އެމްބީއޭ ޗެމްޕިއަންޝިޕްގައި ކުޅުނު ފުރަތަމަ މެޗުން މޮޅުވެ، މުބާރާތުގެ ފެށުން ޔޫއެން ފްރެންޑްސުން ރަނގަޅު ކޮށްފިއެވެ. 

ސައިކްލޯން ބާސްކެޓް ކްލަބްއާއި ވާދަ ކޮށް ޔޫއެން ފްރެންޑްސް މެޗު ކާމިޔާބުކުރީ 45 ޕޮއިންޓް 35 ޕޮއިންޓުންނެވެ. 

ފުރަތަމަ ކުއާޓާގައި ސައިކްލޯންއަށް ކާމިޔާބު ކުރެވުނީ ހަތަރު ޕޮއިންޓެވެ. ތަފާތު ބޮޑުކޮށް 13 ޕޮއިންޓާއި އެކޮށް ފުރަތަމަ ކުއާޓާ ކާމިޔާބު ކުރީ ޔޫއެން ފްރެންޑްސްއެވެ. 

ދެވަނަ ކުއާޓާ ފެށިގެން ދެ ޓީމުންވެސް ކުޅުންރަނގަޅުކޮށް ފުލުފުލުގައި ސްކޯކުރުމަށް މަސައްކަތް ކޮށްފައިވެއެވެ. 21 ޕޮއިންޓް ކާމިޔާބު ކޮށް ފްރެންޑްސް ޓީމް ލީޑް ފުޅާ ކުރި އިރު ދެވަނަ ކުއާޓާ ނިމުނު އިރު ސައިކްލޯންއަށް ކާމިޔާބު ކުރެވުނީ އަށް ޕޮއިންޓެވެ. 

ސައިކްލޯން ޓީމުން ހެދެމުންދިޔަ ގޯސްތައް ރަނގަޅުކޮށް، ތިންވަނަ ކުއާޓާ ގައި ރީތި ކުޅުމެއްދެއްކިއެވެ. ނަތީޖާއެއްގެ ގޮތުން 14 ޕޮއިންޓަށް ފަރަގު ކުޑަކުރުމަށް ފަހު ގާތް ގާތުގައި ސައިކްލޯން ޓީމުން ފްރެންޑްސްއަށް ހަމަލާދެމުން ދިޔައެވެ. 

ތިންވަނަ ކުއާޓާ ނިމުނުއިރު ނަތީޖާއަކީ ސައިކްލޯން 20، ޔޫއެން ފްރެންޑްސް 34 ކެވެ. 

ހަތަރުވަނަ ކުއާޓާގައި ބޯޅަ ކޮންޓްރޯލް ކޮށް، ރަނގަޅަށް ޑިފެންޑް ކޮށްގެން ކުޅުނީ ސައިކްލޯންއެވެ. 

މެޗުގެ ފުރިހަމަ ވަގުތު ހަމަވިއިރު ނަތީޖާއަކީ ސައިކްލޯން 35، ޔޫއެން ފްރެންޑްސް 45ކެވެ. 

މެޗުގެ މޮޅު ކުޅުންތެރިޔަކަށް ހޮވުނީ ޔޫއެން ފްރެންޑްސްއަށް 22 ޕޮއިންޓް ހޯދައިދިން ފާތިމަތު ރިޝްމާއެވެ.