ފީއަލީގައި ޑެންގީ އިތުރުވަމުން ދާތީ ވަގުތީގޮތުން ސްކޫލްގެ ކިޔެވުން ބަންދުކޮށްފި
10 ފެބުރުއަރީ 2019 | އާދީއްތަ 06:48ހޮނިހިރު ދުވަހު އުމުރުން 3 އަހަރާއި 4 އަހަރުގެ ކުއްޖަކު ޑެންގީއަށް ޕޮޒިޓިވް ވެފައިވޭ
ފ . ފިއަލީ
ފ. ފީއަލީގައި ހަލުއި މިނެއްގައި ޑެންގީ ފެތުރެމުން ދާތީ އެރަށު ސްކޫލުގެ ކިޔެވުން ވަގުތީގޮތުން ބަންދު ކޮށްފައި ވާކަމަށް އެރަށު ކައުންސިލްގެ ނައިބުރައީސް މޫސާ އަހުމަދު ވިދާޅުވެއްޖެއެވެ.
ރާއްޖެ ޓީވީ އާއި ވާހަކަ ދައްކަވަމުން މޫސާ އަހުމަދު ވިދާޅުވީ ހަލުއި މިނެއްގައި ޑެންގީ ފެތުރެމުން ދާތީ އެރަށު ސްކޫލުގެ ކިޔެވުން ވަގުތީގޮތުން ފަސް ދުވަހަށް ބަންދު ކޮށްފައިވާކަމަށެވެ.
ނައިބުރައީސް މޫސާ ވިދާޅުވީ އުމުރުން 3 އަހަރާއި 4 އަހަރުގެ ކުޑަކުއްޖަކު ޑެންގީއަށް ޕޮޒިޓިވް ވެފައިވާ ކަމަށާއި އެކުއްޖާއަށް ފަރުވާ ދެމުންދާ ކަމަށެވެ. މިއީ އެރަށުން ޑެންގީ އަށް ޕޮޒިޓިވް ވި 11 ވަނަ ކުއްޖާ ކަމަށް ވެސް އޭނާ ވިދާޅުވިއެވެ.
ނައިބުރައީސް މޫސާ ވިދާޅުވީ މާލެ ފޮނުވާލި ކުދިންގެ ތެރެއިން އެއް ކުއްޖެއްގެ ހާލު ސީރިޔަސްވެ، އެކުއްޖާ އިތުރު ފަރުވާއަށް ރާއްޖެއިން ބޭރަށް އާދިއްތަ ދުވަހުގެ މެންދުރު ފަހުގެ ވަގުތެއްގައި ފުރުވާލާނެ ކަމަށެވެ.
މީގެއިތުރުން ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން މޫސާ ވިދާޅުވީ އާދިއްތަ ދުވަހު އެއް ކުއްޖަކު ވަރަށް ބޮޑަށް ހުންއައިސްގެން ސިއްހީ މަރުކަޒަށް ގެނެސް ޑޮކްޓަރަށް ދައްކާފައިވާ ކަމަށާއި ނަމަވެސް އަދި ނަތީޖާ ނުލިބޭ ކަމަށެވެ.
ފީއަލީގައި އިތުރަށް ޑެންގީ ފެތުރުނަ ނުދިނުމަށްޓަކައި ކުރަމުންދާ މަސައްކަތްތަކާ ބެހޭ ގޮތުން ވާހަކަ ދައްކަވަމުން ނައިބުރައީސް ވިދާޅުވީ އެރަށު ޞިއްޙީ މަރުކަޒާ ގުޅިގެން ރަށުތެރެ ފޮގު ކުރުމުގެ މަސައްކަތް ކުރަމުން ދާކަމަށާއި އަދި ޑެންގީ ހުން ޖެހިފައިވާ ކުދިންގެ ގެތަކާއި 300 ފޫޓް ކައިރި ހުރި ޖަންގުޝަންތައް ބަލާފައިވާ ކަމަށެވެ.
އެތަންތަނުން މަދިރިތައް މައްޗަށް އަރަމުންދާ ކަމަށާއި އެއްވެސް ޖަންގުޝަނެއް ރަނގަޅަށް މަރާމާތުކޮށް ބެލެހެއްޓިފައި ނެތް ކަމަށް އޭނާ ވިދާޅުވިއެވެ. އެގޮތުން 90 އިންސައްތަ ޖަނގުޝަންތައް މަރާމާތުކޮށް އަލުން ރަނގަޅު ކުރަން ޖެހޭ ހާލަތުގައި ހުރި ކަމަށް ވެސް އޭނާ ވިދާޅުވިއެވެ.
ފީއަލިން މިހާތަނަށް ޖުމުލަ 11 ކުދިން ޑެންގީ އަށް ޕޮޒިޓިވް ވިއިރު، 10 ކުދިންނަށް ފަރުވާ ދެމުން ދަނީ މާލޭގައެވެ.
