ސާރީ ވަކިކޮށް، ޗެލްސީގެ ކޯޗަކަށް ޒިދާން ގެންނަނީ!

ޗެލްސީގެ ކޯޗުކަމުން މައުރީޒިއޯ ސާރީ ވަކިކޮށް، އެ މަގާމަށް ރެއާލް މެޑްރިޑްގެ ކުރީގެ ކޯޗު ޒައިނުއްދީން ޒިދާން ގެންނަން އުޅޭ ކަމަށް ރިޕޯޓްތައް ބުނެފިއެވެ.

ދަ ސަންއިން ބުނީ ޗެލްސީން ޒިދާންއަށް ފާރަލަމުން އަންނަ ކަމަށާއި، އެ ކްލަބުން ބޭނުން ވަނީ ސާރީ ވަކިކޮށް ކޯޗުކަމުގެ މަގާމަށް ޒިދާން ގެންނަން ކަމަށެވެ.

ޗެލްސީގެ ކޯޗުކަމުން ސާރީ ވަކިކޮށްފާނެ ކަމަށް އަޑުތައް ފެތުރެން ފަށާފައި ވަނީ ޕްރިމިއާ ލީގުގައި އާދީއްތަ ދުވަހުގެ ރޭ މެންޗެސްޓާ ސިޓީއާ ވާދަކޮށް 0-6 ގެ ތަފާތުބޮޑު ނަތީޖާއަކުން ބަލިވެ، ޗެލްސީ ގަދަ ހަތަރަކުން ކައްސާލައި، ހަވަނައަށް ވެއްޓުމާއެކުގައެވެ.

މި ސީޒަނުގެ ޕްރިމިއާ ލީގުގައި މިހާތަނަށް ޗެލްސީން 26 މެޗު ކުޅެފައިވާއިރު، އޭގެ ތެރެއިން މޮޅުވެފައި ވަނީ 15 މެޗުންނެވެ. ބާކީ ހަ މެޗުން އެޓީމު ބަލިވެފައިވާއިރު، އަނެއް ފަސް މެޗު ނިމުނީ އެއްވަރުވެގެންނެވެ.

ޗެލްސީގެ ކޯޗުކަމާ މިދިޔަ އަހަރުގެ ޖުލައި މަހު ސާރީ ހަވާލުވެފައިވާއިރު، އޭނާގެ އިރުޝާދުގެ ދަށުން ޗެލްސީން ވަނީ މިހާތަނަށް 40 މެޗު ކުޅެފައެވެ. އޭގެ ތެރެއިން 26 މެޗުން އެޓީމު މޮޅުވެފައިވާއިރު، 8 މެޗުން ވަނީ ބަލިވެފައެވެ. ބާކީ ހަ މެޗު ނިމުނީ އެއްވަރުވެގެންނެވެ.

ޗެލްސީގެ ކޯޗަކަށް ގެނައުމަށް މަސައްކަތް ކުރަމުން އަންނަ ޒިދާން ވަނީ ކުޅުންތެރިޔެއްގެ ގޮތުގައި ގިނަ ކާމިޔާބީތަކެއް ހޯދާފައެވެ. އޭނާ ވަނީ ކޯޗެއްގެ ގޮތުންވެސް ކާމިޔާބީތައް ހާސިލް ކޮށްފައެވެ.

އެގޮތުން 2016 ވަނަ އަހަރުގެ ރެއާލް މެޑްރިޑްގެ ކޯޗުކަމާ ހަވާލުވުމަށް ފަހު ޒިދާން ވަނީ އެ ކްލަބަށް ޖެހިޖެހިގެން ތިން ޗެމްޕިއަންސް ލީގު ކާމިޔާބު ކޮށްދީފައެވެ. އޭނާ ވަނީ އެ ޓީމަށް ޖުމްލަ ނުވަ ތަށްޓެއް ކާމިޔާބު ކޮށްދީފައެވެ. އަދި ޒިދާން ވަނީ 2017 ވަނަ އަހަރުގެ އެންމެ މޮޅު ކޯޗުކަމުގެ މަގާމު ވެސް ހޯދާފައެވެ.