ކަފިހި ހުރަހުން މަގު ހުރަސްކުރަނިކޮށް އެކްސިޑެންޓްވި މީހާގެ ހާލު ސީރިއަސް
އުމުރުން 47 އަހަރު އަންހެން މީހާއަށް މިހާރު އަންނަނީ އައިސީޔޫގައި ފަރުވާ ދެމުން
ހުޅުމާލޭގައި ހިނގާފައިވާ އެކްސިޑެންޓެއްގެ މަންޒަރެއް
ކަފިހި ހުރަހުން މަގު ހުރަސްކުރަނިކޮށް، އެކްސިޑެންޓްވެ އަނިޔާވި އަންހެން މީހާގެ ހާލު ސީރިއަސް ކަމަށް އޭނާއަށް ފަރުވާ ދެމުން އަންނަ އޭޑީކޭ ހޮސްޕިޓަލުން ބުނެފިއެވެ.
އުމުރުން 47 އަހަރު އަންހެން މީހާއަށް މިހާރު އަންނަނީ އައިސީޔޫގައި ފަރުވާ ދެމުންނެވެ. އޭޑީކޭ ހޮސްޕިޓަލްގެ މެނޭޖިންގ ޑިރެކްޓަރ އަހްމަދު އައްފާލް ވިދާޅުވީ އޭނާ އޮތީ "ސީރިއަސް" ހާލަތެއްގައި ކަމަށެވެ.
މިދިޔަ އަންގާރަ ދުވަހު މޫންލައިންޓް ހިނގުމުގެ ކަފިހި ހުރަހުން މަގު ހުރަސްކުރަނިކޮށް، އެކްސިޑެންޓްވެ އަންހެންމީހާގެ ބޯ ޖެހުނީ ސްޕީޑްބްރޭކަރުގައެވެ. ރާއްޖެ އެމްވީއަށް މައުލޫމާތު ލިބިފައި ގޮތުގައި ކަފިހި ހުރަހުން އޭނާ މަގު ހުރަސްކުރަނިކޮށް ދުއްވާފައި އައި ކާރުން ޖެހި ވެއްޓުމުން އޭނާގެ ބޯ ސްޕީޑްބްރޭކަރުގައި ޖެހުމުގެ ސަބަބުން އަންހެން މީހާގެ ސިކުނޑިއަށް ވަނީ ލޭ އެޅިފައެވެ.
އެކްސިޑެންޓްވި އަންހެންމީހާ އަށް ލިބިފައިވާ ގެއްލުންތަކާއި އަދި ދެމުން އަންނަ ފަރުވާގެ ތަފްސީލް ހާމަކޮށްދެވެން ނެތް ކަމަށް އޭޑީކޭ ހޮސްޕިޓަލުން ވަނީ ބުނެފައެވެ.
ފުލުހުން ބުނީ އެ މައްސަލަ މިހާރު އެ އިދާރާއިން ތަހްގީގް ކުރަމުން އަންނަ ކަމަށެވެ.
