވިދާޅެއް ނުވެއެވެ.

ލަންކާގައި މިހާރު އޮޕަރޓް ކުރަމުންދަނީ ދެ އިންޓަރނޭޝަލް އެއަރޕޯޓެވެ. އެއީ ބަންޑާރަނައިކް އިންޓަރނޭޝަލް އެއަރޕޯޓާއި ސްރީލަންކާގެ ދެކުނުގައި އޮންނަ ހަމްބަންތޮޓަ ޑިސްޓްރިކްޓުގައި އޮންނަ މައްތަލަ ރާޖަޕަކްސަ އިންޓަނޭޝަނަލް އެއަރޕޯޓެވެ.