ފ.މަގޫދޫގެ ވަޅުފެން ބޭނުން ކުރާވަރަށްވުރެ ހާލަތު ގޯސްވެއްޖެއެވެ.  

ރާއްޖެއެމްވީއަށް މައުލޫމާތު ދެމުން އެރަށުގެ ރައްޔިތެއް ބުނީ، ފެނާއި ނަރުދަމާގެ ނިޒާމު އެރަށް ވަރަށް އަވަހަށް ބޭނުންވާ ކަމަށާއި، މިހާރު ވަޅުފެން ވެސް ޒަރޫރީ ބޭނުންތަކަށް ބޭނުންކުރަން ކަމުނުދާ ކަމަށެވެ.

އެގޮތުން ވަޅު ފެނުގައި ނުބައިވަސް ހުރުމާއި، ފެނަށް ރީދޫ ކުލައެއް އަރާފަ ހުންނަ ކަމަށްވެސް އެނާ ބުންޏެވެ.

މިފެން ބޭނުންކުރުމަކީ ސިއްހީ ގޮތުން ވެސް ނޭދެވޭ އަސަރު ކުރާނެކަމެއްކަން ފާހަގަކޮށް އެމީހާ ބުނީ ރަށުގެ ތަރައްގީއަށް ކުރެވޭ މަސައްކަތްތަކުގެ ތެރެއިން ރައްޔިތުން އެންމެ ބޭނުންވަނީ ފެނާއި ނަރުދަމާގެ އެންމެ ފުރަތަމަ ރަށުގައި ގާއިމް ވެގެން ދިއުން ކަމަށެވެ.

''ވާރޭ ފެން ބޯން ބޭނުން ކުރަނީ. ފެން ނަގާގެން. އެކަމަކު ވަޅުފެން އާންމު ދިރިއުޅުމުގަ ބޭނުން ކުރަނީ. މުޅި ރަށުގެ ހުރިހާ ދިމާލެއްގެ ފެން ވަރަށް ގޯސް. ފާ ވަސް ދުވާނީ. މިމައްސަލައަށް ވަރަށް އަވަހަށް ހައްލު ބޭނުންވޭ'' އެޒުވާނާ ބުންޏެވެ.

ރަށުގެ ތަރައްގީގެ މަޝްރޫއުތައް ހިންގުމަށް ކައުންސިލްއާ ރައްޔިތުން ސަރުކާރާއި ގުޅިގެން މަސައްކަތް ކުރާނެ ކަމަށާއި، ދެވެން ހުރި ހުރިހާ އެއްބާރުލުމެއް ދޭނެ ކަމަށް ވެސް އޭނާ ބުންޏެވެ.

އާބާދީގައި ގާތްގަނޑަކަށް 700 މީހުން ދިރިއުޅެމުން އަންނަ މަގޫދޫގެ ރައްޔިތުން އެރަށުގެ ތަރައްގީއަށް އަންނަނީ ގިނަ ހުވަފެންތަކެއް ދެކެމުންނެވެ. ރާއްޖެގެ ކޮންމެ ރަށެއްގައި ފެނާއި ނަރުދަމާގެ ނިޒާމް ގާއިމްކޮށްދިނުމަކީ މިސަރުކާރުގެ ވައުދެކެވެ.