ރާއްޖެ އުފެދިފައިވާގޮތުން އެއްތަނުން އަނެއްތަނަށް ދަތުރުފަތުރުކޮށް ހެދުމަކީ އެހާ ފަސޭހަކަމެއް ނޫނެވެ. ކޮންމެ އަތޮޅެއްގައި އެތައް ރަށެއް އޮންނައިރު ވަށައިގެން މިއޮންނަނީ މާސިންގާ ކަނޑުއެވެ.
އެހެންކަމުން ރާއްޖެ ތަރައްޤީވެގެން އަންނައިރުވެސް އެންމެ ބޭނުންވަނީ ފަސޭހައިން އެއްރަށުން އަނެއް ރަށަށް ދަތުރުކުރެވޭނެ ނިޒާމެކެވެ. އެއްބަޔަކު ފެރީގެ ޙިދުމަތް އެކަށީގެންވާ ގޮތެއްގައި ބޭނުންވާއިރު އަނެއްބަޔަކު ބޭނުންވަނީ ކައިރި ހިސާބުތަކުން އެއަރޕޯޓުގެ ޙިދުމަތްވެސް އެއަތޮޅެއްގެ މީހުންނަށް ލިބުމެވެ.
ފ. މަގޫދޫ ކައުންސިލްގެ ރައީސް އަބްދުﷲ ވަހީދު ވިދާޅުވެފައިވަނީ އެސަރަހައްދަށްވެސް އެންމެ ބޭނުންވަނީ އެއަރޕޯޓެއް ކަމަށެވެ. ސަބަބަކީ މަގޫދޫ އަކީ ބިކޯކާ ޔުނިވާރސިޓީއެއް ހިންގާ ރަށަކަށްވެފައި އަބަދުވެސް އެރަށަށް ގިނަ އަދަދެއްގެ ކުދިން ކިޔަވަން އަންނަ ކަމަށެވެ. އެހެންކަމުން ކަނޑުގަދަ ދުވަސްވަރު މަގޫދޫއަށް ދަތުރުކުރުމަކީ ވަރަށް ބޮޑަށް އުނދަގޫ ކަމެއް ކަމަށް ވަހީދު ވިދާޅުވިއެވެ. އަދި މަގޫދޫއަކީ އެއަތޮޅުގެ މެދުގައި އޮންނަ ރަށްކަމުން އެރަށުގައި އެއަރޕޯޓެއް އެޅުމުން އެއަތޮޅުގެ ހުރިހާ ރައްޔިތުންނަށްވެސް ލުއިފަސޭހަތަކެއް ވެގެންދާނެއެވެ.
ކުރީގެ ސަރުކާރުން ފުރަތަމަ މަގޫދޫގައި އެއަރޕޯޓެއް އެޅުމަށް ނިންމުމަށްފަހު، ކޮންމެވެސް ސަބަބަކާއި ހުރެ އެއަތޮޅު ނިލަންދޫއަށް އެއަރޕޯޓުގެ މަޝްރޫއު ބަދަލުކޮށްފައިވާ ކަމަށް ވަހީދު ވިދާޅުވިއެވެ. އެހެން ނަމަވެސް މިސަރުކާރު އައުމަށްފަހު އަނެއްކާވެސް މަގޫދޫގައި އެއަރޕޯޓެއް އަޅާނެ ކަމުގެ ވައުދުވެފައިވެއެވެ.
މީގެ އިތުރުން ވަހީދު ވިދާޅުވީ އދ.މާމިގިލި އަދި ދ.ކުޑަހުވަދޫގައި އެއަރޕޯޓެއް މިހާރުވެސް އެބައޮތް ކަމަށާއި އެހެންކަމުން މަގޫދޫގައިވެސް އެއަރޕޯޓެއް އޮތުމަކީ ޔުނިވަރސިޓީއަށް ކިޔަވަން އަންނަ ކުދިންނާއި އެސަރަހައްދުގައި ތަރައްޤީވަމުން އަންނަ ފަތުރުވެރިކަމަށް ލިބިގެންދާނެ ފަސޭހައެއް ކަމަށެވެ.
ކުރިން ފ. އަތޮޅުގައި ވެރިކަން ކުރަމުން އައީ މަގޫދޫގައި ކަމަށާއި ރައީސް މައުމޫނުގެ ވެރިކަމުގައި އެއަތޮޅުގެ ވެރިކަން ނިލަންދޫއަށް ވަނީ ބަދަލުކޮށްފައެވެ. އާބާދީގައި ޖުމްލަ 890 މީހުން ދިރިއުޅޭ މަގޫދޫގެ ތައުލީމީ ނިޒާމާއި ސިއްހީ ނިޒާމު އެއްކޮށް ހަލާކުވެގެންގޮސްފައިވާ ކަމަށްވެސް ވަހީދު ވިދާޅުވިއެވެ.
މިހެންވުމުގެ ސަބަބުން ގިނަ ބަޔަކު މާލެއަށް ހިޖުރަކުރަން ޖެހުނުކަން ފާހަގަކުރަމުން ވަހީދު ވިދާޅުވީ އެކަމުގެ ސަބަބުން މަގޫދޫއަށް އަންނަން ޖެހޭ ތަރައްޤީ ވަރަށް ބޮޑުތަނުން ހުއްޓިގެން ދިޔަ ކަމަށެވެ.
އާބާދީ މަދުވުމަކީ ވަރަށް ބޮޑު ނިކަމެތި ކަމެއް ކަމަށާއި މިކަންކަން ރަނގަޅުވެގެންދާނީ ރަށަށް ތަރައްޤީ އައިސްގެން ކަމަށް ޤަބޫލުކުރައްވާ ކަމަށް ވަހީދު ވިދާޅުވިއެވެ.
މަގޫދޫ ކައުންސިލްއަކީ ރަށުގެ ތަރައްޤީ ގެނައުމަށް ގިނަ ގުނަ މަސައްކަތްތަކެއް ކުރައްވަމުންގެންދާ ނަމޫނާ ކައުންސިލްއެއްކަން ފާހަގަކޮށްލަންޖެހެއެވެ.
