ދަރަނބޫދޫގައި ގެސްޓްހައުސްތައް ގާއިމްކުރުމާއި ބެހޭ ގޮތުން މަޝްވަރާކޮށްފި
14 ފެބުރުއަރީ 2019 | ބުރާސްފަތި 18:15ފެނުގެ ނިޒާމާއި، ނަރުދަމާގެ ނިޒާމެއް ނެތް
ދަރަނބޫދޫގައި ކައުންސިލުން ރައީސް ސޯލިހުއާ ބައްދަލުކުރައްވަނީ | ރައީސް އޮފީސް
ނިލަންދެއަތޮޅު އުތުރުބުރީ ދަރަނބޫދޫގައި ގެސްޓްހައުސް ވިޔަފާރިތައް ގާއިމުކުރުމަށް ފަހި މާހައުލެއް ހޯދުމާއި ބެހޭ ގޮތުން އެރަށުގެ ކައުންސިލުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާއެކު މަޝްވަރާކޮށްފިއެވެ.
ރައީސް އޮފީހުން ބުނީ ބުރާސްފަތު ދުވަހު ބޭއްވި މިބައްދަލުވުމުގައި ކައުންސިލުން ރަށުގެ ތަރައްގީއަށް ރާވާފައިވާ މަސައްކަތްތަކާއި މިހާރު ކުރިއަށްދާ މަސައްކަތްތަކާއި ރަށަށް ބޭނުންވެފައިހުރި ކަންކަމުގެ މައުލޫމާތާއި ރަށުގެ ކުރިއެރުމަށްހުރި ދަތިތައް ހިއްސާކޮށްފައިވާ ކަމަށެވެ. އަދި މިމައްސަލަތައް ހައްލު ކުރުމާއި ބެހޭ ގޮތުން ވެސް މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.
އެގޮތުން ބަނދަރުގެ ހާލަތު މިހާރު އޮތްގޮތުން ކުރިމަތިވާ ދަތިތަކާއި، ފެނުގެ ނިޒާމާއި ނަރުދަމާ ނިޒާމު ޤާއިމުވެފައި ނެތުމުން ކުރިމަތިވާ އުނދަގޫތައް ވަނީ ހިއްސާކޮށްފައެވެ. އަދި އެރަށުގެ ގިރާ ސަރަޙައްދު ހިމާޔަތްކުރުމާއި، ކައުންސިލް އިދާރާ ހިންގުމުގައި ދިމާވާ ބައެއް ގޮންޖެހުންތަކުގެ ވާހަކަތަށް ރައީސް ސޯލިހުއާ ވަނީ ހިއްސާކޮށްފައެވެ.
މީގެ އިތުރުން އެރަށުގެ ތަރައްގީއަށް ގެސްޓްހައުސް ވިޔަފާރިތައް ޤާއިމުކުރުމަށް ފަހި މާހައުލެއް ހޯދުމަށް ސަރުކާރުގެ އެހީތެރިކަން ބޭނުންވާކަމަށް ކައުންސިލުން ވަނީ އެދިފައެވެ.
މިބައްދަލުވުމުގައި ރައީސް ސޯލިހު ވިދާޅުވީ ދަރަނބޫދޫގެ ކައުންސިލުން އެދުނު ކަންކަމުގައި ކަމާގުޅޭ މިނިސްޓްރީތަކާއެކު މަޝްވަރާކުރުމަށްފަހު އެކަންކަމަށް ވިހާވެސް އަވަހަކަށް ޙައްލެއް ހޯދައިދޭން މަސައްކަތް ކޮށްދޭނެ ކަމަށެވެ.
