ކުރިއަށް އޮތް 19 ވަނަ ރައްޔިތުންގެ މަޖިލިސް އިންތިޚާބުގައި 39 ރިސޯޓެއްގައި ވޯޓު ފޮށި ބަހައްޓަން އިލެކްޝަން ކޮމިޝަނުން ނިންމައިފިއެވެ.
39 ރިސޯޓެއްގައި ވޯޓު ފޮށި ބަހައްޓާނެކަމަށް އިލެކްޝަނުން އިއުލާން ކުރި ނަމަވެސް އެއީ ކޮން ރިސޯޓުތަކެއް ކަމެއް ހާމައެއް ނުކުރެއެވެ.
މަޖިލިސް އިންތިޚާބުގައި ރީރެޖިސްޓްރޭޝަން މުއްދަތުގެ ތެރޭގައި މަދުވެގެން 50 މީހުން ވޯޓްލާން އެރިސޯޓެއްގައި ރަޖިސްޓްރީވާން ޖެހެއެވެ. އަދި ރީރެޖިސްޓްރޭޝަން މުއްދަތު ހަމަވުމުން، 50 މީހުން ވޯޓްލާން ރަޖިސްޓްރީ ނުކުރާ ރިސޯޓެއްގައި ވޯޓުފޮށި ނުބައްހައްޓާނެވެ.
މަޖިލިސް އިންތިޚާބުގައި ވޯޓުލުމަށް ރީރެޖިސްޓްރޭޝަނަށް ހުޅުވާލާނީ މި މަހުގެ 18 ވަނަ ދުވަހު އެވެ. ނަމަވެސް ނިމިދިޔަ ރިޔާސީ އިންތިހާބުގައި އެ މީހަކު ވޯޓްލީ ތަން ބަދަލު ނުވާނަމަ މި ފަހަރުގެ އިންތިހާބަށް ރީރެޖިސްޓްރީވާން ނުޖެހޭނެއެވެ.
އަންނަ އޭޕްރީލް މަހުގެ 6 ވަނަ ދުވަހު ބޭއްވުމަށް ހަމަޖެހިފައިވާ މަޖިލީހުގެ އިންތިޚާބުގައި ވޯޓު ލުމުގެ ހައްގު 264،589 މީހުންނަށް ލިބިފައިވެއެވެ. އަދި މަޖިލީސް އިންތިހާބަށް ކުރިަމތިލުމުގެ ފުރުސަތު އިލެކްޝަންސް ކޮމިޝަނުން އާންމުކޮށް ހުޅުވާލާފައިވާއިރު، މިމަހުގެ 21 ގެ ނިޔަލަށް ކުރިމަތިލުމަށް އެދި ހުށަހެޅޭނެކަމަށް އިލެކްޝަންސް ކޮމިޝަނުން ބުންޏެވެ.
