ސީ އެންބިއުލެންސަށް ދަތުރު ނުކުރެވިގެން އެމްއެންޑީއެފުން ބަލި މީހުންތަކެއް މާލެ ގެނެސްފި
14 ފެބުރުއަރީ 2019 | ބުރާސްފަތި 01:46މާލެ ގެނެސްދިނީ ފެރިދޫ ސިއްހީ މަރުކަޒުގައި ފަރުވާ ދެމުންދިޔަ ތިން މީހުން
ކޯސްޓްގާޑް ނޫރައްދީންއަށް މީހުން އަރުވަނީ
މޫސުން ގޯސްވެ، ސީއެމްބިއުލަންސްގައި ދަތުރު ނުކުރެވިގެން ބަލި މީހުންތަކެއް އެމްއެންޑީއެފް ކޯސްޓްގާޑުން މާލެ ގެނެސްފިއެވެ.
އެމްއެންޑީއެފުން ބުނީ އއ.ފެރިދޫ ސިއްހީ މަރުކަޒުގައި ފަރުވާ ދެމުން ދިޔަ ބަލި ތިން މީހުން ކޯސްޓްގާޑް ނޫރައްދީންގައި މާލެ ގެނެސްދީފައިވާ ކަމަށާއި، އެއީ 42 އަހަރުގެ ފިރިހެނަކާއި، 37 އަހަރުގެ ފިރިހެނެއްގެ އިތުރުން 32 އަހަރުގެ އަންހެނެއް ކަމަށެވެ.
މިމީހުން މާލެ ގެނައީ ބުދަ ދުވަހުގެ ރޭ ގަ އެވެ.
ރާއްޖޭގެ ބޮޑު ސަރަހައްދެއްގެ މޫސުން ގޯސްވެފައިވާއިރު، ކަނޑުމަތީގެ ތަފާތު ގިނަ ހާދިސާތަކެއްގެ ރިޕޯޓް، އެމްއެންޑީއެފް ކޯސްޓްގާޑަށް ދަނީ ލިބެމުންނެވެ. އަދި ކަނޑުދަތުރު ކުރާ ފަރާތްތަކުން މޫސުމަށް ސަމާލުކަން ދިނުމަށް މޫސުމާއި ބެހޭ ގައުމީ އިދާރާއިންނާއި ކޯސްޓްގާޑުން ވަނީ އިލްތިމާސް ކޮށްފައެވެ.
