ފީއަލީގައި ޑެންގޫ ފެތުރުން ކޮންޓްރޯލް ކުރެވިއްޖެ: ހެލްތު ސެންޓަރު
ސުކޫލުތައްވެސް އާދިއްތަ ދުވަހު ހުޅުވޭނެ
ފީއަލީ ހެލްތު ސެންޓަރު
ފ. ފީއަލީގައި ހަލުއިކަމާއެކު ފެތުރެމުންދިޔަ ޑެންގީހުން ކޮންޓްރޯލް ކުރެވިއްޖެ ކަމަށް އެރަށު ހެލްތު ސެންޓަރުން ބުނެފިއެވެ.
އެކަމާ ގުޅިގެން "ރާއްޖެއެމްވީ"އަށް މައުލޫމާތު ދެއްވަމުން ފ ފީއަލީ ހެލްތު ސެންޓަރުގެ ކޮމިއުނިޓީ ހެލްތު އޮފިސަރ އަބްދުﷲ ޒައީމް ވިދާޅުވީ، ފާއިތުވި 2 ދުވަހު ވެސް ޑެންގޫގެ ކޭސްއެއް ހެލްތު ސެންޓަރަށް ރިޕޯރޓު ކޮށްފައިނުވާ ކަމަށާއި، މިވަގުތު ޑެންގޫ ހުން ޖެހިގެން އެއްވެސް ބަލި މީހަކު އެޑްމިޓް ކޮށްފައި ނުވާ ކަމަށެވެ.
ޒައީމް ވިދާޅުވީ، ޑެންގޫ ހުން ކޮންޓްރޯލް ކުރެވިފައިވީ ނަމަވެސް ކޮންމެވެސް ވަރަކަށް ވައިރަލް ފީވަރ ރަށުތެރޭގައި އުޅޭ ކަމަށާއި، ނަމަވެސް އެހާ ސީރިއަސް ނޫން ކަމަށެވެ. އަދި އަންނަ ހަފްތާގެ އާދިއްތަ ދުވަހު ސުކޫލުތައް ވެސް އަލުން ހުޅުވާނެ ކަމަށް ޒައީމް ވިދާޅުވިއެވެ.
ފީއަލީގައި ހަލުއި މިނެއްގައި ޑެންގީ ފެތުރެމުން ދާތީ އެރަށު ސްކޫލުގެ ކިޔެވުން ވަގުތީގޮތުން 5 ދުވަހަށް ބަންދު ކޮށްފައިވާ ކަމަށް އެރަށު ކައުންސިލްގެ ނައިބުރައީސް މޫސާ އަހުމަދު ވަނީ ވިދާޅުވެފައެވެ.
އާބާދީގައި ގާތްގަނޑަކަށް 1240 މީހުން ދިރިއުޅޭ ފީއަލީގައި ބަލި މީހުން ބެލުމަށް ހެލްތު ސެންޓަރުގައި 1 ޑޮކްޓަރާ 3 ނަރުހުން ތިބޭ އިރު، އެރަށުގެ އާންމު ސިއްހީ ހާލަތު ރަނގަޅު ކުރުމަށްޓަކައި ހެލްތު ސެންޓަރުން ވަރަށް ބޮޑަށް މަސައްކަތް ކުރައްވާ ކަމަށް އެރަށު ކައުންސިލުން މައުލޫމާތު ދެއެވެ.
އެގޮތުން ކައުންސިލާއި ހެލްތު ސެންޓަރު ގުޅިގެން ރަށު ތެރޭގައި މަދިރި ކޮންޓްރޯލް ކުރުމުގެ މަސައްކަތް ކޮށްފައިވާ ކަމަށާއި، ފާއިތުވި ދުވަސްތަކުގައި ރަށުތެރެއަށް މަދިރިބޭސް ޖަހައި މަދިރި ކޮންޓްރޯލް ކުރުމުގެ ގޮތުން މަސައްކަތްތަކެއް ކޮށްފައިވާ ކަމަށް ކައުންސިލުން މައުލޫމާތު ދެއެވެ.
