ތުރުކީގައި 2016 ވަނަ އަހަރު ކުރަން އުޅުނު އަސްކަރީ ބަޢާވާތުގައި ބައިވެރިވިކަމުގެ ތުހުމަތުގައި 1100 އަށް ވުރެ ގިނަ މީހުން ހައްޔަރުކުރަން އަމަރުކޮށްފިއެވެ.

ތުރުކީގެ މިނިސްޓްރީ އޮޕް އިންޓީރިއަރގެ މަސްދަރަކާ ހަވާލާދީ ސީއެންއެން އިން ބުނެފައި ވަނީ އަމުރުތައް ނެރެފައި ވަނީ އެމެރިކާގައި ދިރިއުޅޭ ދީނީ އިލްމުވެރިޔާ ފަތުހުއްﷲ ގުލެންއާ ގުޅުން ހުރި ފަރާތްތަކުގެ މައްޗަށް ކަމަށެވެ. ފަތުހުﷲ ގުލެންއަކީ ބަޢާވާތުގެ ފަހަތުގައި ހުރި އެއްމެ އިސް މީހާ ކަމަށް ތުރުކީގެ ސަރުކާރުން ތުހުމަތު ކުރެއެވެ.

މީގެ އިތުރުން މި މައްސަލައާ ގުޅިގެން ހައްޔަރުކުރަން އަމަރުކޮށްފައިވާ ފަރާތްތަކަކީ، 2010 ވަނަ އަހަރުގެ ތެރޭގައި ފުލުހުންގެ އިންސްޕެކްޓަރަކަށް ވާން އޮންނަ އިމްތިހާނުގައި މަކަރު ހެދި ކަމަށް ވެސް ތުހުމަތުކުރެވިފައިވާ ފަރާތްތަކެކެވެ. މީގެ ތެރެއިން 45 މީހަކު މިހާރު ވެސް ފުލުހުންގެ އިސް މަގާމުތަކުގައި އެބަތިބި ކަމަށް ވަނީ ޝައްކުކުރެވިފައެވެ.

ނާކާމިޔާބުވީ ބަޣާވާތަށް ފަހު ތުރުކީ އިން އެކި ފަހަރު މަތިން 50،000 މީހުން ހައްޔަރުކޮށް އޭގެ ތިންގުނަ މީހުން ވަޒީފާތަކުން ވަނީ ވަކިކޮށްފައެވެ. އޭގެ ތެރޭގައި އެތަކެއް ސިފައިންނެއް ހިމެނެއެވެ. އަދި މިދިޔަ އަހަރުގެ ތެރޭގައި ބަޣާވާތުގައި ބައިވެރިވުމުގެ ކުށް ސާބިތުވުމާ ގުޅިގެން އެ ގައުމުގެ އަސްކަރިއްޔާގެ 104 ސިފައިން އުމުރަށް ޖަލަށްލުމަށް ހުކުމްކޮށްފައި ވެސް ވެއެވެ.