އެންޓި ކޮރަޕްޝަނާއި ގުޑް ގަވަރންސްއާ ބެހޭ ޕްރޮގްރާމެއް ފަށައިފި
ޢަލީ ޒާހިރު ވިދާޅުވީ މުއައްސަސާތަކަކީ ކޮރަޕްޝަން ނެތް އިތުބާރު ހުރި ތަންތަނަށް ހަދަން ޖެހޭ ކަމަށް
އެންޓިކޮރަޕްޝަން އަދި ގުޑް ގަވަރނަންސް ޕްރޮގްރާމްގެ ތެރެއިން
އިންތިޚާބީ މަޤާމުތަކާއި ސަރުކާރުގެ އިސް މަޤާމުތައް ފުރުއްވާ ފަރާތްތަކަށް ޚާއްސަކޮށްގެން ރައީސް އޮފީހުން "އެންޓި ކޮރަޕްޝަން އެންޑް ގުޑް ގަވަރނެންސް ޕްރޮގްރާމް"ގެ ނަމުގައި ޕްރޮގްރާމެއް ފަށައިފިއެވެ.
ނެޝަނަލް އަރޓް ގެލަރީގައި އޮތް މި ޕްރޮގްރާމް ޝަރަފްވެރި ކޮށްދެއްވާފައި ވަނީ ރައީސުލް ޖުމްހޫރިއްޔާގެ އޮފީހުގެ ޗީފް އޮފް ސްޓާފް ޢަލީ ޒާހިރުއެވެ. މިރަސްމިއްޔާތުގައި ވާހަކަފުޅު ދައްކަވަމުން ޢަލީ ޒާހިރު ވިދާޅުވީ ދައުލަތުގެ މުއައްސަސާތަކުން ކޮރަޕްޝަން ނައްތާލައި އިތުބާރު ހުރި މުޢައްސަސާތަކަށް އެތަންތަން ހެދުމަކީ ރައީސް އިބްރާހީމް މުޙައްމަދު ޞާލިޙްގެ އަމާޒެއް ކަމަށެވެ.
މި ސަރުކާރުން ކޮރަޕްޝަނަށް ދީފައި ވަނީ ޒީރޯ ޓޮލެރެންސްކަން ފާހަގަ ކުރައްވާ އަލީ ޒާހިރު ވިދާޅުވީ ސަރުކަރުގެ ހުރިހާ މުއްސަސާތަކަކުންނާއި އެތަންތަނުގައި މަސައްކަތް ކުރާ ފަރާތްތަކުން ކޮރަޕްޝަނަށް ނޫނެކޭ ބުނަންޖެހޭ ކަމަށެވެ. އަދި ކޮރަޕްޝަނަށް މަގުފަހިވާ ކަންކަން ދެނެގަނެ އެކަންކަން ނައްތާލުމަށްޓަކައި ސަރުކާރުން މިހާރު ވެސް ގިނަ މަސައްކަތްތައް ކުރަމުންދާ ކަމަށް އޭނާ ފާހަގަކުރެއްވިއެވެ. މީގެ އިތުރުން ކޮރަޕްޝަން ނައްތާލުމަށްޓަކައި މުއައްސަސާތަކުން އެމުއައްސަސާތަކުގެ ޒިންމާ ފުރިހަމައަށް އަދާކުރަންޖެހޭނެ ކަމަށް ވެސް އޭނާ ވިދާޅުވިއެވެ.
މީގެ އިތުރުން ވެސް ކޮރަޕްޝަން ނައްތާލުމަށް ސަރުކާރުން ކުރަމުންދާ މަސައްކަތަށް ހުރިހާ ފަރާތްތަކަކުން އެއްބާރުލުންދީ ބައިވެރި ވުމަކީ މުހިންމު ކަމެއް ކަމަށް ވެސް އޭނާ ވިދާޅުވިއެވެ.
"އެންޓި-ކޮރަޕްޝަން އެންޑް ގުޑް ގަވަރނެންސް ޕްރޮގްރާމް"ގެ ނަމުގައި ކުރިއަށްގެންދާ މި ޕްރޮގްރާމަކީ ދައުލަތުގެ އިސް މަޤާމްތައް ފުރުއްވާ ބޭފުޅުންނަށް ރާއްޖޭގެ ކޮރަޕްޝަންގެ ޙާލަތާއި ކޮރަޕްޝަން ހުއްޓުވުމަށް ކުރެވޭނެ ކަންތައްތަކާއި ހިންގުމުގެ ނިޒާމާއި ބެހޭ ގޮތުން މަޢުލޫމާތުދިނުމަށް ކުރިއަށްގެންދާ ދެ ދުވަހުގެ ޕްރޮގްރާމެކެވެ.
މި ޕްރޮގްރާމުގައި ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަނާއި އިންޓަރނޭޝަނަލް ރިޕަބްލިކް ކޮމިޝަންގެ ބޭފުޅުން މަޢުލޫމާތު ދެއްވުމަށް ހަމަޖެހިފައި ވެއެވެ.
ރާއްޖެ ޓީވީއަށް މައުލޫމާތު ދެއްވަމުން ރައީސުލްޖުމްހޫރިއްޔާގެ އޮފީހުގެ ޑިރެކްޓަރ ވަސީމާ އަބްދުﷲ ވިދާޅުވީ ރައީސް އޮފީހުން ކުރިއަށްގެންދާ އެންޓި-ކޮރަޕްޝަނާއި ގުޑް ގަވަރނެންސް ޕްރޮގްރާމް ކުރިއަށް އޮތްތާނގައި ވެސް ބޭއްވުމަށް ހަމަޖެހިފައިވާ ކަމަށެވެ. އެކި މަޤާމުތައް ފުރުއްވާ ބޭފުޅުންނަށް އަދި މި ޕްރޮގްރާމުގެ ދަށުން މިދާއިރާއާ ގުޅޭ މުހިއްމު މަޢުލޫމާތުދައް ފޯރުކޮށްދިނުމަކީ ރައީސް އޮފީހުގެ އަމާޒެއް ކަމަށް ވެސް އޭނާ ވިދާޅުވިއެވެ.
ރައީސް އޮފީހުން ކުރިއަށްގެންދާ މި ޕްރޮގްރާމުގައި ސަރުކާރުގެ ވުޒާރާތަކުގެ އިސް ބޭފުޅުންނާއި ރައްޔިތުންގެ މަޖިލީހުގެ މެމްބަރުން ބައިވެރިވެ ވަޑައިގެންފައިވެއެވެ.
